Habakuk 1 - NQAARIIT NE ROOG

¹ Keeke refu ke o tuleer Habakuk a feeñleena.

Ƭomatax ne no tuleer oxe

² O Yaal oxe, kaam bugko ƴufginooxang boo a mban, soo o fañaam o nan-giloox? Kaam bugko faɗooxaa yee: «A ƭom-yedar oo!» boo a mban, soo o fañ o ƴufig?

³ Xar taxu o ga’nooraxam paaxeer ke soo fuudaa njofaƭar ne? Toroxand fo a ƭom-yedar soom um ga’aa, qasir ƥor fo ñimatir a ndef me widaxama.

⁴ Kebil ke niwataand, a ƭat reefataand o ndus, soxodu we a ƥuraa jofu we, soo o cofel a naɗeel.

O doonanqol ole Roog: Song ne no Baababilon we

⁵ O Yaal oxe a doona yee: «Ndeɓyo a kid farna fo qeet ke too ƭeet! Njaaxiɗyo too njomi, yaam xam fi no ñoow nuun a pi alaa andoona yee nu mbetandoox’ange o ten, nu ngimkiran.

⁶ Mi, xam riñ Kaakalde we, da ngariid, xeet feene neegna too a ñak yirmande, a maƥaa a saax ake, a jaɓaa kenand kaa ta jegeerna.

⁷ Kaa saɗarnoox too a mbitnoox. Ke jofooxna a den soom a mbi’aa, ndigil a qoox den a dey a den.

⁸ Pis ke den moƴu ñof o ƴaxal, a moƴ o ƈaxooxaa a teeteem na kid-a-caɓru. Pis ŋaaye ke den kaa mbaaslooxaa, a inoortiid koƭu, a yetaa nen a canjiik alaa waaslooxanna mbuufuɗag um.

⁹ Xeet fene fop kaa ngaraa ndax da njangal, mbooyo sumu a adooxan a den, faɗ we da ndamna a mayit nen pep lanq.

¹⁰ Kaa da nqaadnooxaa maad we, gelwaar we a ndef calat den. Kaa ƭeq-ƭeqnaa saŋe nuu refna, a njuumaa a uum lanq a songir paam um soo a njaɓin.

¹¹ Cinj kaaga, kaa da mbaaslooxaa nen a und, a ñofandooxanaa o mbi’ahin paaxeer, doole den a ref roog den.»

O tuleer oxe a ɓaata o ɗomatoox

¹² O Yaal oxe Roog es, o Tedu xe mi, ndax refiro, yaa leng a andeerna, wo fee xonkeerna! Cey, o Yaal oxe, dalnaa Kaakalde we, ndax da mbadin kate of took in! Wo fee refna ɓil saƭku le, sutiidaa a den, ndax da nqaw a in.

¹³ A kid of kaa nqoolood lool boo mbaagee nga’aa paaxeer, too waagiro gen no ɗeetaa njofaƭar ne. Xar na taxkaa boog o fuudaa hoohod weene, maar o don of, yaa o soxodu xe a saŋkaa oxe moƴuuna o jof?

¹⁴ Xar taxu o fi’aa wiin we nen liƥ ke no maag ole, nen ƥood ke njegeerna o yaal?

¹⁵ Kaakalde we kaa ndamaa wiin, ne liƥ a ndamteel no jaar, a qicaa a den fo mbaal, a mbokataa a den no mbanguuñ. Keene na felakinaa a den, a ɗaaynooraa a den.

¹⁶ Kaa ƥoxotaa paal ke den sadax, a ndoxanaa panguuñ ke den cuuraay, yaam na pexey den mbaƥ den a rooftu, soo ñaamel den a naang gañ.

¹⁷ Ndax kaa ngenkaa no mboosaa laƥ den, a nqirsaa qeet ke, a mbañ o yirim a den?