Habakuk 2 - NQAARIIT NE ROOG

¹ Kaam bug o fod no yetooxand es, naag jiŋ took saŋe ne nen o koohorax, ndax um and ke o Yaal oxe a laykaxam fo ke ta doonkaa no ƭomatax es.

O doonanqol ole Roog: Jofu we xan a muc

² O Yaal oxe a doonaxam ee: «Bindi mbeeñil nene, sexin took a alfa ƥil, ndax ta yooɓel o jang.

³ Waxtu fee mbeeñil neene a fadnooxkaa fadafulee. Waxtu fee oxey mbaambir too ñakkee o gar. A ñaalange sax oo, fat nu cungin, yaam a woora kañ ee xan a gar too gulooxkee muk.

⁴ Xeet feene kaa magnandoox too njofee. Kaa koy, o cofu xe xan a ñoow, yaam ne ta gimna na Roog.»

Ke layeena no ñaañagadil we

⁵ «Halal kaa hodaa, too o magnandooxu xe miñkee meen, ten fee ɗaayna o don boo ta sis nen a jaaniif, ten fee deyƭooxkeerna muk nen fa nqon fee, a fokatanooxaa a saax ake, a koltirandaa qeet ke fop paam um.»

A salax a ƥetak ake

⁶ «Kaa koy, xan qeet keene fop a naxooxaa a den, a nqaadnoortaa a den o feƭit ee: ‹Sabab took no xe na fokatanooxaa kalal kaa ta jegeerna, a geeraa kaasnit! Ndi neene boo a mban?

⁷ Ndax raarawnit we wo inooxkee ndak fo ndak, tootoroxand we wo a ndal took of, o refat muud den?

⁸ Ne jangaloona qeet mayu, xan ke yoqna no qeet ke a njangalong, yaam fo’oy le no wiin we ɓaxoona fo a pi a yednu ke fi’oona na saax ake, kam teeru ke fo we ngenna a den fop.›

⁹ Sabab took no xe na fokatanaa mbind um halal fa leweer, a fi ngenand um took-ee-took, ndax ta daɗ taamaala kuu ndefna!

¹⁰ Ke fexeyoona gaci’andu mbind of. Ne saŋkoona qeet mayu, xoox of sax sax yaqo.

¹¹ Ɓil le sax kaa looloortang no tabax ne, soo a teex ake no bomb le a njaaɓanin.

¹² Sabab took no xe na maxtaa teeru fo’oy, a sinjit dik fee njofaƭar!

¹³ Qeet ke kaa nqijaa yaam fiɗel, a saax ake a coono’aa no kaa o leng a andeerna. Ndax keene inooree no Yaal oxe Hupna fop?

¹⁴ Xan lanq ke a may fo o and o ndam onqe no Yaal oxe ne poofi ke a muuritna duf le no maag ole.

¹⁵ Sabab took no xe na yernooraa o kend um biiñ fee no ndog onqe no fuux le ten, ndax ta waynoorin boo a waag o xeefnoorin yaam ta yoq o ƥor!

¹⁶ Maykiro fo o ndam, ndaa xan o naag ɓot yaam gaci. Wo fa xoox of, xan o yer itam soo xeefnoorel yaam o yoq o ƥor! O feeƭ ole no fuux le no Yaal oxe refna na ñamaak um xan a geleeroox farna fa wo, soo o niwaƭarel a muur o ndam of.

¹⁷ A ƭom-yedar ake fi’oona a Libaŋ xan a yen took of. Salaxaa muumeen ke, ten taxu xan a ndiidlandong. Keene fop xan a dalong yaam fo’oy le no wiin we ɓaxoona fo a pi a yednu ke fi’oona kam a saax ake, kam teeru ke fo we ngenna a den.

¹⁸ Xar nitaal roog sexe a ɗaxu? O seesex doŋ sexun. Xar nitaal njawne a ɗaxu? Xa toonanqol um xa maaƥ oo. Nam o seesex a waagu boog o gaɗit a xoox um no ke ta sexna, na roog faa ta fi’oodna, too waagee fa lay?

¹⁹ Sabab took no xe na layaa a teex ale yee: ‹Inooxi!› a lay ɓil yo’nukeer le yee: ‹Yokooxi!› Ndax a mbaaga o mbeeñil tig? Kaa soorel wurus fa xaaliis, ndaa o ñoow refee na den muk.

²⁰ Kaa koy, o Yaal oxe xey no Mbind tedu ne ten. Fat adna fa muum a naang cel mbaambir um!»