Haahate we 20 - NQAARIIT NE ROOG

Xire fa yarir fee no Beebensame we

¹ Ii-isra’el we fop a mbokatoora, a ndef leng, mbaambir no Yaal oxe kam Mispa. A inoora muu refna, xotitna Dan, no ɓemb-roog o janoon, boo Beer-Seeba, no ɓemb-roog o ñamaak, fo saax laa Galaad, no batand.

² Aa-adax we na xeet fee, we na carind ake Isra’el fop fa xeet fee Roog fop a maadiida mbokatax neene. A jeg’a goor cuni teemeed nahik waa na ñaaƴaa fo xa caf den too a yekoox laƥ.

³ Beebensame we a yega yee Ii-isra’el lakas we kaa ndet’u Mispa. Ii-isra’el we a laya yee: «Layangyo a in ne sabab feene a jegitna!»

⁴ Maaga, o Leelewi xe reeƭna o kor no tew oxe war’eena a laya a den ee: «Mi fo o tees kaa i ngar’u Gibe’a fee no Beebensame we, ndax i mbe maaga.

⁵ Wiin we ngenna Gibe’a a inooxanaxam, a mbid mbind ne reeƭuuma o kurul-keƥ kam o yeng ole. Kaa mbug’aam o mbar too a ngigna o tees boo neen a xonu.

⁶ Jangaam o tees, ɗegin teɓ-reɓ, lulit a den na carind ake Isra’el fop, yaam boom le fo o fanxoy ole we Gibe’a a mbi’na kam Isra’el.

⁷ Nuun Ii-isra’el we fop, nuun wey, nga’iryo a ndeer nuun too ngeboox mene ndiiki ke na fi’keel.»

⁸ Xeet faa fop a inooxandoora nen o kiin o leng, a lay ee: «O leng na in nomtooxkee no ƭiif um, too o leng xaadkee no mbind um.

⁹ Ndiiki koy, keeke i mbi’kaa a Gibe’a: Xan i songkin ne mbanjang ne a heblitkan.

¹⁰ Na carind ake Isra’el fop, xan i nqot no wiin teemeed wuu ndefna, wiin xarɓaxay, no wiin juni wuu ndefna, wiin teemeed, soo no wiin cuni xarɓaxay wuu ndefna, wiin juni. Wiin weene xan a ndet a mbaaƭanik xeet fee ñaamel, ndax a nomtooxiidangaa i ndabid a Gibe’a fee no Beebensame we o fanxoy ole ta fi’na kam Isra’el.»

¹¹ Naaga, goor we Isra’el fop a mbokatoorana teeru faa, a ndef nen o kiin o leng.

¹² A carind ake Isra’el a lula goor na qaw ake Bensame fop, ndax da lay a den ee: «Ndi xar refu paaxeer kene fi’eena a ndeer nuun?

¹³ Ndiiki koy, ƥoxotyo a in goor jaree tus we Gibe’a, ndax i mbar a den, ƥogid a Isra’el no paaxeer.» Kaa koy, Beebensame we mbug’ee o nan-giloox fog den Ii-isra’el we.

¹⁴ Beebensame we a sutoora no teeru ke den, a mbokatoor Gibe’a, ndax da nqire fo Ii-isra’el we.

¹⁵ Beebensame we sutoor’ina no teeru ke a lime no ñaal naaga. A ndeeƭa goor cuni qarɓeen ƭik fo goor cuni ɓetuu fa leng waa yekooxna laƥ, fogreerna fo we Gibe’a ndeeƭna xir say teemeed ɓetuu ƭik.

¹⁶ A ndeer a yaj aleene fop a jeg’a xir say teemeed ɓetuu ƭik waa ndeeƭna a canoon, oxuu reeƭna na den a waag’a o suusaand gac took o biil too ɗalkiran.

¹⁷ Goor we Isra’el a lime itam, fogreerna fo Beebensame we. A ndeeƭa cuni teemeed nahik waa yekooxna laƥ, a ndef xir say den fop.

¹⁸ Ii-isra’el we a inooxa a ndet Betel, ndax da laamit a Roog ee: «Alum na carind ake in na eetkaa o songik Beebensame we?» O Yaal oxe a doona yee: «A carind ale Yudaa na eetkaa o songik.»

¹⁹ Ƥiiɓ teel no feet nqes olaa, Ii-isra’el we a ndeta, a ndal paam Gibe’a.

²⁰ Cinj kaaga, a ƥera, ndax da nqire fo Beebensame we soo a njagandooxan xire, a mbaambir fa Gibe’a.

²¹ Beebensame we a sutoora Gibe’a soo a mbar no ñaal naaga goor cuni qarɓeen ƭik fo goor cuni ƭik no Ii-isra’el we.

²² Kaa koy, goor we Isra’el a njegatina njambaar, a ndakoox o njagandooxan xire no mbiñ onqe da ndeeƭna no ñaal eetaand ne.

²³ Ii-isra’el we a ndeta a loolik mbaambir no Yaal oxe boo no kirand naa, soo a laamit o Yaal oxe yee: «Ndax i mbara o ndakoox o nqire’ik fo Beebensame we fog in?» O Yaal oxe a doona yee: «Ndetyo songik a den!»

²⁴ No ñaal ƭikandeer naa, Ii-isra’el we a nqetkahina fo Beebensame we,

²⁵ ndaa no ñaal naaga, Beebensame we a sutoorahina Gibe’a, a nqetiid fa den. A mbarahina no Ii-isra’el we goor cuni xarɓaxay fo goor cuni ɓetuu tadik waa yekooxna den fop laƥ.

²⁶ Xeet fee Isra’el fop a ndeta Betel, a loolik soo a moof maaga mbaambir no Yaal oxe. A ngoora no ñaal naaga boo no kirand naa, a ƥoxot sadax toxel fo sadax camsa’oor mbaambir no Yaal oxe.

²⁷ Maaga, Ii-isra’el we a laamta o Yaal oxe xa as. Arka ne no ngiɓoor ne Roog Betel a reeƭu na jamaane faaga,

²⁸ too Finees fee o ƥiy Eleyasaar fee o ƥiy Aaroon a reeƭu oxe farna teen. A laya yee: «Ndax i mbara o ndakoox o nqire’ik fo Beebensame we fog in, ndi i nqaƴin?» O Yaal oxe a doona yee: «Ndetyo, yaam o feet xam ɓoxot a den na xa ƥay nuun.»

²⁹ Maaga, Ii-isra’el we a ƥengnoora goor me widna a Gibe’a.

³⁰ No ñaal ndadkandeer naa, Ii-isra’el we a inooxana Beebensame we soo a njagandooxan xire, a mbaambir fa Gibe’a nen a caf ake mbaafna.

³¹ Beebensame we a sutooxa, ndax da ñoxorik fa den too a ƭooqlooxe boo a ngoƭ teeru fee. A ndalfooxa o yen took Ii-isra’el we nen a caf ake mbaafna boo a mbar na den ngap goor qarɓeen tadik, na ƭat ale jofna Betel fo na le xotna Gibe’a, kam a koƥ alaa.

³² Beebensame we a laya yee: «A nqawahine nen a caf ake mbaafna.» Ii-isra’el we koy a laya yee: «Fat i ƈuf, ƭooqloox a den na ƭat akaa, maa goƭna teeru fee.»

³³ Goor we Isra’el fop a sutooxa xa ƭasand den, a njagandooxahinit Baal-Tamar, soo Ii-isra’el we ƥeng’ina a mbaasloortiid me da ndeeƭna kam Maare-Geba.

³⁴ Xir say cuni xarɓaxay waa njileena kam Isra’el fop a mbadiida mbaambir Gibe’a. A ñoq ale a ɗoma, too Beebensame we and’afulee sabab fee na daliidaa a den.

³⁵ O Yaal oxe a xawa Beebensame we mbaambir Ii-isra’el we. No ñaal naaga, Ii-isra’el we a mbara na den goor cuni qarɓeen ƭik fo goor cuni ƥetik fo goor teemeed waa yekooxna den fop laƥ.

³⁶ Beebensame we a and’ata yee a nqawe. Ii-isra’el we a ndiƈatoox’a a cinj mbaambir Beebensame we, yaam a yaakaar’u goor we ƥeng’ina paam Gibe’a.

³⁷ Weene a ñofa o ƈufan teeru fee, a pictoor soo a mbarit fop we ngenoogna teen laƥ.

³⁸ Kaa ƭaap’u fo ke yoqna no xiixire we Isra’el ee xan a yoɗit o anddiloor eel fo suun na teeru fee.

³⁹ Goor we Isra’el a mbes’a a ñoq ale a cinj. Maaga, ye Beebensame we a mbarna na den ngap goor qarɓeen tadik soo a mboog ee a nqawa a den nen eetand,

⁴⁰ eel fo suun a dalfooxa o yoɗoorit na teeru fee. Beebensame we a ngeleerooxa soo a nga teeru fee den fop a fi fo suun o leng kut, a jof took.

⁴¹ Maaga, Ii-isra’el we a nomtooxaniida Beebensame we ndiid’atna ƭomu, yaam a nga sabab fee na daliidaa a den.

⁴² A ngoda o joor mbaambir Ii-isra’el we, a nqot a ƭat ale na koƥ-a-ƥor alaa, ndaa xiixire we Isra’el a sisoora fa den, too we ƥeng’ina paam teeru fee a ƥiikla a den, a mbaraa a den na ƭat ale.

⁴³ Ii-isra’el we a mbida Beebensame we o kurul-keƥ, a ndaabaa a den, a mbaraa a den, a mbañ o ci a den ñootand boo a mbarit a den mbaambir Gibe’a, no mbiñ onqaa farna no batand.

⁴⁴ Neene, no Beebensame we, goor cuni xarɓaxay fo goor cuni ɓetuu tadik waa ndeeƭna fop a salma-koor a nqona.

⁴⁵ We ƥostooxna a ngoda o joor na koƥ-a-ƥor alaa, farna fo ɓil laa Rimon. Ii-isra’el we a mbara na den cuni ƥetik na ƭat ale soo a ndaabaa we yoqna boo Gidom, a mbarahin na den cuni ƭik.

⁴⁶ We mbareena fop no Beebensame we no ñaal naaga a ndeeƭa goor cuni qarɓeen ƭik fo goor cuni ƥetik waa yekooxna laƥ too a ndef a salma-koor den fop.

⁴⁷ Kaa koy, goor teemeed ɓetuu fa leng no we ngod’ina o joor, a nqot a ƭat ale na koƥ-a-ƥor alaa, a moofa no ɓil laa Rimon boo a qool a nahak.

⁴⁸ Cinj kaaga, goor we Isra’el a ndakooxa nomtooxan Beebensame we, a mbarit laƥ goor we no teeru ke, cegel ke fo kuu fodna na xa ƥay den. A ndoxa itam teeru ke da nqetitna fop.