Haahate we 5 - NQAARIIT NE ROOG

A kim ale Debora

¹ No ñaal naaga, Debora a xaana a kim aleeke, a yoon fa Barak fee o ƥiy Abinowam:

² Kam Isra’el, oxuu refna a jagandooxana xire, xeet fee a njaɓ o ñoxorel. Ngidmiteenoo o Yaal oxe!

³ Nuun maad we, nan-gilooxyo! Nuun gelwaar we, ndungyo nof nuun! Xam gim, kaam ee xam giman o Yaal oxe. Xam xaanan o Yaal oxe Roog fee Isra’el.

⁴ O Yaal oxe, ye sutooriidoona Seyiir, ye inooriidoona na koƥ alaa Edoom, lanq ke a yo’nooxa, asamaan fee a yuuraa, a eel ake a ndeɓiid foofi.

⁵ Xa coong axe a senda mbaambir no Yaal oxe, boo no le Sinayi sax, mbaambir no Yaal oxe Roog fee Isra’el.

⁶ Na jamaane Samgar fee o ƥiy Anat, na jamaane Ya’el, a ƭat ake kaa mbod’el, ñaañaaƴ we a njaxaa.

⁷ Jeg’atee kelfa, kelfa fa leng jeg’atee kam Isra’el boo neen feeñum, mi Debora, nen a ya Isra’el.

⁸ Xeet fee kaa njil roog qas boo a tax xire a jib. Pegoor leng sax mbaat a salma waag’aand o ga me no goor cuni qarɓeen nahik kam Isra’el.

⁹ Kelfa ke Isra’el owey no xeeñ es, den fo we na xeet fee njagandooxanna xire. Ngidimyo o Yaal oxe!

¹⁰ Nuun we na ŋaayaa xa paam xa tew xa tan, nuun we na moofaa na xa sar, nuun we na ñaaƴaa na ƭat ake, yegniteenoo!

¹¹ Paam palka ke, we na lastaa foofi le owe simataa a pi a paax ake no Yaal oxe, a pi a paax ake ten no kelfa ke Isra’el, ye xeet fee no Yaal oxe a mbodna no tokand ke.

¹² Wo Debora, yokooxi, kaam ee yokooxi! Koo yokooxi, yoɗ a kim! Wo Barak fee o ƥiy Abinowam, inooxi dam mbaƭ we ndam’oonga mbaƭ!

¹³ Maaga, yoqatin we a ndabiida kelfa ke. Xeet fee no Yaal oxe fo a salma-koor ake ten a soƥiidaxam.

¹⁴ We saxatna a paƴ kam Amalek, Efrayim a inooru, Bensame fo a yaj um a ndeef took den, kelfa ke a inoor na qaw ale Makiir, xiixire we a ngat na carind ale Sabulon.

¹⁵ Kelfa ke na carind ale Isakaar a yoona fa Debora, soo a carind ale ten mbarna fa Barak, a ñof o ndabin na xa saawit axaa. A qaw ake Ruben o mat, ñimatir pagkatar a ndeftu.

¹⁶ Xar taxu nu moof ndeer xa siir axe, nan-gilooxaa gaynaak we na mbuuƴaa cegel den? Kaam ee a qaw ake Ruben ñimatir pagkatar a ndeftu.

¹⁷ Gaagalaad we no batand naa Yordaan a yoqu. Xar taxu a carind ale Dan a yoq paam a kaal ake? A carind ale Aseer kaa yoq na ƥeeraamb ale no maag ole, paam baax ke ten.

¹⁸ A carind ale Sabulon fo ale Neftali o mat a njaɓa o suƭ o ñis den kam a mbeel xire laa.

¹⁹ Maad we a ngara, a ndef no ñoxoreel, kaam ee maad we Kanaan a ndefa no ñoxorteel Tanak paam poofi kaa Megido, ndaa koy njaɓtee na xire faa xaaliis.

²⁰ Xa qoor axe a mboda na asamaan a nqire’aa, a nqota a ƭat den, a ndef no ñoxoraa fa Siisera.

²¹ A ƈufnand ale Qiison a maƥa a den, a ƈufnand ale no camaane miñu kaa, a ƈufnand ale Qiison. Wo o laaw es, xoti a ƭat, saq njambaar!

²² Maaga, xa poxos axe no pis ke no fañ we a mbangna ɗuuɗ leng kut, ye ŋaaŋaay den a naangna futuxtux, a njaabnaa a den.

²³ Malaaka fee no Yaal oxe kaa tee: «Salooxyo teeru fee Meroos, kaam ee salooxyo boo faw we ngenna teen, yaam kaa mbañ o ndimle’iid o Yaal oxe, a ndimle’iid o Yaal oxe a ndeer a salma-koor ake.»

²⁴ Ya’el fee o tew Heber, o Keekeni xe, a hela barke’el a ndeer no rew we, a hela barke’el a ndeer no rew molaan we.

²⁵ Siisera a xeɗa foofi, o tew oxe a ci’in fo sis, fo sis olaa jegna fo neew na tokol xew.

²⁶ A xotta o ɓay um o leng o reng, o lakas ole ta kaartin o jibamb ole no taadaaƴ oxe. A daaƴaan a Siisera no yook-nof bo ta suur, a ɓaƈit xoox le, a mokandin nem.

²⁷ A berengooxa na caf Ya’el, a yen, a firkiloox a lanq. A berengooxa na caf um, a yen. Me ta berengooxna, a yen maaga, a xona.

²⁸ Ya Siisera oxe ɗeettaa no falangteer ole, a wootnoortaa no tagar ne, a joytooxaa yee: «Xar taxu a sareet-xire le ten feeñafulee? Xar taxu a sareet-xire ke ten a niidit neeke?»

²⁹ Rew we moƴna njeg o and no yoon we ten a ndoonaan, soo ta jeepeetaa o doonanqol ole den ee:

³⁰ «Ga’na rek xiixire we kaa njangalaa, a nqaajran: O koor oo koor a jeg o njaaƈ o ndew mbaat fo ƭik, Siisera a jeg tikoorik kaa nqaaɗeena, tikoorik kaa nqaaɗeena, a ngemeñel, o cok no xe xawna a widnel tikoorik qaaɗe kaa ngemeñeena.»

³¹ O Yaal oxe, neene fañ of fop a nqontaa, soo we mbexoonga o mat a nand fo njeeƈ naa na wataa a qool qac. Maaga, saax le a reeƭata na jam boo xa kiid qarɓeen nahik.