Heseki’el 18 - NQAARIIT NE ROOG

Roog kaa hate’aa oxuu refna na pesoorooƭ um

¹ O Yaal oxe a daawnaxam fa lay um na xa ƭelem axene:

² «Xar taxu nu layaa o feƭit olene no saax le Isra’el: ‹Paap ke a ñaama a koƥ xa biiñ, ndaa xa ƥiy axe a ñiiñ ake a suumu.›

³ Ne ta wooritna yee mexe ñoowaa, mi o Yaal oxe na refkaa boo faw layun, nu ngapkatee o layaa o feƭit oleene kam Isra’el.

⁴ Xa laaw axe fop mi jegu a den, o laaw ole na faap fee nen ole no ƥiy onqe, mi jegu a den. O laaw o baabakaad ole rek na saŋkooxkaa.

⁵ O kiin oxe jofna, kaa ñaaƴnaa a ƭat fo o cofel.

⁶ Ñaamkee ñaamel ke ƥoxoteena pangool ke, ɗeetkee farna fo nitaal roog cakalaaru ke no mbind Isra’el, rokkee no tew no kend um, too wondooxkee fo o tew oxaa saqna tap.

⁷ Ñoowitkee onj no kiin, a daknaa ke ta tayle’eena no lad, guuɗkee, a ci’aa o qeexe xe ta ñaam soo a ñiraa o ƥangde xe.

⁸ Rawnitkee took o yaakaar teen tig, hupalkee no rimand o lad um, fi’kee njofaƭar, too a hate’taa o cofel ndeer o kiin fo o kend um.

⁹ Kaa reefaa kebil es, a gayaa bargal es yaa ta fesoortaa ndigil ne. O kiin o nandu neene a jofa tigi, too a woora yee xan a ñoow. Mi o Yaal oxe na refkaa boo faw layun.

¹⁰ Oxeene kiin koy a waaga jeg o ƥiy onqaa refna saasaay, a gen no ɓaxaa fo’oy mbaat ta doonaa o pog um leng na pi akeene,

¹¹ too faap um o mat fi’ee dara no keene fop. Boo o ƥiy onqeene a ñaamaa ñaamel ke ƥoxoteena pangool ke, a rok no tew no kend um,

¹² a ñoowtaa onj no ndool onqe fo o gataakoon ole, a guuɗaa, dakinkee ke ta tayle’eena, a ɗeetaa farna fo nitaal roog cakalaaru ke, a fi’aa cednooxu,

¹³ a rawnitaa took o yaakaar teen tig, a hupal no rimand o lad um, ndax xan a ñoow? Ha’aa, ñoowkee! A fi’a cednooxu keene fop, too a woora yee xan a xon, a gadoox fo’oy um.

¹⁴ Oxeene kiin koy a waaga jeg o ƥiy onqaa ga’na pakaad ke faap um fop, ndaa ke ta ga’na ga a den fop oo tax’ee ta laal a den.

¹⁵ Ñaamkee ñaamel ke ƥoxoteena pangool ke, ɗeetkee farna fo nitaal roog cakalaaru ke no mbind Isra’el, rokkee no tew no kend um,

¹⁶ ñoowitkee onj no kiin, jangkee tayle, guuɗkee, ndax a ci’aa o qeexe xe ta ñaam, soo a ñiraa o ƥangde xe.

¹⁷ Lalitkee o hup doole took no toroxu xe, rawnitkee took o yaakaar teen tig mbaat ta hupal no ndimand, a reefaa kebil es soo a gayaa bargal es, oxeene xonkee yaam tooñ ne faap um, a woora yee xan a ñoow.

¹⁸ Faap um reeƭu o ñaañagadil, a guuɗaa o pog um, fi’ee ndeer xeet um kaa faaxna, o ten na xonkaa yaam tooñ xoox um.

¹⁹ Kaa nu layaa yee: ‹Xar taxu o ƥiy onqe naagee o gadooxaa tooñ faap um?› O nanangaan kaa o ƥiy onqe a fesoor a ƭat fo o cofel, a gay soo a reef bargal es fop, too a woora yee xan a ñoow.

²⁰ O kiin oxe bakaadna na xonkaa. O ƥiy gadooxkee tooñ faap um, too faap oo gadooxkee tooñ no ƥeem. O cofel ole no cofu xe xan a ref took um, soo kañaan ne no soxodu xe a ref took um.»

A tegdinax no fi paax

²¹ «O soxodu xe a fesangaa a cinj pakaad ke ta fi’na fop, a gay bargal es fop soo a reefaa a ƭat fo o cofel, a woora yee xan a ñoow, xonkee.

²² Njofaƭar ne ta fi’na fop wetandooxkataand, too xan a ñoow na pexey o cofel ole ta fi’na.

²³ Ndax fa nqon fee no soxodu xe moƴanaxam ndi ta fes a ƭat a paaxeer um a cinj soo a ñoow? Mi o Yaal oxe na refkaa boo faw layun.

²⁴ Boo o cofu xe a fesna a cinj o cofel um, a fi’aa njofaƭar, a laalaa cednooxu ke o soxodu xe a fi’aa fop, ndax xan a ñoow? A pi a cofu leng alaa ta fi’na wetandooxkaand. Xan a xon yaam njofaƭar um fa bakaad fee ta fi’na.

²⁵ Kaa nu layaa yee: ‹A ƭat ale no Yaal oxe jofee.› Nuun mbind Isra’el, nan-gilooxyo boog: Ndax a ƭat es jofeeru, ndi ake nuun njofeeru?

²⁶ O cofu xe a fesangaa a cinj o cofel um soo a fi’aa njofaƭar boo a xon yaam keene, njofaƭar ne ta fi’ina warnoorun.

²⁷ O soxodu xe a fesangaa a cinj kañaan ne ta fi’aa koy, ndax ta ñaaƴin a ƭat fo o cofel, xan a mucil o ñis um.

²⁸ A ga’angaa soo a fes a cinj pakaad ke ta fi’na fop, a woora yee xan a ñoow, xonkee.

²⁹ Mbind Isra’el kaa layaa yee: ‹A ƭat ale no Yaal oxe jofee.› Nuun mbind Isra’el, a ƭat es jofeeru, ndi ake nuun njofeeru?

³⁰ Ten taxu xam hate a nuun, nuun mbind Isra’el, oxuu refna na pi um. Mi o Yaal oxe na refkaa boo faw layun. Nomtooxiidyo too mbes a cinj a pi a paaxeer ake nuun, ndax a panq akaa na mbakaadnooraa a nuun njegkatee.

³¹ Mbaasyo a pi a paaxeer ake nuun, supit a qeeñ ake nuun fo a yiif ake nuun. Nuun mbind Isra’el, xar taxu nu mbug o nqon?

³² Bugiim o leng a xon. Mbesyo pakaad nuun a cinj boog, ndax nu ñoow. Mi o Yaal oxe na refkaa boo faw layun.»