Heseki’el 1 - NQAARIIT NE ROOG

O Yaal oxe a feeñooxa a Heseki’el

¹ No hiid qarɓeen tadkandeer ole, no ñaal ƥetkandeer ne no nqool o nahkandeer onqe, reeƭaam paam o xuluɓ olaa Kebaar, a ndeer no we ƥis’eena took o hup doole. Asamaan fee a wetooxa, too ga’aam peeñil katu na Roog.

² No ñaal ƥetkandeer ne no nqool onqe, reeƭna no hiid o ɓetkandeer ole o maad Yoyakin a dameena mbaƭ,

³ fa lay fee no Yaal oxe a daawne a Heseki’el fee o ƥiy Buusi fee o saasadax, kam saax laa no Kaakalde we, paam o xuluɓ olaa Kebaar. Maaga mat, o ɓay no Yaal oxe a doonoorit’u took um.

⁴ Ɗeetaam too ga’aam a und a maak a inoortiidaa no ɓemb-roog o janoon, a maƥ garinj laa xa kiiñ a ƥalañtaa, a qoolaand ee dañ me widuuna. A ndeer ee ndeer garinj le, a jeg’a meleƈ laa nandna fo njelem kam fiɗel.

⁵ A ndeer ale itam, pindel nahik kaa o mem den a nandtaa o kiin a mbeeñooga.

⁶ Nuu refna na den a jeg’a mukit nahik fo a nafir a nahak.

⁷ A caf den kaa njof’u pec, soo takir ke na caf ake den a nandtaa takir a caf o xeel, da meleƈaa meleƈ xanjar fa ƥodaxne.

⁸ Pindel nahik ke a njeg’a o ɓay no kiin ɗuga a nafir aluu refna na xa saax xa nahaq axe den. Xa ƥay axeene kaa mbaambir’u na xa saax xa nahaq axe nen mukit ke den fo a nafir den.

⁹ Cat ke na nafir ake den kaa nduqroogu. Pindel ke mbiƈaqilooxoogee yaa da ƥeraa, ndaa oxuu refna kaa ɓeroogu, a haan mbaambir um.

¹⁰ Oxuu refna na den a jeg’a mukit keeke: Mukit no kiin, mukit njogoy no saax o ñamaak, mukit nqoox na janoon fo mukit a canjiik.

¹¹ Mukit den fo a nafir den kaa nqaajoor’u took, oxuu refna a jeg’a a nafir a ƭak akaa nduqroogna fo a ƭak akaa muuroogna cer um.

¹² Oxuu refna na den kaa ɓeroogu, a haan mbaambir um. Kaa ƥeroogu, a sag me Yiif le a xotaa, too mbiƈaqilooxoogee yaa da ƥeraa.

¹³ Pindel keene fop kaa nandtoogu a kaagaañ a sumu jip. Kaa nand’u nen xa cam, soo fiɗel leene a widaa ndeer pindel ke. Fiɗel le kaa pictoogu a qoolaand, soo xa kiiñaand axe a sutooraa no fiɗel leene.

¹⁴ Pindel ke kaa ƈufoogu, a ndetaa, a ngaraa nen ƭuuɗ.

¹⁵ Ye um horooxaa pindel ke, ga’aam paam no xuu refna, mbaambir mukit ke den, a saang a sareet alaa na duqaa a lanq.

¹⁶ O nand ole fo a caqooƭ ale na saang ake kaa miric-miricnoogu nen ɓil jafeñu laa ne’eena kirisolit, too den nahuk fop nand’u. Kaa saxit’u nen aluu refna kaa reeƭu kam a saang a lakas.

¹⁷ Na xa saax xa nahaq axe den a nqotoogu yaa da ƥeraa too mbiƈaqilooxoogee.

¹⁸ A saang ake den kaa mbod’u ne sabab, too den nahuk fop a saang ake den kaa may’u a kid me widna a den fop.

¹⁹ Boo pindel ke a ƥeroogna, a saang ake kaa ƥeroogu denda fa den, too boo pindel ke a yoɗoortoogna a lanq, a saang ake kaa yoɗooxoogu itam.

²⁰ Kaa ndetoogu muu Yiif le a ɓakand’ina a den, soo a saang ake a yoɗooxandoor fa den, yaam Yiif le no pindel ke kaa reeƭu kam a saang ake.

²¹ A ƥeroogangaa, da ƥeraa, a ngeenooxangaa, da ngeenoox, a yoɗoorit’angaa a lanq, da yoɗooxandoor fa den, yaam Yiif le no pindel ke reeƭu reeƭ na saang ake.

²² Me yoorooxna a qoox ake no mbindel nuu refna, a jeg’a a qul alaa letnooxna, a nandtaa asamaan, a mirmirnaa nen galam fo jem.

²³ Ɗuga a qul aleene letnoox’ina, mbindel nuu refna a jeg’a a nafir a ƭak akaa letnooxna pec fo a ƭak a lakas akaa muuroogna cer den.

²⁴ Nanoogaam fangax le na nafir ake den yaa da ƥeroogna, ta nandtaa fangax poofi cegu doole mbaat le no ñuxur no Cegu katil oxe. Fangax combol a reeƭu nen fangax a yaj no xiixire. Boo da ngeenoox’ina, a mbudnooga a nafir ake den.

²⁵ O ñuxur a fangoortooga na qul aleene yooroox’ina a qoox ake den yaa da ngeenoox’ina soo a mbudin a nafir ake den.

²⁶ Me yoorooxna a qul aleene garitna a qoox ake den took, a jeg’a kaa na nandtaa ɓil jafeñu laa ne’eena safiir, a saxit nen uum-maamaad, soo took uum leene, kaa nandna nen o kiin a fod took fee.

²⁷ Ga’ahinaam nandu nen xanjar faa na meleƈaa, a saxit nen fiɗel, a mirmirnaa me widuuna fop. No ke xotitna no ke nandtoogna ndet um boo took fo no ke xotitna no ke nandtoogna ndet um boo a lanq, ga’aam nandu nen fiɗel fo a qoolaand me widuuna.

²⁸ A qoolaand ale wid’uuna kaa nandtoogu ale na ñang-ee-ñang ale refna kam a eel ake na bes a teƥ. Kaa reeƭu a peeñax no ndam onqe no Yaal oxe. Ye ga’uuma keene, deɓooxaam a lanq gung too nanaam o ñuxur no xaa layoogna fa mi.