Heseki’el 12 - NQAARIIT NE ROOG

Heseki’el a cooxta mbeeñil no mbaƭ ne

¹ O Yaal oxe a daawnaxam fa lay um na xa ƭelem axene:

² «Wo fee o ƥiy no kiin, kaa o gen a ndeer xeet fa mbaafañ: A njega a kid, ndaa naangee o nga’aa, a njeg nof, ndaa naangee o nanaa, yaam kaa ndef xeet fa mbaafañ.

³ Wo fee o ƥiy no kiin, fi’ani a xoox of o fof o raayir, soo raay njoloor o mbuc na kid den. Jangoorti no mbiñ onqe refoona nen oxaa na ɓiseel took o hup doole, jof o mbiñ o lakas na kid den. Xeƈa xan da and ee xeet fa mbaafañ a ndefu.

⁴ Sutiidi o fof o raayir ole wo njoloor o mbuc na kid den, soo wo fa xoox of o sutoox kirand ne na kid den ne waa na ƥiseel took o hup doole a sutooraa.

⁵ Na kid den, fi’i o gur no saŋe ne soo sutit teen o fof ole wo.

⁶ Na kid den, xan o gadooxin, sutin kam o niɓaan ole, muur mukit of too ɗeetkiro saax le, yaam kaam bug o ref o anddiloor no mbind Isra’el.»

⁷ Fi’aam ke hebil’eema: Sutaam njoloor o mbuc o fof es nen o fof o raayir. No kirand ne, yultaam saŋe ne o ɓay, sut o fof ole no niɓaan ole soo gadooxin na kid den.

⁸ No nqes ne, o Yaal oxe a daawnaxam fa lay um na xa ƭelem axene:

⁹ «Wo fee o ƥiy no kiin, ndax mbind Isra’el, xeet fa mbaafañ feene laamtirang ee: ‹Xar o fi’aa kene?›

¹⁰ Dooni a den ee: Keeke o Yaal oxe na refkaa boo faw a layu: O kelwaar oxe genna Yeerusaleem fo mbind Isra’el fop ndefna teen njegu fa lay fene.

¹¹ Layi yee: Kaam ref na nuun o anddiloor. Ke fi’uuma na fadnooxkaa na den: Xan a ƥisel took o hup doole.

¹² O kelwaar oxe refna a ndeer den xan a gadoox o fof kam o niɓaan ole soo a sutoox. Saŋe ne xan a fi’el o gur ndax ta suttel teen. Xan a sing mukit um ndax a kid um ƭeetkee saax le.

¹³ Xam letin mbaal ne mi took um, too xan a damel no mbog ne mi. Xam ɓisin Babilon, saax le no Kaakalde we, ndaa taxkee ta doonin a ngid, too xan a xonit maaga.

¹⁴ We ndeeruuna fop koy fo yeeyetax we ten fo a yaj ake ten xam pasar a den no nqeñ ne soo daabit a den laƥ.

¹⁵ Yaa um pasarkaa a den a ndeer qeet ke soo picit a den kam a saax a lakas ake xan da and ee mi refu o Yaal oxe.

¹⁶ Xam fi boo a ndeer den wiin jaakeer a ndaɗ xire fee, biim le fa piste fee, ndax da mbetandoox a ndeer qeet ke da ndetkaa cednooxu ke da mbi’’ina. Neene, xan weene a and ee mi refu o Yaal oxe.»

¹⁷ O Yaal oxe a daawnaxam fa lay um na xa ƭelem axene:

¹⁸ «Wo fee o ƥiy no kiin, xan o ñaamaa sendaa soo yeraa foofi of kam naqad fo caƭar.

¹⁹ Fat o lay we ngenna no saax le yee: Keeke o Yaal oxe na refkaa boo faw a layu we ngenna Yeerusaleem kam lanq ke Isra’el: ‹Xan da ñaamaa fa naqad soo a yeraa foofi fo caƭar. Xan saax le den a raad, a ñak fop yaam ngiin fo’oy ne no we ngenna teen.

²⁰ Teeru ke ngeneena xan a mbes a pec, saax le a wootat, too xan nu and ee mi refu o Yaal oxe.› »

Fa lay fee no Yaal oxe xan a fadnoox

²¹ O Yaal oxe a daawnaxam fa lay um na xa ƭelem axene:

²² «Wo fee o ƥiy no kiin, xar o feƭit olene nu layaa a tektu? Kaa nu layaa no kaa farna no saax le Isra’el ee: ‹Waxtu fee xe faafaa, too mbeeñil leng fadnooxee.›

²³ Layi a den boog ee: Keeke o Yaal oxe na refkaa boo faw a layu: Xam ñuf oleene feƭit, o don ne’katiran muk kam Isra’el. Layi a den kañ ee: Ñaal ke a matiida, kaa peeñil ke fop a mbadnooxkaa.

²⁴ Mbeeñil maamaaɓ mbaat ƭeet naanaxir jegkatee a ndeer mbind Isra’el.

²⁵ Mi refu o Yaal oxe. Kuu layuuma xan a fadnoox too gulooxkee. Na pe ake nuun, nuun xeet fa mbaafañ fee, xam lay soo fadnin. Mi o Yaal oxe na refkaa boo faw layun.»

²⁶ O Yaal oxe a daawnaxam fa lay um na xa ƭelem axene:

²⁷ «Wo fee o ƥiy no kiin, keeke mbind Isra’el a layaa: ‹Mbeeñil ne no koor oxene kaa refan a pe a koƭu ke na ngaraa, ke ta yegnitaa kaa fadnooxkaa taa mbaambir naa.›

²⁸ Ten taxu layi a den ee: Keeke o Yaal oxe na refkaa boo faw a layu: Fa lay fuu layuuma, xan a ref faa na fadnooxkaa no ñofu. Mi o Yaal oxe na refkaa boo faw layun.»