Hebre 8 - NQAARIIT NE ROOG

Yeesu o saasadax o maak oxe in

¹ Keeke refu ke moƴna o jeg o njiriiñ no ke i layaa: O saasadax o maak o nandu neene i njegu. Oxaa moofa na asamaan, na ñamaak gamb no maad le Roog fee refna katil fee hupna fop.

² Kaa fadnaa calel no saasadax o maak no mbiñ o tedu nqaa, ten refu no Ƭiif ndiindigil naa. Ƭiif neene koy, o Yaal oxe o mat geennun, refee o kiin.

³ O saasadax o maak oxuu refna kaa dodel ndax ta ɓoxotaa ci’it fo sadax mbaambir Roog. Ten taxu, o saasadax o maak oxe in itam a war’u o jeg kaa ta ɓoxotna.

⁴ A maad’angaa o refaa na adna fee, refkoogee o saasadax muk, yaam a jega boo a ƴut saasadax waa na ƥoxotaa ci’it ke ne kebil ke Moyiis a simtituuna.

⁵ Calel ke saasadax weene a mbadnaa, nitaal fo mbelyook no ke refna na asamaan soom a ndefu. Keene a nanda fo ke xew’ina na Moyiis. Ye Moyiis a bugna o geenin ƭiif naa, Roog a layaan ee: «Fi’i o ndang! Fat o fi fop boo ta nand fo samandaal ne lal’oonga took o joong olaa.»

⁶ Ndiiki koy, calel ke Yeesu a roxondeena ngupu ke na den, yaam o ten refu o ndok-a-ndeer onqe no ngiɓoor ne moƴna, too a dalnel took a tegit ake moƴna.

⁷ Boo ngiɓoor eetaand ne a jeg’eerna sik fa leng, yaaga suptitkoogaand fo ƭikandeer.

⁸ Kaa koy, Roog a jega tooñ kaa ta bugna o feedin xeet um, ne ta laytuuna na ƭelem akene yee: «Ñaal key a ngaraa, kaa um dalnatinkaa ngiɓoor nqas fa xeet fee Isra’el, dalnatinin fa fee Yudaa. Keene o mat o Yaal oxe a layu.

⁹ Nandkee koy fo ngiɓoor ne dalin’uuma fo daan den, ye pokuuma a den no ɓay, sut a den no saax laa Misira. Ne da ndamooxeerna no ngiɓoor neene, mi itam xijkiim yaam den. Keene o mat o Yaal oxe a layu.

¹⁰ A doona teen ee: Keeke refu ngiɓoor ne um dalnatinkaa fa xeet fee Isra’el cinj ñaal keene: Xam ɓek kebil es kam a yiif den, bind a den kam a qeeñ den. Xam ref Roog den, da ndefat xeet es.

¹¹ O leng na den soxla’katee o jangnaa o kend um mbaat ta layaa o pog um ee: Andi o Yaal oxe. Yaam fop xan a andaam, no ke xotitna no xe moƴna o neew boo no xe moƴna o maak,

¹² yaam xam waasanit tooñ den, too wetandooxkatiim pakaad den.»

¹³ Boo Roog a laytaa ngiɓoor nqas, kaa soƥ ta nogoyand eetaand ne. Yaam kuu hiidna too a nogoy, took o ñuf a jofu.