Hebre 3 - NQAARIIT NE ROOG

Yeesu hupu a Moyiis

¹ Ten taxu, nuun o fog ole no tedu we, nuun we Roog a xoyna, ƭeetyo na Yeesu fee Roog a luliidna, ndax ta ref o saasadax o maak no ngim onqe i mbeejlaa.

² A Pind a Tedu ke kaa lay ee Moyiis a gore’’a no ke ta roxond’eena no mbind ne Roog. Neene itam Yeesu a gore’a nen o ten, ye Roog a roxonduuna a toq aleene.

³ Oxe na tabaxaa mbind moƴu ɓoxoteel tedaanga ee mbind ne fa xoox um. Neene itam o ndam onqaa hupna onqe Moyiis jombee a Yeesu.

⁴ Mbind nuu ga’oona, o kiin jalun. Neene itam kuu ga’oona, Roog sakun.

⁵ Moyiis fa xoox um a gore’a kam mbind ne Roog fop nen o paɗ Roog oxaa gadin’eena o layanan.

⁶ Kiristaa koy, kaa gore’’u nen o Ƥiy onqaa dooneena kelfa no mbind ne Roog. In o mat ndefu mbind um, yaa i njegna a koolax a saƭku, too njeg o ɗaay no ke i yaakaaraa.

A ñootnax ale mboƥ ne Roog a ngeekaneena

⁷ Ten taxu, ndeefyo keeke Yiif Tedu le a layna: «Xaye fee xaye, nu nanangaa o ñuxur ole Roog,

⁸ ba nu ŋaj nen a koom alaa nu siiknoorna fo ten, ta ref ñaal ne nu ƭeetlooxooguuna kam a koƥ-a-ƥor alaa.

⁹ Maaga, daan nuun a mbogaxam, a ƭeetlooxaam, ke da nga’’ina ke fi’ooguuma fop oo boo xa kiid qarɓeen nahik.

¹⁰ Ten taxu um fuuxan’u wiin weene, too lay’aam ee: ‹A qalaat den kaa mo’andaa a den kili. Weene wiin mosee o and a ƭat es.›

¹¹ Kam fuux es daaɓooxaam ee: ‹Ndokkee muk me da ñootnooritkoogna fa mi!› »

¹² Fog we, mbootooxyo yaam ndik o leng na nuun a saq xeeñ faaxaƭaru mbaat ngimaƭar naa taxna ta fes a Roog fa ñoow jok fee a cinj.

¹³ Baa ref naaga! Saƭakiniryo kili boo na «xaye» fee Roog a ne’uuna, yaam ndik bakaad a nax o leng na nuun boo ta ŋaj.

¹⁴ Mee ndax fog Kiristaa i ndefu, yaa i saaƭooxna boo no muukandoong naa na koolax ale i njeg’ina no mberaand naa.

¹⁵ A Pind a Tedu ke a laya a qool qac ee: «Xaye fee xaye, nu nanangaa o ñuxur ole Roog, ba nu ŋaj nen a koom alaa nu siiknoorna fo ten.»

¹⁶ Aniin ndefu we nan’ina o ñuxur ole Roog, too a siiknoor fo ten? Ndax kaa ndefee waa Moyiis a sutit’ina Misira fop?

¹⁷ Aniin Roog a fuuxan’u boo xa kiid qarɓeen nahik? Mee ndax den ndefu we mbakaad’ina boo xa tal den a yoq kam a koƥ-a-ƥor alaa?

¹⁸ Aniin Roog a ne’oogu ye ta daaɓooxna yee: «Ndokkee muk me da ñootnooritkoogna fa mi!» Ndax kaa ndefee we mbañ’uuna o nanan?

¹⁹ Ten taxu i nga’a yee njeg’ee a ñootnax aleene yaam ngimaƭar den.