Hebre 10 - NQAARIIT NE ROOG

¹ Kebil ke Moyiis kaa ndef mbelyook no paax ke na ngaraa. Ndefee nitaal tigi no tiindigil ke. Ten taxu, na pexey sadax leng kut ke na ƥoxoteel a Roog o hiid oo hiid, kebil ke mbaagee o tax muk we na mattiidaa a Roog neene a ñak sik.

² Boo we na mbaɗoortaa a Roog neene a nqooland’eena jaf leng kut, yaaga nqalaatkoogatee a qaw ale no pakaad ke, too sadax lakas ƥoxotkoogataand.

³ Kaa koy, no ndigil, sadax keene kaa mbetandaa wiin we pakaad den o hiid oluu refna,

⁴ yaam a woora yee fo’oy le no qoox ke fo le na suk paal ake, waagee o forit pakaad ke muk.

⁵ Ten taxu ye Kiristaa a fudooxiidaa na adna, a laya a Roog ee: «Bugiro sadax muumeen mbaat ci’it no kuu ta waagna o ref, ndaa fi’anaxamo njer.

⁶ Sadax toxel ke mbaat sadax fa mbaasnoor pakaad ke, dara teen felirang.

⁷ Ten taxu um lay ee: Wo Roog, mexey! Kaam gar, ndax um fadin ke bugoona, ta fodir fo ke bindeena na mi kam safe le no kebil ke.»

⁸ Kaa eet o lay teen ee: «Wo Roog bugiro sadax muumeen ke mbaat ci’it ke mbaat sadax toxel mbaat sadax fa mbaasnoor pakaad ke, dara teen felirang.» Yaqanee toox de, sadax keene kaa ƥoxoteel ne kebil ke a simtituuna.

⁹ Cinj kaaga, a doona teen ee: «Wo Roog, mexey! Kaam gar, ndax um fadin ke bugoona.» Naaga, Roog a dalfooxa o ñuf sadax eetaand ke fop, soo a sofit a den sadax fee Kiristaa.

¹⁰ Yaam ne Yeesu Kiristaa a fadinna ke Roog a bugna, i nqoolande no pakaad ke in na pexey njer um ne ta ɓoxotna nen sadax jaf leng kut.

¹¹ Ñaal oo ñaal o saasadax oxuu refna kaa geenooxaa yaa ta fadnaa calel um. Kaa gen no ɓoxotaa sadax leng kut ke mbaageerna o mborit pakaad boo muk.

¹² Kiristaa o mat, jaf leng kut a sadaxtu yaam pakaad ke. Sadax feene koy boo faw a refkaa. Cinj kaaga, a reta a moof na ñamaak Roog.

¹³ Ndiiki koy, oxaa maaga a cungaa boo yaa Roog a fi’kaa fañ we ten nen o dakand yoora a caf um.

¹⁴ Neene, na pexey sadax fa leng kut, a fi’a boo we nqoolandeena no pakaad den a ñak sik boo faw.

¹⁵ Yiif Tedu le a woornaan a in itam. Kaa eet o yegnit ee:

¹⁶ «Keeke refu ngiɓoor ne um dalnatinkaa fa den cinj ñaal keene. Xam ɓek kebil es kam a yiif den, bind a den kam a qeeñ den. Keene o mat o Yaal oxe a layu.»

¹⁷ A doona teen ee: «Wetandooxkatiim pakaad den fo tooñ den muk.»

¹⁸ Muu a baasan pakaad a jegitna, sadax fa mbaasnoor pakaad jegkatee.

Fat i matiid a Roog

¹⁹ Neene boog fog we, i njegata sañ-sañ faa i ndokitna no mbiñ onqe moƴna o ted na pexey fo’oy le Yeesu sadaxteena.

²⁰ Yeesu a wetanta a in no mbaƴ maak naa a ƭat a qas alaa na ñoownaa, a reefandin no cer um.

²¹ I njega o saasadax o maak oxaa dooneena kelfa fee no mbind ne Roog.

²² Yaaga boog, fat i matiid a Roog fo xeeñ letu fo o ngim o mayu muut fo a koolax, yaam xeeñ in a xoola qac no fop ke na ɓisiidaa yiif jeejooxu, too cer in a ƥogte foofi fo jegee sik.

²³ Yaakaar ne i layaa yee i njegaan, fat i ndamin ta saƭik boog, yaam a woora yee xan Roog a fadin ke ta regitna.

²⁴ Fat i yetooraa, saƭakinraa, ndax i moƴ o mbexir, mbi’aa a pi a paax.

²⁵ Ba i ñak o mbokatooraa fo we ngimna, ne leng-leng a meruuna o mbi’taa. Kaa i mbar o saƭakinraa a ndeer in kañ, moƴin o mbi’aa, yaam ne nu nga’oodna bes fee no Yaal oxe ta matiidaa.

²⁶ Boo andoona koy ee i ndiya o mbakaadaa, a cinj yaa i andna ndigil ne Roog, jegkatee sadax fa leng faa waagna o forit pakaad ke.

²⁷ Diid soom i yoqɗe, yaa andoona yee kaa i cungaa ke na xewkaa, ta ref hate fee fa fiɗel fo saasu le na duguñkaa fañ we Roog.

²⁸ O kiin oxuu ɗapna kebil ke Moyiis, boo wiin ɗik mbaat daduk a seede’in, xan a warel, too yirimkaand.

²⁹ Yaaga koy, nam a refitkaa no xe niwaƭarna o Ƥeenqe Roog, a xeef fo’oy le no ngiɓoor ne ta xoolandteena, soo a wenaa Yiif le saqna yirmande? Nu mbaaga o nqalaat a paax ee a qaw ale heluuna na moƴkaa o ɗom,

³⁰ yaam i anda oxe layna yee: «Mi ndabdinax a helu, too mi na rabidkaa.» A doona teen ee: «O Yaal oxe xan a hate xeet um.»

³¹ Ndaw sabab yaa o kiin a yenna na xa ƥay Roog fa ñoow jok fee!

³² Mbetandooxyo ñaal eetaand ke nuun! Ye nu sogna o ndaaw a qoolaand ale, kaa nu njimboox’u na ñox a maak a ƭomu, yoonandtin o muñ.

³³ Leek-leek kaa nu mbenoogel, soo ñagadileel mbaambir no wiin we, leek-leek nu yoon fo we ngadnoogeena nandu neene.

³⁴ No ndigil, nu njeg’a yirmande no we ndameena kaso. Ye kalal ke nuun a njangeena itam, nu njaɓ’a o ñak a den no fud o letu. Nu and’a yee nu njega halal faa moƴna, too a refkaa boo faw.

³⁵ Ba nu ndeɓ a cinj boog njambaar ne nu njegna. A jega ndabid maak naa ta geekaneena.

³⁶ Kaa nu mbar o saƭik kañ, ndax nu mbadin o bug ole Roog soo mbaag o ndaaw ke ta regitna,

³⁷ yaam a Pind a Tedu ke a laya yee: «Ndeer mene fo a pe a miñeer, oxe warna o gar xan a gar, too gulooxkee muk.

³⁸ Neene koy, oxuu ɗeetuuma nen o cofu, xan a ñoow na pexey o ngim um. Kaa koy, a nomtooxangaa a cinj, sawarkatiim no ten.»

³⁹ In koy, i mbogee no we na nomtooxaa a cinj soo a mo, ndaa no we njegna o ngim onqaa mucilna a den i mbogu.