Haahate we 2 - NQAARIIT NE ROOG

O Yaal oxe a xasana xeet um

¹ Malaaka fee no Yaal oxe a inooriida Gilgal a gar Bokiim, a lay Ii-isra’el we yee: «Suttaam a nuun Misira, ɗoxiid a nuun no saax le reg’uuma daan nuun fo a taaƥ. Layaam ee: ‹Ɗegkiim ngiɓoor es fa nuun boo muk,

² too nuun oo, nu ngiɓoorkee fo we ngenna no saax leene too xan nu luƈit xa sadaxand axe den.› Kaa koy, nu nan-gilooxee o ñuxur es! Xar taxu nu mbi keene?

³ Mexe layaa a nuun ee raxkiim mbaambir nuun we ngenna no saax le. Xan a ndef na nuun nen mbog, soo roog ke den a ndef nen mbaal naa na damaa a nuun.»

⁴ Ye malaaka fee no Yaal oxe a layna Ii-isra’el we fa lay faaga, den fop a njibna xa paɗax.

⁵ A ne’a o mbiñ onqaaga Bokiim soo a ƥoxot o Yaal oxe sadax.

Fa nqon fee Yosuwe

⁶ Maaga, Yosuwe a nomta xeet fee, too Ii-isra’el we a nqaada oxuu refna no fiisel ole ta laseena, ndax da njang saax le.

⁷ Xeet fee a mbaɗooxooga o Yaal oxe no ñoow ole Yosuwe fop fo no ñoow ole no maak we moƴuuna o nquuɗ too a nga’’u a pi a maak ake fop o Yaal oxe a fi’an’ina a Isra’el.

⁸ Yosuwe fee o ƥiy Nun too a ref o tag no Yaal oxe a xona, ye ta jegna xa kiid teemeed fo xa kiid xarɓaxay.

⁹ A gase no fiisel ole ta las’eena kam Timnat-Heres no jegel olaa na xa coong axaa Efrayim no ɓemb-roog o janoon ole no joong olaa Gaas.

¹⁰ Cinj kaaga, suk naaga fop a ndaba daan den itam, soo suk lakas naa andeerna o Yaal oxe, ne’atiim ke ta fi’anna a Isra’el, a ndeefan a den.

Xeet fee a nqaƴa o Yaal oxe

¹¹ Maaga, Ii-isra’el we a mbi’a kaa faaxeerna na kid no Yaal oxe, a mbaɗooxaa a Baaliin.

¹² A mbaasa o Yaal oxe Roog fee no daan den sutit’ina a den Misira soo a mbaɗooxaa roog lakas, roog ke no qeet ke mbidna a den. Kaa ngungoogu mbaambir roog keene, a mbuuxnooraa o Yaal oxe.

¹³ A mbaasa o Yaal oxe soo a mbaɗooxaa a Baal fa Astarteyiin.

¹⁴ Fuux le no Yaal oxe a biltooxana Ii-isra’el we. A ɓoxota a den na xa ƥay no yaayaq we da nduguñ a den, a xaƴ a den na xa ƥay no fañ we mbidna a den, too mbaag’atee o nqox fañ den.

¹⁵ Mbanuu da nqire’ikna, o ɓay no Yaal oxe a dalooga took den ndax ta toroxand a den ne ta layit’uuna too a daaɓoox’un fa den. Neene, a ndeeƭa na naqad fa maak.

¹⁶ Maaga, o Yaal oxe a sutana a den haahate, too weene a mbata a den na xa ƥay no we yaqoogna a den.

¹⁷ Kaa koy, Ii-isra’el we nan-gilooxee sax haahate we den, yaam a ngore’aƭar no Yaal oxe, a ngungaa mbaambir roog lakas. A ƭapa no ñofu a ƭat ale daan we den a ndeefoogna, too nananee kebil ke no Yaal oxe nen a den.

¹⁸ Mbanuu o Yaal oxe a sutanna a den o kaahate, a refooga fo ten, a wataa a den na xa ƥay no fañ den no ñoow ole no kaahate xeene fop, yaam o Yaal oxe a yirmooga a den yaa da iinaa no we ñagadiloogna a den fo no we ngal’andoogna a den.

¹⁹ Kaa koy, o kaahate xe xaa xonaa rek, da moƴ o mo’atin daan den, a ngiɓoor fo roog lakas, a mbaɗooxaa a den soo a ngungaa mbaambir den, a mbañ o mbaas a leng na pi a paaxeer ake den, ne’atiim o saƭik xoox den.

O Yaal oxe a ɗeetlooxa Ii-isra’el we

²⁰ Fuux le no Yaal oxe a biltooxana Ii-isra’el we, soo ta lay ee: «Feek xeet fene kaa ƭeg ngiɓoor ne dalin’uuma fo daan den, a ndoon teen a mbañ o nan-giloox o ñuxur es,

²¹ mi itam raxkatiim mbaambir den o koor o leng sax no qeet ke Yosuwe a rax’afuleerna soo a xonkaa.

²² Neene um ɗeetlooritkaa Ii-isra’el we, reefandin no qeet keene, boo and ndax xan a ndeef a ƭat ale no Yaal oxe, ne daan den a ndeeftuuna ndax nam.»

²³ Naaga, o Yaal oxe a xaƴa qeet keene ta ɓoxot’eerna a Yosuwe, da ngen kam saax le, ñofandoox’ee dara no rax a den.