Heseki’el 10 - NQAARIIT NE ROOG

Roog a dakooxa o feeñoox a Heseki’el

¹ Ɗeetaam too farna fo a qul ale letnoox’ina, a garit a qoox ake no pindel yeeyetax ke took, a jeg’a nand nen ɓil jafeñu laa ne’eena safiir. Me garit’ina a den took a jeg’a kaa saxitna nen uum-maamaad.

² O Yaal oxe a laya o koor oxe rokoox’ina njoor ne yee: «Roki ndeer a saang ake ƭugooxna pindel yeeyetax ke, mayƭandit xa ƥay of a kaagaañ a sumu jip, akaa o xotitkaa no pindel yeeyetax ke soo pasar a den took teeru fee.» Maaga, ga’aam ta rokaa teen.

³ Pindel yeeyetax ke kaa ngeenoox’u na ñamaak Mbind Roog ne, ye o koor oxe a fadiidna, soo eel a muur o maax-kam ole.

⁴ O ndam onqe no Yaal oxe a yoɗoorta took mbindel yeeyetax ne, a sag no peg naa no Mbind Roog ne. Eel le a muura Mbind ne, soo o maax ole a naag dañ fo a qoolaand ale no ndam onqe no Yaal oxe.

⁵ Fangax le na nafir ake no pindel yeeyetax ke a nannooxa boo no maax-tafil olaa, a nandtaa o ñuxur ole Roog o Yaal katil yaa ta jibaa.

⁶ Maaga, o Yaal oxe a hebla o koor oxe rokoox’ina njoor ne yee: «Xotti fiɗel a ndeer a saang ake, a ndeer pindel yeeyetax ke!» O koor oxeene a reta a geenoox paam a saang ale.

⁷ Maaga, mbindel yeeyetax ne a letna o ɓay um a ndeer pindel yeeyetax ke, farna fo fiɗel le reeƭna a ndeer den. A naqa teen soo a doonin na xa ƥay no xe rokoox’ina njoor ne. Oxeene a jangaan soo a sutoox.

⁸ Kaa saxitna nen o ɓay no kiin a ga’ooge ɗuga a nafir ake no pindel yeeyetax ke.

⁹ Ɗeetaam, too a jeg’a a saang a nahak paam pindel yeeyetax ke, a saang a leng paam mbindel yeeyetax nuu refna, too a saang akeene kaa miric-miricnoogu nen ɓil jafeñu laa ne’eena kirisolit.

¹⁰ No mem den, den nahuk fop nand’u. A saang aluu refna kaa fi’’u nen kaa ref ndeer a saang a lakas.

¹¹ Na xa saax xa nahaq axe den a nqotoogu yaa da ñaaƴaa, too mbiƈaqilooxoogee na ñaaƈ den, yaam muu xoox den a ɓakand’ina, da nqot maaga, too mbiƈaqilooxoogee na ñaaƈ den.

¹² Cer den fop, ndiiñ den, xa ƥay den, a nafir den fo a saang ake, a saang ake no pindel nahik ke, kaa may’u muut fo a kid me widna a den.

¹³ Nanaam ee a saang ake kaa nqoyoogel «a saaqul».

¹⁴ Mbindel nuu refna a jeg’a mukit nahik, fa eetaand fee mukit mbindel yeeyetax a reeƭu, fa ƭikandeer fee mukit no kiin, fa ndadkandeer fee mukit njogoy, fa nahkandeer fee mukit a canjiik.

¹⁵ Maaga, pindel yeeyetax ke a ŋaaya, ndefna ndef ke ga’’uuma paam o xuluɓ olaa Kebaar.

¹⁶ Boo pindel yeeyetax ke a ndetoogna, a saang ake kaa ndetoogu, a ndendaa fa den, too boo da letin’ina a nafir den, ndax da ƭisoor no lanq ke, a saang ake sambroogee fa den.

¹⁷ A ngeenoox’angaa, da ngeenoox, too a ŋaayoogangaa, da ŋaay fa den, yaam yiif le no pindel ke a reeƭa na den.

O ndam onqe no Yaal oxe a sutooxa Mbind Roog ne

¹⁸ O ndam onqe no Yaal oxe a inoora no peg ne no Mbind Roog ne soo a doonook took pindel yeeyetax ke.

¹⁹ Weene a letna a nafir den soo a ƭisoor no lanq ke na kid es ye da ndetaa, a yoon fo a saang ake. O ndam onqe na Roog fee Isra’el a geenooxa no ndokand ne no Mbind ne no Yaal oxe farna fo batand, too took pindel yeeyetax ke a reeƭu, a garit a den took.

²⁰ Den ndeeƭu pindel ke ga’’uuma ɗuga Roog fee Isra’el paam o xuluɓ olaa Kebaar, too andataam ee pindel yeeyetax a ndeeƭu.

²¹ Nuu refna a jeg’a mukit nahik fo a nafir a nahak akaa njeg’ina ɗuga fee kaa saxitna nen xa ƥay no kiin.

²² Mukit ke den kaa nandtoogu deŋ fo ke ga’’uuma paam o xuluɓ olaa Kebaar. Den nand’u caq, too den sax sax a ndeeƭu. Nuu refna kaa ɓeroogu, a jagin mbaambir um.