Heseki’el 17 - NQAARIIT NE ROOG

A canjiik ale fo ndaxar biiñ ne

¹ O Yaal oxe a daawnaxam fa lay um na xa ƭelem axene:

² «Wo fee o ƥiy no kiin, cooxti a nax-o-gut, lay we no mbind Isra’el a naxax.

³ Fat o lay ee: Keeke o Yaal oxe na refkaa boo faw a layu: A canjiik a maak ale a nafir ake a naangna lawlaw, a ƥiñ ake a njigid, a muuroox a naf a tinqu kaa na miric-miricnaa, a gara boo Libaŋ, soo a watin a cul ale no ndaxar seedar ne.

⁴ A farda o yar ole moƴna o goƭ took na xa yar axe ten, a ɓisin no saax no jula soo a doonin na teeru fa njula’ir.

⁵ A xotta njimb no saax le Isra’el, a jimbin no lanq ciqte, paam poofi mayu nen nqawul.

⁶ Njimb neene a saxa soo a refat o par ndaxar biiñ o qayu, ndaa jigid’ee. A naaq ake ten kaa sag’u farna fo a canjiik ale, soo a paƴ ake ten a sax ɗuga um. A refata o par ndaxar biiñ, a salaa a naaq soo a fi’aa xa par.

⁷ A jeg’a a canjiik a maak a lakas alaa a nafir ake a njigidna, a naf ake a ndinq. Maaga, ndaxar biiñ ne a ɓakanda a paƴ ake ten farna fo ten soo a xayin xa par axe ten farna fo ten, ndax ta moƴ o soorin, a letna a naaq ake ten kaltaa lanq ke ta jimbeena.

⁸ Kaa jimb’el no qol o paax, paam poofi mayu, ndax ta xayaa, a rimaa soo a refat ndaxar biiñ mosu.

⁹ Layi yee: Keeke o Yaal oxe na refkaa boo faw a layu: Ndax xan a neq? Ndax a canjiik a eetaand ale ɗiqitkee a paƴ um, a ɓoor xa tim um, ndax ta weer ŋayam, a naf ake ta saqitna a mbeer korong? Soxla’kee doole fa mayu mbaat a yaj no wiin ndax ta fuurel.

¹⁰ Ten oo xeene a jimbe: Ndax xan a neq? Nqeñ ne no batand a daawangaan, ndax no ndigil weerkee? Xan a weer no lanq ke ta saxna.»

A tekit ale na naxax ale

¹¹ O Yaal oxe a daawnaxam fa lay um na xa ƭelem axene:

¹² «Layi xeet fa mbaafañ fee yee: Ndax kaa nu andee ke keene a tekitna? Layi yee: Nga’angyo, o maad oxe Babilon a reta Yeerusaleem, a xotit maaga o maad oxe fo kelfa ke soo a ɓis a den Babilon.

¹³ A jila dugatin no kurcala le no maad oxe, a dalin fo ten ngiɓoor, a daaɓooxnoorin. A ɓisa wiin maak we no saax le,

¹⁴ ndax maat ne a neewandel boo waagkatee o yoɗooxatin, soo a gay ngiɓoor um ne dalneena.

¹⁵ Kaa koy, a siiknoora fo o maad oxe Babilon, ye ta lulna wiin um Misira, ndax ta cooxin pis fo goor mayu. Ndax oxe fi’na keene xan a jeg ne ta bugna, ndax xan a daɗ? A ɗega ngiɓoor ne. Ndax xan a ɓostoox?

¹⁶ Ne ta woritna yee mexe ñoowaa, mi o Yaal oxe na refkaa boo faw layun, mexe daaɓooxaa kene: No saax le no maad oxe ta dodna a xonitkaa, yaam a ɗapa a taaƥ ale ten, a ɗeg ngiɓoor ne ta dalin’ina fo ten. Xan a xonit Babilon.

¹⁷ Ke xiixire we ten a mayna may fop oo fo a yaj a pagkatar ake ten, Firawon fee waagkiran o dimle na ñoq ale yaa Baababilon we a yoɗkaa a uum lanq a songir soo a mbi a uum ndax wiin mayu a saŋkel.

¹⁸ Niwee a taaƥ ale too a ɗega ngiɓoor ne, yaag oo toox de a jaɓoor’e o ten. A cinj ye ta fesoorna neene, daɗkee teen.

¹⁹ Ten taxu keeke o Yaal oxe na refkaa boo faw a layu: Ne ta wooritna yee mexe ñoowaa, feek a niwaƭara a taaƥ ale daaɓooxeena no gon es soo a ɗeg ngiɓoor ne, xam rabdin o ten.

²⁰ Xam letin mbaal es took um, too xan a naagel nuus no mbog ne mi. Xam ɓisin Babilon, too maaga, xam layoor fo ten no ngore’aƭar ne ta fi’axama.

²¹ We na yaj ake ten fop ƈufna xan laƥ a ñaam a den, soo we na yoqkaa a pasarel muu refna. Maaga, xan nu and ee mi o Yaal oxe layu.»

A tegit ake no Yaal oxe

²² Keeke o Yaal oxe na refkaa boo faw a layu: «Mi fa xoox es, xam ɓol a naaq na cul ndaxar seedar, fasit no cat ke o yar o dutuuñ soo jimbin took o joong o jiig o goƭu took.

²³ Xam jimbin took o joong o jiig kam Isra’el. Xan a sax a naaq soo a saq xa tim too xan a refat ndaxar seedar maak mosu. O xos ndiiƭ oluu refna xan a rut na naaq um. Kuu jegna a nafir xan a raang no yook ne na naaq um.

²⁴ Maaga, taxar ke na xa qol axe fop xan a and ee mi o Yaal oxe, kaam neewandaa ndaxar yimbil ne soo magnand ndaxar neewu ne, weernaa ndaxar ne xuƥna sap soo xuƥandatin ndaxar mbeeru ne. Mi o Yaal oxe layun too xam fi’in.»