Heseki’el 16 - NQAARIIT NE ROOG

Yeerusaleem kaa reeƭu o njaaƈ o mbaase

¹ O Yaal oxe a daawnaxam fa lay um na xa ƭelem axene:

² «Wo fee o ƥiy no kiin, andnoori a Yeerusaleem cednooxu ke ten!

³ Fat o lay ee: Keeke o Yaal oxe na refkaa boo faw a layu a Yeerusaleem: Na coosaan of fo no rimel of, no saax le Kanaan fogo. Faap of o Aa-amori a reeƭu soo ya of a ref o Heeheet.

⁴ No rimel of, a koom alaa rimee’oona, o taadaɓ of ɗeg’aand, ɓog’aandee na foofi, ndax o xoolandel, naƭtit’aandee fo jem, laxas’aandee ƭapax.

⁵ O leng ɗeet’irang a ngid yirmande, ndax ta fi’anong leng no tig keene, yaam ee ta yirmong, ndaa kaa o deɓ’el na xa qol axe a koom alaa fo o rimel of, yaam kaa o fasit’u.

⁶ Reefaam paam of, ga’ong o luuñaa kam fo’oy of soo um layong ee: Ñoowi ke refoona kam fo’oy of fop oo! Kaam ee: Ñoowi ke refoona kam fo’oy of fop oo!

⁷ Maaknaaxoong nen suuƴin le na xa qol axe, o ɓaatoox, maak, mos boo wee xar kene, ƭeen of a urin, wiil of a sax ñip. Kaa koy, o ƥor yoq’o soo naag ƭuc.

⁸ Reefaam paam of, too ga’aam ee fadaa o doloox. Maaga, ñiraaxoong sabadoor ne mi, ndax um muur cer ƥor of. Daaɓooxaam fa wo, hiɓoor fa wo, soo o refanaam. Mi o Yaal oxe na refkaa boo faw layun.

⁹ Ɓogaaxoong na foofi, forit fo’oy le wo reeƭna took of, soo ɗuumong diwliin fa mbelu tuñ.

¹⁰ Ñiraaxoong piis ngemeñe, rokanong xa ñaaƭ ƭool ndinqu, laxasong sooy yelefu, soo muurong suwaa.

¹¹ Mosandtaaxoong kelax, rokanong xa ƈang na xa ƥay of fo ceq no cok of.

¹² Rokaam o heɗ no ñis of, xa loŋ-loŋ no nof of fo a ƈang a mosu took xoox of.

¹³ Heloortaa wurus fa xaaliis, soo rokoox njoor fo suwaa fo piis ngemeñe. Kaa o ñoowtaa mbiɗel moku fo suum fo diwliin. Mosataa lool too jagaa fo maat.

¹⁴ Gon of a joota a ndeer qeet ke yaam o mosel of ole ñak’ina sik too meleƈ le muur’oonga a taxin. Mi o Yaal oxe na refkaa boo faw layun.»

Yeerusaleem a jaga’a

¹⁵ «Kaa koy, kaa o hooloox o mosel of, too o jeg gon of a ɓekaang no njaga, soo o jimboox no ceeq ye refanoona o tak-a-faaf oxuu refna.

¹⁶ Xotaa no ñirax ke wo, ño’in a den, ndax o mosandit a den a ñaang a sadaxand ake wo, soo jaga’it teen. Nandu neene mosee o jeg, too jegkatee muk.

¹⁷ Jangaa kelax mosu ke wo mbi’teena wurus fee mi fa xaaliis fee mi ci’oonga, jaltin nitaal no goor, soo jaga fa den.

¹⁸ Jangaa ñirax kemeñe ke wo, ndax o muurit a den nitaal keene, sadax a den diwliin es fa cuuraay es.

¹⁹ Diƈaa mbaambir den ñaamel ke ci’oonga, mbiɗel ke moƴna o mok, diwliin fee fo suum ke ñoowdandtoogoonga. Keene fop ɓoxotaano nen sadax fa mbelu tuñ mbaambir den. Keene refu ke fi’oona, mi o Yaal oxe na refkaa boo faw layun.

²⁰ Jangaa xa ƥiy xa koor fo xa tew axe wo riman’axamoona soo ɓoxot a den nitaal keene nen sadax, ndax da lisit a den. Ndax kaa njaga ne wo deyirang?

²¹ Xirsaa xa ƥiy xa koor axe mi soo ɓoxot a den nen sadax, doxan a den nitaal keene.

²² Kam ee kam cednooxu ke wo fop fo njaga of, wetandooxiro jamaane fee no ndeƥandoong of, ye yoqoona o ƥor, naag ƭuc soo luuñaa kam fo’oy of.

²³ A cinj a pi kañaan ake wo fop, sabab, sabab took of! Mi o Yaal oxe na refkaa boo faw layun.

²⁴ Maxanaa a xoox of mbind njaga’ir, fi’ood taalaand no paayo ke fop.

²⁵ No ƭat-sal nuu refna, jalaa maaga ndaalaand of, fi cednooxu fo o mosel of, ɓoxotoox no tak-a-faaf oxuu refna, mayƭand njaga of.

²⁶ Jaga’aa fo Miimisira we, gentand of weene cer ke a poŋkilna soo mayƭand njaga of ndax o fuuxnooraam.

²⁷ Maaga, inooxanaaxoong, wañ o jeg of, ɓoxotong fañ of, da njeg ne da mbugna na wo, mboƥ ndoog ne no Fiifilista we sed’ina yaam a pesoorooƭ a sednooxu of.

²⁸ Jaga’aa fo Aa-asuur we, yaam deyƭooxiro. Jaga’aa fa den too taxee o deyƭoox muk.

²⁹ Mayƭandaa njaga of no saax le no jula we a ndeer Kaakalde we, too taxee o deyƭoox muk.

³⁰ Mi o Yaal oxe na refkaa boo faw kaam ee: Cey, ndaw ne heestoona! Fi’aa tig oo tig keene fop ndefna calel a caga laa moƴna o hupal.

³¹ Ye maxoona mbind njaga’ir no ƭat-sal nuu refna soo fi taalaand no paayo ke fop, reeƭiro sax nen a caga, yaam waaƭiro ndabid.

³² Kaa o reeƭu o tew o seeseeq oxaa na dalnaa genar, a waas o kor um.

³³ A caga ke fop kaa cooxeel neexil, ndaa wo o mat, neexil of ci’aano xa pes of fop, fapit a den nger, ndax o kooc a den me wo, muu refna no njaga of.

³⁴ Fi’aa kaa guutatirna fo rew lakas we no njaga ne wo. Waaƭoogaandee, wo cooxtoogu ndabid ndaa cooxoogaandee. Guutatiraa fo rew lakas we no njaga ne wo.

³⁵ Ten taxu, wo Yeerusaleem, a caga le, nan-gilooxi fa lay fee no Yaal oxe!

³⁶ Keeke o Yaal oxe na refkaa boo faw a layu: Feek huytaa a xoox of, cer ƥor of a nga’el ye o jaga’aa fo xa pes of fo pangool cednooxu ke wo fop, doon teen ɓax fo’oy le na xa ƥiy xa koor axe wo ɓoxotoona a den,

³⁷ ten taxu, mexey fokataa xa pes axe wo fop ŋastoogoona, fop we bugrit’oona fo fop we sib’oona. Xam fokatit a den muu refna, da siiknoor fa wo. Xam lal a den cer ƥor of, too xan a nga cer ƥor of fop.

³⁸ Xam hate’tong ne rew seeseeq we a ngate’teel fo we na ƥaxaa fo’oy, too xam ɓax fo’oy of kam fuux ɗomu le fo kam naal es.

³⁹ Xam ɓoxotong na xa ƥay den. Xan a mbayit mbind njaga’ir ne wo, a yaq taalaand ke wo. Xan a mbolong ƭuc, a njang kelax ke wo soo a nqaƴong o ƥor, o yoq ƭuc.

⁴⁰ Xan a soob faan le took of, ndax da mbartong a kac, a mbandtong laƥ.

⁴¹ Xan a ndox pind ke wo, a layoor fa wo na kid no rew mayu. Xam ñuf njaga ne wo, too me ta refna cooxitkatiro ndabid.

⁴² Xam ɓoosdand fuux es took of, too xan naal es a goƭong. Xam ɓoos, fuuxkatiim.

⁴³ Feek wetandooxiro ndeƥandoong of soo fuuxnoortaam a pi of, mi itam oo xam fudin took of a pesoorooƭ of. Mi o Yaal oxe na refkaa boo faw layun. Ndax ɓaat’iro no cakalaaru ke wo fop cednooxu keene?»

Yeerusaleem moƴu faaxaƭar teeru lakas ke

⁴⁴ «Oxuu na laytaa xa peƭit xan a feranong o feƭit olene: ‹O ƥiy o ndew ya um a noonaa!›

⁴⁵ Wo refu o ƥiy o ndew onqe ya of fee sib’atna o kor um fo xa ƥiy um. Wo refu o maag o tew na xa teɓ of xa tew axe mbaasna gor den fo xa ƥiy den. Ya nuun o Heeheet a reeƭu, soo faap nuun a ref o Aa-amori.

⁴⁶ O maag of o tew oxe gartoonga no ɓemb-roog o janoon refu Samari fo xa ƥeem xa tew, soo o ndeɓ of o ndew onqe gartoonga no ɓemb-roog o ñamaak a ref a Sodoom fo xa ƥeem xa tew.

⁴⁷ Ñaaƴiro na ƭat den day teen, fi cednooxu leng kut ke da mbi’na, kaa o xeef’u kaaga, moƴ o yaqoox a den na ƭat ake wo fop.

⁴⁸ Ne ta wooritna yee mexe ñoowaa, mi o Yaal oxe na refkaa boo faw layun, Sodoom fee o ndeɓ of o ndew fo xa ƥeem xa tew mbi’ee ke fi’oona, wo fo xa ƥeef xa tew.

⁴⁹ Keeke refu tooñ ne Sodoom fee o ndeɓ of o ndew: Kaa magnandoox’u, a ñaam kupu, a yaadoox, ten fo xa ƥeem xa tew, too dif’oogee xa ƥay no toroxu xe fo o ndool onqe.

⁵⁰ Kaa mbelnooxat, a mbi’aa cednooxu mbaambir es. Moocandaam a den ye ga’uuma keene.

⁵¹ Samari o mat fi’ee genwal no pakaad ke wo. Cednooxu ke wo moƴu o may fuuf ke ten, too cednooxu ke fi’oona fop kaa nand wee ndax xa teɓ of kaa njof.

⁵² Ndiiki koy, roxondooxi gaci of, yaam pakaad ke wo moƴna o mbaaxaƭar ke den, kaa nand wee ndax ɓogaa xa teɓ of. Wo boog, seeƈaari soo roxondoox gaci of, yaam kaa nand wee ndax jofandaa xa teɓ of.

⁵³ Xam nomtiid we ƥiseena took o hup doole na den, we ƥiseena took o hup doole na Sodoom fo caate ke mbiduuna, we ƥiseena took o hup doole na Samari fo caate ke mbiduuna fo we ƥiseena took o hup doole na wo a ndeer no we den.

⁵⁴ Boo roxondooxoona gaci of soo seeƈaar yaam fop ke fi’oona, xan a ref yaaloor na den.

⁵⁵ Fog yaay of we ndefna Sodoom fo xa ƥeem xa tew xan a ndakoox ne da ndeeƭna, Samari fo xa ƥeem xa tew a ndakoox ne da ndeeƭna, too wo fo xa ƥeef xa tew xan nu ndakoox ne nu ndeeƭna.

⁵⁶ Sodoom refkatee naxoor of nen na jamaane fee ga’atinoox’oona,

⁵⁷ yaaga kañaan of huytafulaand. Ndiiki koy, wo yoqte no niwaƭarel ole roog we Edoom fo fop we mbiduuna a ndoonkang, den fo roog we no Fiifilista we siboonga me widoonga fop.

⁵⁸ Kaa o rabdeel ke a pi a cednooxu fo a cakalaaru ke wo a ndimna. Mi o Yaal oxe layun.

⁵⁹ Keeke o Yaal oxe na refkaa boo faw a layu: Xam fesoor fa wo ne fesoortoona, wo fee xeefna a taaƥ ale ye ɗegoona ngiɓoor ne in.

⁶⁰ Kaa koy, mi o mat xam wetandoox ngiɓoor es fa wo ye fo ndeƥandoong of too xam dalin fa wo ngiɓoor naa na refkaa boo faw.

⁶¹ Xan o wetandoox a pesoorooƭ of, too xan o sed teen, yaa o daawatinkaa maag of fo xa teɓ of rew. Xam cooxong a den nen xa ƥeef xa tew, ndaa ngiɓoor of fa mi taxkiran.

⁶² Mi koy, xam dalnatin ngiɓoor es fa wo, too xan o and ee mi refu o Yaal oxe,

⁶³ ndax o wetandoox ke faafna, soo sed ɓot, ndax yaƥatkatiro o don of yaam gaci of yaa um waasankang fop ke fi’oona. Mi o Yaal oxe na refkaa boo faw layun.»