Hebre 6 - NQAARIIT NE ROOG

¹ Yaaga boog, fat i nqaƴ a cangin a koƭeer ale jaginna na fa lay fee Kiristaa. Kaam ee fat i suur na cangin ale maak we a ndaawaa, mbañ o ndalnahin a cangin ale na layaa kaa farna no fes a cinj a pi a qonu ke, soo ngimat na Roog.

² Fat i nqaƴ itam a cangin ale no batiise pogreer ke fo na toon ale na xa ƥay axe fo na qontax ale no xon we fo na qaw ale na refkaa boo faw.

³ Fat i njof mbaambir! Keene refu ke i mbi’kaa, Roog a jaɓangaa.

⁴ O leng waagatee o dimle we ndaawna a qoolaand ale Roog boo a ƈut, a ñim ci’it ne Roog, a njeg a las no Yiif Tedu le,

⁵ a nga ne fa lay fee Roog a faaxitna, a and doole fee no Maat ne Roog na garaa

⁶ soo a mbes o ngim den a cinj. Dara waagatee o tax da ndicooxatin boo a mbes pakaad den a cinj, yaam den fa qoox den kaa ndengatinaa o Ƥeenqe Roog na kurwaa soo a mbennooran no ke da mbi’aa.

⁷ Boo andoona yee lanq a nquƥa sap yaam a ndeɓel ne waritna, soo a sax daaƭ laa jegna o njiriiñ no xe xooxuuna, yaaga a ndaawa na barke fee Roog.

⁸ Kaa koy, boo da saxna kiƈ fo qooc, njegkee o njiriiñ o leng. Xan Roog a saloox lanq keene, too mujum-mujum kaa ndoxkeel.

⁹ Kaa koy, nuun we fexuuma, kuu i laytaa layit neene fop oo, i njega a koolax tigi na nuun. I anda yee nuun we ndeefaa a ƭat a cofu le, refna ale na ɓisaa na muc ale.

¹⁰ Roog jofaƭaree. Weeckee calel ke nuun muk fo o mbeq onqe nu lalitna no gon um ye nu ndimle’aa fog gimu we nuun, too maad o mbi’an boo ndiik.

¹¹ Kaa koy, i mbuga oxuu refna na nuun a lalit o jaflax ole nu njeg’ina boo no muukandoong naa, ndax yaakaar nuun a dey sik.

¹² I mbugee nu tayil, ndaa fat nu laalaa we ngimna na Roog, too a muñ, yaam kaa ndaawaa ke Roog a regitna.

Ndegit mbooru ne Roog

¹³ Ye Roog a cooxaa a Abraham a tegit ale, a yoonandit’aan a taaƥ. Ne ta jeg’eerna o lakas oxaa hupuuna, too ta war’un o daaɓoox, a daaɓoorta a xoox um.

¹⁴ A laya yee: «Mexe gaañtan a xoox es ee xam barke’ong, too xam fi xa taan of a siw.»

¹⁵ Abraham a cungooga fo o muñ, too neene a daawa ke Roog a regit’ina.

¹⁶ Boo wiin we a ndaaɓooxaa, kaa mbi’an no gon no xaa hupna a den, too keene a naaga o laltaa yee ñimatir den a ɗega.

¹⁷ Roog kaa bug o lalit a qool qac ee supitkee muk ke ta hebooxna boo a ƴut, a fi’anin we mbar’ina o ndaaw paax ke ndegteena. Ten taxu ta ɓaat a taaƥ na tegit ale.

¹⁸ A jega boog a pi a ƭak akaa mbaagaandeena o supit, too na pi akeene Roog waagee o maaɓ teen muk. Neene, in we njegna ndaɗand no ten, kaa i saƭakineel tigi, ndax i pok ta xiis yaakaar ne i ndegeena.

¹⁹ Yaakaar neene kaa ref na in nen o iloor olaa na harnaa a kaal. Neene, yaakaar ne kaa woornaa, too a saƭkinaa xeeñ in, yaam kaa humnel kaltaa mbaƴ naa fegna o mbiñ onqaa moƴna o ted no Mbind Roog aa-asamaan naa.

²⁰ Yeesu eetu o rok a in maaga, too in sax a rokanu nen o saasadax o maak oxaa na refkaa boo faw ne ta ɗaapit’eena na Melkisedek.