Heseki’el 14 - NQAARIIT NE ROOG

Isra’el a wara o deɓ pangool ke

¹ Goor leng-leng a ndeer no maak we Isra’el a ngara me mi soo a moof mbaambir es,

² too o Yaal oxe a daawnaxam fa lay um na xa ƭelem axene:

³ «Wo fee o ƥiy no kiin, goor weene kaa saq na qeeñ den pangool ke den, a ndoon mbaambir den ɓil le na tolofnooraa, a maafnooraa a den na bakaad. Ndax xam jaɓ da nga’ir fa mi?

⁴ Yaaga koy, layi fa den. Fat o yegin a den ee: Keeke o Yaal oxe na refkaa boo faw a layu: O kiin no mbind Isra’el oxuu ɓekna no xeeñ um pangool ke ten, a doon mbaambir um ɓil le na tolofnooraa, a maafnooraa na bakaad, cinj kaaga, ta gar me no tuleer oxe, mi o Yaal oxe fa xoox es na doonkan, yaam pangool mayu ke ten.

⁵ Neene, xam duq mbind Isra’el no xeeñ, den we mbesaxama a cinj yaam pangool ke den.

⁶ Ten taxu layi mbind Isra’el ee: Keeke o Yaal oxe na refkaa boo faw a layu: Nomtooxiidyo, mbes a cinj pangool ke nuun! Nquunyo cakalaaru ke nuun fop!

⁷ O kiin oxuu fesaxama a cinj ta ref no mbind Isra’el mbaat na xa katakoon axe ngenna kam Isra’el, a ɓek no xeeñ um pangool ke ten, a doon mbaambir um ɓil le na tolofnooraa, a maafnooran na bakaad, a garangaa me no tuleer oxe, ndax ta ga’ir fa mi, mi o Yaal oxe fa xoox es na doonkan.

⁸ Xam inooxan o kiin oxeene, fi ta ref o njapil o ƭeetoor fo naxoor. Xam suudin a ndeer xeet es too xan nu and ee mi refu o Yaal oxe.

⁹ O tuleer oxe a naxange boo a haƥat o ɗelem, mi o Yaal oxe naxkoogu o tuleer oxeene. Xan o ɓay es a dal took um, too xam suudin a ndeer Isra’el fee xeet es.

¹⁰ O tuleer o nandu neene fo xe ga’riidna fo ten xan a ngadoox tooñ leng kut ne too xan a nga’in.

¹¹ Neene, mbind Isra’el mo’ikkatee maa goƭaxama, too nqoolaƭaranditkatee a den tooñ. Maaga, xan da ndef xeet es soo um ref Roog den. Mi o Yaal oxe na refkaa boo faw layun.»

Dara finqkee hate fee Roog

¹² O Yaal oxe a daawnaxam fa lay um na xa ƭelem axene:

¹³ «Wo fee o ƥiy no kiin, saax a tooñangaam yaa ta soobooxna no ngore’aƭar, xan o ɓay es a dal took um, um yaq ñoowir um, hebliid took um biim soo war wiin we fo cegel ke.

¹⁴ A jeg’angaa sax kam saax leene goor daduk wene: Nowe, Dañel fa Yob, o cofel den, o ñis den soom a mucilkoogu. Mi o Yaal oxe na refkaa boo faw layun.

¹⁵ Um xaƴ’angaa muumeen soxodu da ndok kam saax le soo a mbar xa ƥiy axe ten ndax ta refat o mbiñ o mbootu, maa o leng a reefateerna yaam muumeen keene,

¹⁶ ne ta wooritna yee mexe ñoowaa, mi o Yaal oxe na refkaa boo faw layun, goor daduk weene a ndeeƭangaa a ndeer saax le, mucilkoogee xa ƥiy xa koor mbaat xa tew axe den, ndaa den doŋ muckoogu, soo saax le a refat o mbiñ o mbootu.

¹⁷ Mbaat toox um ɓisiid’angaa xire took saax leene soo hebil’u laƥ ne ta wid saax le, um suud’angaa teen wiin we fo cegel ke,

¹⁸ ne ta wooritna yee mexe ñoowaa, mi o Yaal oxe na refkaa boo faw layun, goor daduk weene a ndeeƭangaa a ndeer saax le, mucilkoogee xa ƥiy xa koor mbaat xa tew axe den, ndaa den soom muckoogu.

¹⁹ Mbaat toox um hebliid’angaa piste kam saax leene soo bilit fuux ɗomu le mi took um na pexey fa nqon fee, ndax um suud teen wiin we fo cegel ke,

²⁰ ne ta wooritna yee mexe ñoowaa, mi o Yaal oxe na refkaa boo faw layun, Nowe, Dañel fa Yob a ndeeƭangaa a ndeer saax le mucilkoogee xa ƥiy xa koor mbaat xa tew axe den, o cofel den, o ñis den soom a mucilkoogu.»

²¹ Keeke o Yaal oxe na refkaa boo faw a layu: «Ke ɓisiiduuma taamaala nahik maak ke mi fop oo ndefna: Xire, biim, ƥaaɓaan soxodu fa piste took Yeerusaleem, ndax um saŋik teen wiin we fo cegel ke,

²² xan a yoq teen yoqatin waa suteena, xa ƥiy xa koor fo xa tew. Den oo weene na sutooxiidaa a njagin me nuun. Xan nu nga a pesoorooƭ den fo a pi den, too xan nu yaaloox na taamaala fee ɓisiiduuma took Yeerusaleem, no fop ke fi’uuma took um.

²³ Xan a yaal a nuun yaa nu nga’kaa a pesoorooƭ den fo a pi den, too xan nu and ee o ƥor o ƥor taxee um fi fop ke fi’uuma kam teeru fee. Mi o Yaal oxe na refkaa boo faw layun.»