Heseki’el 13 - NQAARIIT NE ROOG

Ke layeena no duleer maamaaɓ we

¹ O Yaal oxe a daawnaxam fa lay um na xa ƭelem axene:

² «Wo fee o ƥiy no kiin, jo’tanaam duleer we Isra’el na mbi’ooxaa joojo’it. Fat o lay we na njo’taa katu na qeeñ den ee: Nan-gilooxyo fa lay fee no Yaal oxe!

³ Keeke o Yaal oxe na refkaa boo faw a layu: Sabab took no duleer fanxoyu we na ndeefaa yiif den too njegee mbeeñil leng!

⁴ Wo Isra’el, duleer we wo kaa nand nen xa ƥox-a-koƥ ndeer kefatin.

⁵ Nu ndetee nqendandik xa kur axe no saŋe ne, ndax nu saytoox mbind Isra’el fo ɓit, saƭik koŋ na ñoq ale na bes fee no Yaal oxe.

⁶ Peeñil den xa koɓong oo soo maƭak den a ref xa maaƥ xa ƥor. Kaa da layaa yee: ‹Mi o Yaal oxe layun!› Yaaga fop toox de, mi o Yaal oxe luliim a den. Kaa da yaakaarnooraa yee fa lay den xan a fadnoox.

⁷ Ndax peeñil ke nu njegna ndefee xa koɓong, soo yegnit ke nu layaa a ndef xa maaƥ xa ƥor? Kaa nu layaa yee: ‹O Yaal oxe layun!› Too yaaga fop oo layiim dara.

⁸ Ten taxu keeke o Yaal oxe na refkaa boo faw a layu: Feek fa lay nuun xa koɓong xa ƥor a refu, soo peeñil ke nuun a ndef xa maaƥ xa ƥor, xam inooxan a nuun. Mi o Yaal oxe na refkaa boo faw layun.

⁹ O ɓay es xan a dal took duleer we peeñil den a ndefna xa koɓong soo maƭak den a ndef xa maaƥ. Mbogkee no mal maak ne na xeet es, mbindkaand no mbokatax ne no mbind Isra’el, too ndokkee no fiisel ole Isra’el. Maaga, xan nu and ee mi refu o Yaal oxe na refkaa boo faw.

¹⁰ Neene, feek kaa mo’andaa xeet es, a ndamtin ee: ‹Jam a jega!› too yaaga fop oo jam jegee, soo xeet es a maxaa tabax, too den oo weene a ƭuuman laso,

¹¹ layi we na ƭuuman laso yee: Xan a gaakoox. A teƥ a cegu doole a gara boo a ƴut. Nuun a kalam a ƥuuɓu ke, xan nu yen, too nqeñ ne na und ake xan a bayit fop.

¹² Saŋe ne yoo xeeke a gaakooxa! Ndax nu laamitkaand ee: ‹Taa ƭuum ne nu muurit’uuna?›

¹³ Ten taxu, keeke o Yaal oxe na refkaa boo faw a layu: Kam fuux es, xam fi a und. Mbuyaam njegu doole xan a gar kam fuux es, too xan a kalam a ƥuubu a yen fa doole, ndax da saŋik fop.

¹⁴ Xam gaak saŋe ne nu ƭuumna. Xam maafin junjang boo a per ake ten ee faŋ. Xan a yurdoox soo nu saŋkoox a ndeer den. Maaga, xan nu and ee mi refu o Yaal oxe.

¹⁵ Xam paang fuux es tak took saŋe ne fo took no we ƭuumuuna. Maaga, xam lay a nuun ee: Taa saŋe ne fo we ƭuumooguuna?

¹⁶ Taa duleer weene na Isra’el njo’toogna na Yeerusaleem too a nga’anoogun peeñil jam, too yaaga fop oo jam jeg’ee? Mi o Yaal oxe na refkaa boo faw layun.»

Ke layeena no duleer rew maamaaɓ we

¹⁷ «Wo fee o ƥiy no kiin, wiƈaqilooxi farna fo mboƥ ndoog ne na xeet of na njo’taa katu na qeeñ den, too jo’tanaam a den

¹⁸ ee: Keeke o Yaal oxe na refkaa boo faw a layu: Sabab took no rew we na ƭiisanaa xa ƈoox axe fop xa ƈooƴoox soo a ƭiisanaa a qoox ake muurax podu nuu refna, ndax da ndam xa laaw! Kaa nu ndamkaa xa laaw axe na xeet es boo ƈut soo mboorin o ñoow na xa laaw axe nuun?

¹⁹ Kaa nu niwaƭaraxam paam xeet es yaam tanq lorso fo xa ƭeg puuru yaa nu mbaraa xa laaw axaa mbareerna o nqon, soo ñoownooraa xa laaw axaa mbarna o nqon, yaa nu maaɓaa xeet es fee na nan-gilooxaa xa maaƥ.

²⁰ Ten taxu keeke o Yaal oxe na refkaa boo faw a layu: Mexey! Xam damir fo xa ƈooƴoox axe nuun nu nqawloortaa xa laaw axe, ɗegit a den na xa ƈoox nuun soo xaƴ xa laaw axe nu ndamna.

²¹ Xam faar muurax ke nuun soo wat xeet es na xa ƥay nuun. Ndefkatee nen mbuufuɗag na xa ƥay nuun, too xan nu and ee mi refu o Yaal oxe.

²² Yaam ne nu mboosɗandtaa xeeñ le no cofu xe xa maaƥ, yaa gooyɗandaneeruuma mi fa xoox es fo yaam ne nu saƭkandaa xa ƥay no soxodu xe, ndax nu yaqanin ta fes a ƭat a paaxeer um a cinj soo a ñoow,

²³ yaam keene, nu njegkatee peeñil naanaxir too nu maɗagkatee. Xam wat xeet es na xa ƥay nuun, too xan nu and ee mi refu o Yaal oxe.»