Haahate we 9 - NQAARIIT NE ROOG

Abimelek a refata o maad kam Sikeem.

¹ Abimelek fee o ƥiy Yerubaal a reta Sikeem, ndax ta ga’ir fa tokoorumiin fo mbind faap ya um fop. A laya a den ee:

² «Ngela ndetyo lay fo kelfa ke Sikeem kene: ‹Xar moƴanu a nuun, goor qarɓeen ɓetuu ƭik waa ndefna den fop xa ƥiy Yerubaal a maadooxan a nuun, ndi o koor o leng soom? Kaa rek, mbetandooxyo yee fo’oy fo leng kut ole na ƴufaa no cer nuun, na ƴufaa no cer es.› »

³ Tokoor ke Abimelek a njangtooxanaan a ƭelem akaaga me no kelfa ke Sikeem, too weene a ngebooxaan o ci a caf, yaam a layoogu yee: «O pog in oo.»

⁴ A cooxa a Abimelek xa monjong qarɓeen ɓetuu ƭik xaaliis fa nqoolu axaa da nqotitna no juurand ole Baal-Berit. Abimelek a rabdita xaaliis faaga wiin jaree tus we fo we na njoqooyooxaa, ndax da ndeefin.

⁵ Abimelek a gara Ofra no mbind faap um soo a warit fog faap we ten ndefna xa ƥiy xa koor qarɓeen ɓetuu ƭik axe Yerubaal no ɓil leng kut. Yotaam fee moƴ’ina ref o njaaƈ na xa ƥiy axe Yerubaal soom daɗ’u, yaam kaa ɗas’u.

⁶ Kelfa ke Sikeem fo we ngenna Bet-Milo fop a mbokatoora, a ndod a Abimelek o maad paam ngariñ naa reeƭna denda fo ɓil laa sipeena Sikeem.

A naxax ale Yotaam

⁷ Yotaam a yegne kaaga. A reta a ŋaay no jul olaa no joong olaa Garisim soo a falalooxaa yee: «Nuun kelfa ke Sikeem nan-gilooxaamoo, ndax Roog a nan-giloox a nuun!

⁸ Taxar ke moof’u moof meen boo a ndodkaa o maad. A laya ndaxar oliiw ne yee: ‹Maadooxani a in!›

⁹ Kaa koy, ndaxar oliiw ne a doona a den ee: ‹Ndax xam xaƴ diwliin fee na niwteel roog ke fo wiin we soo yaandooxaa took taxar ke?›

¹⁰ Maaga, taxar ke a laya ndun ne yee: ‹Wo o mat, gari maadooxan a in!›

¹¹ Kaa koy, ndun ne a doona a den ee: ‹Ndax xam xaƴ o pelel ole mi fo xa tim xa paaxaan axe mi soo yaandooxaa took taxar ke?›

¹² Maaga, taxar ke a laya ndaxar biiñ ne yee: ‹Wo o mat, gari maadooxan a in!›

¹³ Kaa koy, ndaxar biiñ ne a doona a den ee: ‹Ndax xam xaƴ biiñ fee mi na ɗaaynooraa roog ke fo wiin we soo yaandooxaa took taxar ke?›

¹⁴ Maaga, taxar ke fop a laya ngol ne jegna kiƈ ee: ‹Wo o mat, gari maadooxan a in!›

¹⁵ Maaga, ngol ne jegna kiƈ a doona a den ee: ‹A soƥangaa no ndigil ee mi nu mbugu o ndod o maad nuun, ngaryo njaɓnoox no yook es! A reftangee naaga, xan fiɗel a sutoor no ngol ne jegna kiƈ soo a raaɓ taxar seedar ke Libaŋ.› »

¹⁶ Yotaam a ɓaata teen ee: «Ndiiki koy, ndax no ndigil fo na ƭat nu ndodu a Abimelek o maad? Ndax nu mbesoora fa Yerubaal fo mbind um ne waritna? Ndax nu ndabdaan paax ke ta fi’anna a nuun?

¹⁷ Yaag oo toox de faap es ñoxoranu a nuun, a suƭ o ñis um ndax ta wat a nuun na xa ƥay no Maamajan we.

¹⁸ Ndiiki koy, kaa nu inooxan mbind faap es, mbarit xa ƥiy xa koor qarɓeen ɓetuu ƭik axe ten no ɓil leng kut soo ndod a Abimelek fee o ƥiy no ceefeer um o maad no kelfa ke Sikeem, yaam ne ta refna o pog nuun.

¹⁹ A soƥangaa boog ee no ndigil fo na ƭat nu mbesooru fa Yerubaal fo mbind um a koom, mbelakinooxyo na Abimelek, soo ten itam ta felakinoox na nuun.

²⁰ Kaa koy, a reftangee naaga, fat fiɗel a sutoor na Abimelek, a raaɓ kelfa ke Sikeem fa Bet-Milo fop, soo fiɗel a sutoor no kelfa ke Sikeem fa Bet-Milo fop, a raaɓ a Abimelek.»

²¹ Yotaam a naaga mes, a ƴuf, a ret Beer soo a genat maaga, maa goƭna a Abimelek fee o maag um.

Wiin we Sikeem a siiknoora fa Abimelek

²² Abimelek a maadooxa kam Isra’el boo xa kiid xa tadaq.

²³ Maaga, Roog a hebliida yiif faaxeer ndeer Abimelek fo kelfa ke Sikeem. Weene a ndalfooxaan o ngod.

²⁴ Keene kaa jeg, ndax paaxeer ke xa ƥiy qarɓeen ɓetuu ƭik axe Yerubaal a mbi’eena a rabdinooxel, soo fo’oy den a yen took Abimelek fee o pog faap den war’ina a den fo took kelfa ke Sikeem ndimle’’uuna, ndax ta war fog faap um.

²⁵ Kelfa ke Sikeem a sima wiin ndax da ƥengin took xa cul axe na xa coong axe, a ƭegaa fop we na ndeefiidaa paam den na ƭat ale. Kaa koy, kaaga a yegne a Abimelek.

²⁶ Gaal fee o ƥiy Ebed a yoona fo goor fog um da ndeef Sikeem, too kelfa ke na teeru fee a ngooloox’aan.

²⁷ A ndeta na koƥ alaa, a ƥoor a ƭing taxar biiñ ake den, a nir xa biiñ axe soo a ndef no mbumbaay. A ndoka no juurand ole roog den, a ñaamaa, a yeraa soo a ndef no salooxaa a Abimelek.

²⁸ Gaal a laya yee: «Xar Abimelek a refu paam Sikeem, bo i ndagooxan? Ndax refee o ƥiy Yerubaal, andum Sebul refee ƭong ne ten? Ndagooxyo kañ xa taan axe Hamoor fee sinjna a Sikeem. Jegee dara kaa helna tax i ndagoox a Abimelek.

²⁹ Cey, giimee rek um doxin’ange xeet feeke, yaaga xam in meen a Abimelek, too laykoogaanum ee: ‹Ɓaati xiixire of soo gar ñoxoriidel.› »

³⁰ Ye Sebul fee reeƭna o yaal teeru faa a yegna ke Gaal fee o ƥiy Ebed a lay’ina, a dalfooxa o fuux.

³¹ A hebla duleer na pet maa Abimelek ndax da layin ee: «Gaal fee o ƥiy Ebed fo goor fog um a mbadiida Sikeem, too owey ƈaxaa we na teeru fee nof, ndax da siiknoor fa wo.

³² Ndiiki koy, reti fo xiixire we wo kam o yeng olene, nu ƥeng kam a koƥ alaa.

³³ O feet nqes, boo njeeƈ ne a wataa, fat o songik teeru fee. Maaga, boo Gaal fo xiixire we ten a sutooxaniidoonga, xan o fi a den ke helna.»

³⁴ Kam o yeng olaaga, Abimelek fo xiixire we ten a ndeta, a ƥeng paam Sikeem, a mbi a yaj a nahak.

³⁵ Gaal fee o ƥiy Ebed a sutooxa, a geenoox no ndokand ne na teeru fee. Maaga, Abimelek fo xiixire we ten a sutoortiida me da ƥeng’ina.

³⁶ Gaal a ga’a a den soo a lay a Sebul ee: «Ga’angi a yaj alaana na mbudoortiidaa na xa cul axe na xa coong axe.» Sebul a doonaan ee: «Pelyook ke na xa coong axe o hamtaa wiin de.»

³⁷ Gaal a weera na: «Ɗeeti, a yaj no wiin o mat na mbudoortiidaa no Ñaang le a ndeer lanq ke, soo a yaj a lakas a gartaa na ƭat ale no Ndaxar maak ne no ɗeet we.»

³⁸ Sebul a doonaan ee: «Ndi taa o mbakax of o mbelu nqe boog, wo fee layoogna yee: ‹Xar Abimelek a refu boo i ndagooxan?› Wiin we salooxoona yoo weene, reti ñoxorik fa den ndiiki.»

³⁹ Maaga, Gaal a adooxana kelfa ke Sikeem, a songik a Abimelek.

⁴⁰ Abimelek a firɓandaan bo ta god o joor, too goor mayu a mbare ye da ngelkaa fo ndaaw ndokand ne na teeru fee.

⁴¹ Abimelek a genka Aruma, soo Sebul o mat a ref no raxaa a Gaal fo goor fog um, mbaagateerna o ngen Sikeem.

⁴² No feet olaa, we ngenna Sikeem a sutooxa, ndax da ndet na koƥ alaa, too Abimelek a yegne o ten.

⁴³ Maaga, a janga a yaj ale ten, a xaaj a den a qaaj a tadak soo a ɓeng kam a koƥ alaa. Yaa ta ga’na xeet fee a sutoortiidaa na teeru faa, a inooxana a den soo a xaw a den.

⁴⁴ Abimelek fo a yaj ale reeƭna fo ten a adooxa a ndet a mbod no ndokand ne na teeru faa, soo a yaj a ƭak a lakas ake o mat a ñof o ndet, a songik fop waa ndeeƭna na koƥ alaa soo a nqaw a den.

⁴⁵ Abimelek a songa teeru fee no ñaal ne fop soo a jaɓin. A wara we ngenoogna taaga, a gefin tuƈ soo a sulin fo jem.

⁴⁶ Ye kelfa ke no taax-took ne Sikeem a yegna kaaga, den fop a njaɓnooka no saŋe naa no faɗoorand ole Baal-Berit.

⁴⁷ Abimelek a yegne yee kelfa ke no taax-took ne Sikeem fop owaa mbokatoora no mbiñ onqaaga.

⁴⁸ Maaga, Abimelek a waaswana o joong olaa Salmon, ten fo a yaj um. A janga ɓaax, a god a naaq ndaxar, a yoɗin soo a gadooxin. Cinj kaaga, a laya we ta yoonitna yee: «Refee nu nga’a ke fi’uuma, ñofyo o mbi nen a mi.»

⁴⁹ Oxuu refna na den a goda a naaq, soo da ndeefan a Abimelek. A ngeƈna a naaq ake no saŋe naa, a ngeƥandin fo we ndeeƭna kam faa fop. Neene, we ngenoogna no taax-took naa Sikeem fop a nqontu, ndeeƭna wiin juni, goor fo rew.

Fa nqon fee Abimelek

⁵⁰ Abimelek a inooxana Tebes, a widin o kurul-keƥ soo a jaɓin.

⁵¹ A jeg’a koy a ndeer teeru fee taax-took saƭku koŋ, maa goor we fo rew we fop fo kelfa ke na teeru fee a njaɓnoox’ina. A mbegooxa soo a ŋaay took jibir faa no taax-took ne.

⁵² Abimelek a gara boo no taax-took naa, a songin soo a matiid begax ne, ndax ta doxin.

⁵³ Maaga, o tew a jooraan ɓil unir no xoox soo a gef ƭuf ne ten.

⁵⁴ Ndak fo ndak, Abimelek a xoya o fes ole saqoogna ƥonax ke ten, a layin ee: «Woosi laƥ of, o pataam, ndax laykaand ee o tew waraxam.» O fes olaa a dibaan, soo Abimelek a xon.

⁵⁵ Ye goor Ii-isra’el we a nga’na yee Abimelek a xona, a ndalfooxa o nomtoox, oxuu refna a xaad no mbind um.

⁵⁶ Neene, Roog a rabda a Abimelek paaxeer ke ta fi’ina a faap um, ye ta warna fog faap qarɓeen ɓetuu ƭik we ten.

⁵⁷ Roog a rabda itam wiin we Sikeem paaxeer ke da mbi’ina. Naaga, a salax ake Yotaam fee o ƥiy Yerubaal a mbadnooxa took den.