Hebre 5 - NQAARIIT NE ROOG

¹ O saasadax o maak oxuu refna kaa jilel a ndeer no wiin we, ndax ta refan wiin we no calel ke Roog, a waag o ɓoxotaa ci’it ke fo sadax ke yaam pakaad ke.

² O saasadax oxeene koy kaa hees. Ten taxu a waaga o muñanaa we na njuumaa yaam a ñak-o-and.

³ Ne ta heesna ten fa xoox um, a wara o ɓoxotaa sadax. Refee soom yaam pakaad ke na xeet fee, ndaa yaam pakaad um itam.

⁴ O leng waagee o dod a xoox um o saasadax o maak. Yaa Roog a xoyoonga soom waagano o ref, ne ta refit’ina na Aaroon.

⁵ Neene itam, Kiristaa fee fi’ee a xoox um o saasadax o maak. Kaa koy, Roog fa xoox um layun ee: «Wo refu o Ƥees, xaye mi rimong.»

⁶ A laya o mbiñ o lakas itam ee: «Xan o ref o saasadax boo faw ne ta ɗaapit’eena na Melkisedek.»

⁷ Kam o ñoow um na adna fee, Kiristaa kaa xeɗoogu a Roog fee waag’uuna o mucil na fa nqon, a yoonandtin xa iin fo xa kooniit. Roog a jaɓa a qeƭ um, yaam ne ta ɓoxotoox’ina no ten.

⁸ Ke ta refna ref o Ƥeenqe Roog fop oo, yaqanee ta aqatoox o nanan a Roog, a reefandin no coono ke ta gomna.

⁹ Neene a ñaktu sik, boo a refat a cur a muc a pagkeer ale no we nananuuna fop.

¹⁰ Roog a yegnita yee o saasadax o maak a refu ne ta ɗaapit’eena na Melkisedek.

Fat i saƭik no ngim onqe

¹¹ A jega mayu kaa i mbarna o lay no kaa farna no keene, ndaa a ɗoma lool ndax i tektin a nuun, yaam kaa nu niidat o and.

¹² Nu mbar’ata o miñ o ndef jaajangin yaaga. Kaa koy, boo fa ndiik nu soxla’a o njangnel ke eetna na fa lay fee Roog. Nu ngatlafulee ñaamel meɗu. Ten taxu nu soxla’a o numaa fo ɗeen.

¹³ Oxe maadna o ñoowtaa fo ɗeen koy, o njaaƈ soom a refu, ten oxe andafuleerna ke jofna fo ke jofeerna.

¹⁴ Ñaamel meɗu ke o mat, maak we njegun, ta ref we naaɓna a yiif den, ndax da mbaag o njektirand ke faaxna fo ke faaxeerna.