Haahate we 19 - NQAARIIT NE ROOG

Tooñ ne no Beebensame we ndefna Gibe’a

¹ Na jamaane faaga o maad a jeg’eerna kam Isra’el, o Leelewi a genooga no cat kaa no joong olaa Efrayim. A xotit’a o tew Betleheem kam Yudaa.

² O tew oxe a gore’aƭara no ten, a hus Betleheem kam Yudaa no mbind faap um soo a moof maaga boo a qool a nahak.

³ O kor um a inooxa, a soƥkin, ndax ta lay fo ten no njek boo a gattin. A yoon’a fo o tag um, a ɓisloox xa paam xa ƭaq. O tew oxe a roknaan no mbind faap um, too ye faap um a ga’uuna a dalnaan fo o ɗaay.

⁴ Faap fee no tew oxe a moofnoora o seemir um boo ta jeg ñaal tadik no mbind um. A ñaamooga, a yeraa soo a mbe’aa maaga.

⁵ No ñaal nahkandeer naa, a inooxa ƥiiɓ teel, soo o Leelewi xe a waajataa o ret, ndaa faap fee no tew oxe a laya o seemir um ee: «Cungi i ñaktoox kañ, ndax o jeg doole, cinj kaaga nu ndet!»

⁶ Maaga, den ɗik a moofa, a ñaam, a yer. Cinj kaaga, faap fee no tew oxe a laya o koor oxe yee: «Ɓaati fe o yeng o leng too felakinoox!»

⁷ O koor oxe a inooxa, ndax ta ret, ndaa o seemir um a fañaan o waas boo ta fe’ahin maaga o yeng o leng.

⁸ No ñaal ƥetkandeer naa, a inooxa ƥiiɓ teel, ndax ta ret. Maaga, faap fee no tew oxe a layaan ee: «Ngela cungi ñaam kañ, soo nu moof boo njeeƈ ne a girdoox.» Maaga, den ɗik a ndeera a ñaam.

⁹ O koor oxe a inooxa, ndax ta ret, ten fo o tew oxe fo o tag oxe, ndaa o seemir um a layaan ee: «Ga’angi, tige a yaara too oxe yengiidaa, mbe’yo boog! Kaam ee njeeƈ ne xe mudiidaa, fe’i mene too felakinoox! O feet, nu inoox ƥiiɓ teel, nqot a ƭat nuun, o xaad no ƭiif of.»

¹⁰ O koor oxe koy bug’ee o fe, a inooxa soo a ret. A gara boo a jasnoor fa Yebus, refna ref Yeerusaleem, a yoon fo xa paam xa ƭaq axe ƭap’eena fo o teem.

¹¹ Ye da mbaambnooxiidna Yebus, yaaga tige a yaara a paax, soo o tag oxe a lay o yaal mbind um ee: «Aca i ndet, sag farna fa teeru feene no Yeeyebus we, mbe’ik maaga.»

¹² O yaal mbind um a doonaan ee: «I sagkee na teeru fa njan faa jegeerna Ii-isra’el. Fat i suur boo Gibe’a.»

¹³ A layahina o tag um ee: «Aca i ndet, siipan o leng no fo mbiñ neeke, Gibe’a mbaat Rama, soo mbe maaga.»

¹⁴ Naaga, a suura a ƭat den. Ye njeeƈ ne a mudkaa, yaaga da mbaambnooxiidaa a Gibe’a fee Beebensame we a njegna.

¹⁵ A saga maaga, ndax da mbe Gibe’a. O Leelewi xe a roka, a moof na baayo fee na teeru faa. O leng koy dalin’ee a den no mbind um, ndax da mbe maaga.

¹⁶ No kirand naa, a jeg’a o koor o nogoy oxaa gatoogna na xa qol axaa. O koor oxeene no joong olaa Efrayim a rime, ndaa kam Gibe’a a genoogu, too we ngenoogna maaga Beebensame a ndeeƭu.

¹⁷ Ye ta yoɗna a kid um, a ga’a o ñaaƴ oxe moof’ina na baayo fee na teeru fee soo a laamtin ee: «Mam inooro soo jofaa mam?»

¹⁸ A doonaan ee: «Kaa i inoor Betleheem kam Yudaa soo njofaa no cat kaa no joong olaa Efrayim, maa rimeema. Kaam xaadaa. Kaam retaa no Mbind naa no Yaal oxe, ndaa o leng dalniraam no mbind um.

¹⁹ Yaag oo toox de i njega boob fo fo gooñ olaa xa paam axe in a ñaamna too i njega itam puuru fa biiñ, mi fo o ceefeer of fo o goor ole yoonna fa in we dag of. I ñakee dara.»

²⁰ O nogoy oxaa a laya yee: «Gari fa jam! Xam fi’anong fop ke soxla’oona, fe’kiro muk na baayo fee.»

²¹ A ɓisa a den no mbind um soo a yipan xa paam axe fo gooñ. Ñaaƴ we a ƥoga a caf den, a ñaam soo a yer.

²² Ye da ndeerna a ñaamaa, goor jaree tus we na teeru fee a mbida mbind ne o kurul-keƥ, a mbakaa o don-maax ole soo a lay o nogoy oxe refna o yaal mbind ne yee: «Sutiidi o koor oxe dalna no mbind of, ndax i mbi’in nen o tew.»

²³ O yaal mbind ne a sutooxa, a lay a den ee: «Bara fog es, ngela ba nu mbi sabab! Feek o koor oxene o kenar es oo, ba nu mbi o fanxoy olaaga.

²⁴ Nga’angyo, jegaam o ƥiy o ndew onqaa andafuleerna adna, too o koor oxene a jega o tew. Xam sutaniid a nuun a den, nu ngigin a den, mbi a den kuu felna a nuun, ndaa ba nu mbi o koor oxene o fanxoy o nandu neene.»

²⁵ Goor weene koy nan-giloox’iran. Maaga, o Leelewi xe a xota o teem, a sutaniidin a den tafil. A ngignaan, a mbondoox fo ten o yeng ole fop boo no nqes naa, cinj kaaga da nqaƴin ye mbeet ne a leelaa.

²⁶ Farna fo nqes ne, o tew oxe a gara a yen na carind ale no mbind ne no koor oxe, me o kor um a reeƭna, a yoq maaga boo neen a feedu.

²⁷ No nqes naa, o kor um a inooxa, a wet a carind ale no mbind ne soo a sutoox, ndax ta suur a ƭat um. A ga’a o teem a naag liraas na carind ale no mbind ne, xa ƥay axe a ndoonoox no peg ne.

²⁸ A laya o tew oxe yee: «Inooxi i ndet.» Kaa koy, doon’iran dara! Maaga, o kor oxe a doonaan took o faam ole ten soo a xaad no mbind um.

²⁹ Ye ta fadiidna no mbind um, a xota japil, a jang o teem, a ɗegin xa ƭeg xarɓaxay fo xa ƭeg xa ƭaq axaa ta lulitna kam o fiisel ole Isra’el fop.

³⁰ Fop we nga’ina keene a laya yee: «Tig nandu neeke mosee o jeg muk too mosaand o ga naa Ii-isra’el we a sutooru no saax laa Misira boo no ñaal roog ne xaye. Ƭeetaqinyo tige, nga’ir a ndeer nuun too lay ke na fi’keel.»