Heseki’el 11 - NQAARIIT NE ROOG

Yeerusaleem xan a hate’el yaam mbaaxaƭar ne ten

¹ Yiif le a gifaxam soo a ɓisaam no don-maax batand olaa no Mbind ne no Yaal oxe, no laa jasnoorna fo batand. A jeg’a no ndokand naa no don-maax ole goor qarɓeen ƭik fo goor ɓetuk. A ndeer den, ga’aam a Yaasaniya fee o ƥiy Asur fa Pelatiya fee o ƥiy Benaya, gelwaar we na xeet fee.

² O Yaal oxe a layaxam ee: «Wo fee o ƥiy no kiin, goor weene ndefu we na yuuɓaa paaxeer soo a cooxtaa xa as xa paaxeer kam teeru fee.

³ Kaa da layaa yee: ‹Refee yee taa mbaambir naa pind a maxkeel! Teeru fee refu a kaleera le, soo i ndef a tegeƴ ake.›

⁴ Jo’tanaam a den, kaam ee wo fee o ƥiy no kiin, jo’tanaam.»

⁵ Maaga, Yiif le no Yaal oxe a fudooxa took es, a layaam ee: «Jo’tanaam ee: Keeke o Yaal oxe a layu: Keene nu layaa nuun mbind Isra’el. Andaam ke refna na yiif nuun.

⁶ A bar ale nuun kaa ɓaatooxaa kam teeru fee, nu mayƭandit ped ke ten xa tal.

⁷ Ten taxu keeke o Yaal oxe na refkaa boo faw a layu: Xa tal axe nu nqaƴna kam teeru fee ndefu a tegeƴ ake soo teeru fee fa xoox um a ref a kaleera le, ndaa nuun, xan nu sutel teen.

⁸ Laƥ ne nu saɗaraa o mat um hebliidkaa took nuun. Mi o Yaal oxe na refkaa boo faw layun.

⁹ Xam sut a nuun teeru fee, ɓoxot a nuun na xa ƥay no genar soo fadin kate es took nuun.

¹⁰ Xan laƥ ne a maaf a nuun, yaa um hate’itkaa a nuun no fiisel ole Isra’el. Maaga, xan nu and ee mi refu o Yaal oxe.

¹¹ Teeru fee refkee na nuun a kaleera too nu ndefkee a tegeƴ ake. Kam o fiisel ole Isra’el sax um hate’itkaa a nuun.

¹² Maaga, xan nu and ee mi refu o Yaal oxe. Nu ndeefee kebil es too nu ngayee bargal es, ndax ndeefaa o mbaax onqe no qeet ke mbidna a nuun.»

¹³ Maaga, ye um jo’taa keene, Pelatiya fee o ƥiy Benaya a xona. Yenaam, gung a lanq soo falaloox ee: «Ey, o Yaal oxe na refkaa boo faw, ndax kaa o bug o saŋik yoqatin we Isra’el?»

Xan Roog a fokat xeet fee pasarooxna

¹⁴ O Yaal oxe a daawnaxam fa lay um na xa ƭelem axene:

¹⁵ «Wo fee o ƥiy no kiin, no kaa jofna no fog of, no we no ƥasil of fo no kaa farna no mbind Isra’el fop, we ngenna Yeerusaleem kaa layaa a den ee: ‹Ngoƭyo o Yaal oxe, in o mat a ci’u saax lene i njegin.›

¹⁶ Ten taxu layi a den ee: ‹Keeke o Yaal oxe na refkaa boo faw a layu: Ke deɓkuuma a den koƭu a ndeer qeet ke, pasar a den kam a saax a lakas ake fop oo, reeƭaam na den nen o mbiñ o tedu kam a saax ake da ndokna.›

¹⁷ Ten taxu fat o lay a den ee: ‹Keeke o Yaal oxe na refkaa boo faw a layu: Xam fokatit a nuun a ndeer qeet ke, korolit a nuun na saax ake pasar’uuma a nuun ndax um ci a nuun lanq ke Isra’el.

¹⁸ Xan a ndok teen soo a mbatin cakalaaru ke fop fo cednooxu ke fop.

¹⁹ Xam ci a den xeeñ leng kut soo ɓek na den yiif xas. Xam watin no ngiin den xeeñ den le saƭkitna nen ɓil soo ci a den xeeñ hiihiin,

²⁰ ndax da ndeef kebil es, a ngay bargal es soo a mbadin a den. Xan a ndef xeet es soo um ref Roog den.›

²¹ Kaa koy, we xeeñ den a saaƭooxna no cakalaaru ke fo cednooxu ke o mat, xam gadin a den a pi den. Mi o Yaal oxe na refkaa boo faw layun.»

O ndam onqe no Yaal oxe a sutooxa Yeerusaleem

²² Maaga, pindel yeeyetax ke yoon’ina fo a saang ake a letna a nafir den, too o ndam onqe na Roog fee Isra’el a reeƭa took den, a garit a den took.

²³ O ndam onqe no Yaal oxe a yoɗoora a ndeer teeru fee, soo a geenoox took o joong ole garitna no batand.

²⁴ No mbeeñil, Yiif le a gifaxam soo a nomtiidaam Kalde paam no we ƥiseena took o hup doole. Cinj kaaga, mbeeñil ne lal’eema a naaga mes.

²⁵ Maaga, wetandooxaam we ƥis’eena took o hup doole ke o Yaal oxe a feeñil’axama fop.