Hebre 13 - NQAARIIT NE ROOG

Ne o kiin a waagna o felit a Roog

¹ Ngenyo no mbexraa a ndeer nuun nen waa ndefna fog na Kiristaa!

² Ba nu mbeecit muk ee, nu mbara o ndalnaa we na ngaraa me nuun. Leng-leng we mbesoorna neene, a ndalna malaaka sax too andiran.

³ Nqalaatyo we ƥekeena kaso, nen kaa nu ndamel fa den. Kaam ee mbetandooxyo we na ñagadileel, nen kaa nu ñagadileel fa den.

⁴ Fat fop a niw ndolnir ne, we ngiɓoorna no ndolnir ne a njeg ngor a ndeer den, yaam xan Roog a hate a cuut ake fo we na seeqaa.

⁵ Baa o ñoow nuun a haan na baaƭ xaaliis soom. Ndamyo no ke nu njegna rek, yaam Roog kaa lay ee: «Xaƴkiroong muk too deɓkiroong»

⁶ Ten taxu i mbaag o lay fo a koolax ee: «O Yaal oxe refu oxe na ƴufgiidaxam, saɗariim dara. Xar o kiin a waagankaxam?»

⁷ Mbetandooxyo wiin waa ƭoxoogna a nuun yaaga, a yegnaa a nuun fa lay fee Roog. Ngorooxyo o ñoowooƭ den, ƭeet ne da nqonitna. Kaam ee fat o ngim nuun a laal onqe da njeg’ina.

⁸ Yeesu Kiristaa o leng kut oo: Ten refu oxe faak, a ref oxe xaye, too ten na refkaa boo kili.

⁹ Ba nu ndeɓ a qoox nuun, boo mo’noorel na cangin a pogreer akaa o leng a andeerna. Ke jegna o njiriiñ kañ refu nu saƭakinit a qeeñ nuun yirmande Roog. Keene waree o inoor muk no ɓaalaa kebil kaa njaginna no ñaamel. We na mbadnaa kebil keene, kasaara soom a njegitkaa teen.

¹⁰ A jega sadax kaa saasadax we na njalaa no sadaxand ole in a njegeerna sañ-sañ o ñaam a den.

¹¹ O saasadax o maak no Yaawuur we kaa ɓisoogu fo’oy muumeen kam o Mbiñ onqe moƴna o ted, a ɓoxotin nen sadax fa mbaasnoor pakaad. Xa pimb axe no muumeen ke koy, kaa ndoxoogel tafil saŋe ne.

¹² Ten taxu Yeesu a xonit’u tafil teeru faa, ndax ta tedlandit xeet fee fo’oy um.

¹³ Fat i njagin farna fo ten boog, ndet kaltaa saŋe ne, ndax i ndoxondoox toroxand leng kut ke ndaaw’uuna.

¹⁴ Kaa i mbaaƭaa ngenand ne na garaa, yaam ngenand in na adna feeke miñkee.

¹⁵ Na pexey Yeesu, fat i ngen no simataa a Roog, ta ref nen sadax in. Kaam ee, fat i ngen no simattan xa ton in.

¹⁶ Ba nu mbeecit muk o mbi’aa ke faaxna, ndimle’raa a ndeer nuun. Sadax nandu neene ndefu ke mbelna a Roog.

¹⁷ Nananyo we na ƭoxaa a nuun, neewandoox mbaambir den, yaam kaa ndef waa na ngaynaakaa xa laaw nuun kili. Weene xan a njangtoox a Roog ke da njalna. Boo nu nananaa a den, xan a mbadin calel den fo o ɗaay. Keene a jegangee koy, xan a mbadnitin naqad, ta ref kasaara na nuun.

¹⁸ Ngenyo no nqeɗanaa a in boog! A woora a in ee i njega yiif dalu, yaam i mbuga o mbi ke jofna no kuu ta refna.

¹⁹ Mi fa xoox es koy, kaam bug nu nqeɗanaam ndax Roog a ci’aam o wooƥ olaa taxna um ñof o nomtooxiid paam nuun.

A qeƭ

^20-21 Roog a xontooxnoora o Yaal in Yeesu a ndeer no xon we. O ten refu o kaynaak o maak oxe na gayaa paal um, yaam ne ta ɓoxotooxna nen sadax na pexey fo’oy um. Fo’oy leene o mat sinju ngiɓoor mbooru ne faafkeerna. Yaasam Roog fee mayna fa jam a ci a nuun doole faa nu mbi’taa paax, ndax nu mbadin ke ta bugna. Yaasam ta fi na in ke feluuna na pexey Yeesu Kiristaa. Kaam ee, yaasam o Yaal oxe Yeesu a ɓoxotel o ndam boo faw. Amiini.

Simin ne

²² Fog we, kaam xeɗaa a nuun keeke: Nan-gilooxyo fo o muñ a ƭelem akeeke na saƭkinaa, yaam ke binduuma a nuun no leetar oleeke jaakee.

²³ Kaam bug nu and ee o pog in Timote a sute kaso. A teelangaa o gat, xam yooniid fo ten, ɗeetiid a nuun.

²⁴ Fat nu simnanaam we na ƭoxaa a nuun fop, simin itam we mbogna na xeet fee Roog fop. Fog we ngenna kam saax laa Itali, owe simnaa a nuun itam.

²⁵ Yaasam yirmande Roog a ref fa nuun, nuun fop.