Haahate we 21 - NQAARIIT NE ROOG

A carind ale Bensame a saqtatina

¹ Goor we Isra’el a ndaaɓoorit’a Mispa yee: «O leng na in ci’itkee o ƥeem o ndew ta dolooxanik o koor na carind ale Bensame.»

² No jaf leeke koy, xeet fee a ngara Betel soo a moof maaga mbaambir Roog boo no kirand naa. Kaa ƭomatooxoogu soo a mbaɗooxaa.

³ Kaa layoogu yee: «O Yaal oxe Roog fee Isra’el, xar taxu boo keeke a dal a Isra’el? Xar taxu boo a carind a leng a mooc na ke Isra’el xaye?»

⁴ No feet olaa, xeet fee a inooxa ƥiiɓ teel, a max maaga o sadaxand soo a ƥoxot sadax toxel fo sadax camsa’oor.

⁵ Cinj kaaga, Ii-isra’el we a laya yee: «Alum na carind ake Isra’el fop gareeru no mbokatax ne mbaambir no Yaal oxe?» Kaa ndaaɓoox’u a qool qac no xuu garkeerna Mispa mbaambir no Yaal oxe, a lay ee: «Xan a warel.»

⁶ Ii-isra’el we kaa yirim’atu fog den Beebensame we, a lay ee: «Xaye a carind a leng a moocande na Isra’el.

⁷ Nam i mbi’kaa boo mbaaƭan onqe yoqna na den rew, yaam kaa i ndaaɓoox’u no Yaal oxe yee i ci’kee a den xa ƥiy xa tew axe in.»

⁸ A laamta yee: «Ndax a jeg’a na carind ake Isra’el a leng alaa gar’eerna Mispa mbaambir no Yaal oxe?» Maaga, a nga’a yee o leng inoorit’ee Yabes kam Galaad, a gar no saŋe ne me mbokatax naa a reeƭna,

⁹ yaam ye xeet fee a lim’eena, o leng no we Yabes kam Galaad reeƭee maaga.

¹⁰ Maaga, we no mbokatax ne a lula took Yabes xiixire cuni xarɓaxay fo xiixire cuni ƭik, a ngebil a den ee: «Ndetyo mbarit we ngenna Yabes kam Galaad laƥ boo no rew we fo xa caaƈ axe.

¹¹ Keeke refu ke nu mbi’kaa: Fat nu mbar goor we fop fo rew we fop andna adna, ndaa fat nu nqaƴ xa caaƈ xa tew axe andafuleerna adna.» Naaga mat a mbi’toogun.

¹² A soƥa Yabes kam Galaad xa caaƈ xa tew teemeed nahik axaa andafuleerna adna, a ƥis a den no saŋe naa Silo kam saax laa Kanaan.

¹³ Cinj kaaga, we no mbokatax ne fop a ngebla duleer, ndax da lay fo Beebensame we njaɓnook’ina no ɓil laa Rimon soo a njamsa’oor fa den.

¹⁴ Beebensame we a nomtooxiida ndak fo ndak. A ci’e rew we nqaƴ’eena a ñoow a ndeer no rew we Yabes kam Galaad, ndaa rew we ndey’ee a den fop.

¹⁵ Xeet fee a yirim’ata Beebensame we, yaam o Yaal oxe kaa fi’’u o gom a ndeer a carind ake Isra’el.

¹⁶ Maak we no mbokatax ne a laya yee: «Nam i mbi’kaa boo mbaaƭan onqe yoqna rew, yaam rew Beebensame we kaa mbar’el.»

¹⁷ A ƥaata teen ee: «Fat we ndaɗna no Beebensame we a mbexeyanel a njeg xa taan, ndax a carind a leng sooƴkee na Isra’el.

¹⁸ Kaa koy, i mbaagee o ci a den xa ƥiy xa tew axe in, yaam i ndaaɓoox’a yee: ‹Oxe na ci’kaa o Peebensame o tew, xan a salooxel.› »

¹⁹ Maaga, a laya yee: «Mee ndax o hiid oluu refna a jega xew fee no Yaal oxe na roofandeel kam Silo fee fodna a Betel no ɓemb-roog o janoon, a garit no batand ne na ƭat ale ndeer Betel fa Sikeem soo a garit a Lebona no ɓemb-roog o ñamaak.»

²⁰ A ngebla Beebensame we yee: «Ndetyo ƥengik na ƭing taxar biiñ akaa.

²¹ Yaa nu nga’kaa xa ƥiy xa tew axe Silo a sutoor na teeru faa, ndax da mbec, fat nu mbaasloor na ƭing ake, oxuu refna na nuun a gif o ƥiy o ndew soo a ɓisin no saax laa no Beebensame we, ndax ta fi’kin o teem.

²² Paap den mbaat jamin den a ƭomatooxiidangaa me in, xan i lay a den ee: ‹Yirimyo a den, yaam i mbaaƭan’ee oxuu refna o tew ye fa xire fee. Refee yee nuun ci’u a den xa ƥiy xa tew axe nuun, yaam a reeƭangaa neen, nuun tooñkoogu.› »

²³ Beebensame we a mbi’a ke da as’eena. Oxuu refna na den a gifa o tew no we mbecoogna, a fi’kin o teem. Cinj kaaga, a ndeta, a nomtoox no fiisel den, a maxatin teeru ke soo a ngen a den.

²⁴ Na waxtu faaga, Ii-isra’el lakas we a inoora maaga, a nqaad oxuu refna na carind um fo na qaw um too a nomtooxa oxuu refna no lam um.

²⁵ Na jamaane faaga, o maad jeg’ee kam Isra’el, too oxuu refna kaa fi’oogu kaa feluuna.