Haahate we 16 - NQAARIIT NE ROOG

Samson fo xa ton-maax axe Gaasa

¹ Samson a reta Gaasa, a ga maaga a caga soo a fe’ik maa ten.

² Wiin we na teeru fee a yegne yee: «Samson a fadiida mene.» A ndeeraan soo a ƥengin o yeng ole fop no ndokand ne na teeru fee. A yaadoox’ata o yeng ole fop, a layaa yee: «Roog oxaa feedaa, i mbarin.»

³ Samson koy, a wondooxa boo ndeer o yeng ole, ta inoox a dam begax ke no don-maax ole na teeru fee fo a toodook a ƭak ake, a fuur a den fo a kinglir ale. A gadooxa a den soo a ɓis a den no jul olaa no joong olaa jasnoorna fa Hebron.

Dalila a hoda a Samson

⁴ Cinj kaaga, Samson a ga’a o tew, a bugin. Oxeene kam a yulanq alaa Sorek a genoogu, a ne’el Dalila.

⁵ Gelwaar we no Fiifilista we a ndeta maa Dalila, a layin ee: «Naxi a Samson boo and me doole fa maak fee ten a hataa fo nam i mbaagun o maafit, ngumin soo ngarnin, yaaga xan oxuu refna na in a cooxong xa monjong juni fo xa monjong teemeed xaaliis fa nqoolu.»

⁶ Dalila a laya a Samson ee: «Ngela lalangaam me doole fa maak fee wo a hataa fo nam waagee o humit, ndax o harnel.»

⁷ Samson a doonaan ee: «Um humit’ange xa ƥaak ɓetaa ƭaq a qali xa quƥu sap axaa mbeerafuleerna, xam heesat, refat nen o kiin sang um.»

⁸ Gelwaar we no Fiifilista we a ƥisiida a Dalila xa ƥaak ɓetaa ƭaq a qali xa quƥu sap axaa mbeerafuleerna, soo ta humit a den a Samson.

⁹ Dalila kaa ɓengin’u wiin na ndok kam mbind ne. Cinj kaaga, a wuuqa yee: «Samson, Fiifilista we owey songiidang!» Samson a ɗega xa ƥaak axaa ne fiɗel a doxtaa fale. Neene, kunpa fee na doole fee ten and’aand.

¹⁰ Dalila a laya a Samson ee: «Ga’aa, kaa o ŋastaxam, maaɓaam. Ndiiki koy, ngela layangaam xar waagee o humit.»

¹¹ Samson a layaan ee: «Um humit’ange xa ƥaak xa qas axaa njiriiñoorafulaandeena, xam heesat, refat nen o kiin sang um.»

¹² Dalila a janga xa ƥaak xa qas, a humtin o ten. Cinj kaaga, a wuuqaa yee: «Samson, Fiifilista we owey songiidang.» Wiin kaa ƥengin’ahinel na ndok kam mbind ne. Samson a ɗega xa ƥaak axe ngumit’eena xa ƈoox um nen o sayoom.

¹³ Dalila a layaan ee: «Boo fa ndiik kaa o ŋastaxam, maaɓaam. Layaam xar waagee o humit.» Samson a layaan ee: «O riw’angaa xa maar ɓetaa ƭaq axe no xoox es fo o eed ole soo xiisnit a den mbiic ne, xam heesat, refat nen o kiin sang um.»

¹⁴ Dalila a ɗaannoora a Samson, a riw xa maar ɓetaa ƭaq no xoox le ten fo o eed ole a xiisnit a den mbiic ne. Cinj kaaga, a wuuqa yee: «Samson, Fiifilista we owey songiidang!» A yokoorta no ƭaan ole, a watin mbiic ne fo o eed ole.

¹⁵ Dalila a layaan ee: «Nam waago o layit ee bugaxamo too hoolooxiraamo? A caf a tadak akaa o ŋastaxam, fañaam o lay me doole fa maak fee wo a hatna.»

¹⁶ Dalila a jom’andoogaan ñaal nuu refna fo fa lay um, a tinqlan boo ta bugat o xon, yaam waag’atiran o muñ.

¹⁷ Samson a lalaan kunpa fee ten fop, a layin ee: «Nduus mosee o dal took xoox es, yaam kaam kesanel a Roog no kaa xotitna no fud ya es. Um ruus’ange, xan doole fee mi a wat na mi, too xam heesat, nandat nen o koor oxuu refna.»

¹⁸ Ye Dalila a andatna yee ndiiki Samson a layaan kunpa fee ten fop, a lulta o xoyankel gelwaar we no Fiifilista we soo a layanel a den ee: «Ngaryo no jaf lene, yaam a layaxam kunpa fee ten fop.» Maaga, gelwaar we no Fiifilista we a ngara me no tew oxe, a ƥislooxiid xaaliis fee da ndeg’uuna.

¹⁹ Dalila a ɗaannoora a Samson no kuɓay ke ten soo a xoy o koor ta ruus xa maar ɓetaa ƭaq axe no xoox le Samson. Neene, a heesata, soo doole fee ten a wat no ten.

²⁰ Maaga, Dalila a wuuqa yee: «Samson, Fiifilista we owey songiidang!» Samson a dalfooxa o yokoox, a xalaat ee xan a sutoox teen nen a caf ake mbaafna, a woktoox. And’ee koy ee o Yaal oxe reeƭatee fo ten.

²¹ Fiifilista we a ndamaan, a yul a kid ake ten, a ƥisin Gaasa soo a njengtin ceen xanjar. Samson a wirlooga ɓil unir le kam kaso fee.

²² Yaaga fop koy, wiil le ten ruus’eena a saxatinooga.

A pi katil a palakaand ale fo fa nqon fee Samson

²³ Bes, gelwaar we no Fiifilista we a mbokatoora, ndax da ƥoxot a Dagon fee roog den sadax fa maak soo a mbelakinoox. Kaa layoogu yee: «Roog in a ɓoxota na xa ƥay in a Samson fee o pañ in.»

²⁴ Ye xeet fee a nga’na a roog den, a simatoogaan, a layaa yee: «Roog in a ɓoxota na xa ƥay in o pañ in, oxe paangoogna saax le, a war jaaku na in.»

²⁵ Ne da njeg’ina o ɗaay na qeeñ den, a laya yee: «Fat Samson a xoyiidel, ndax i ŋastin.» A suta a Samson na kaso faa, soo ta fi’anaa a den calat. A geenne ndeer a toodook ake no taax ne.

²⁶ Maaga, Samson a laya o goor ole dam’uuna o ɓay a ɗoxan ee: «Ɗoxaam, duqnooraam a toodook ake njaƭna taax ne, ndax um damloox teen.»

²⁷ Taax ne koy kaa may’u muut fo goor fo rew. Gelwaar we no Fiifilista we fop maaga a ndeeƭu, soo ngap wiin cuni tadik, goor fo rew, a ŋaay took taax ne, a ƭeetaa a Samson ta fi’aa calat.

²⁸ Maaga, Samson a ƴufginooxa o Yaal oxe, a lay ee: «O Yaal oxe na refkaa boo faw, ngela wetandooxaam! Wo Roog, ci’atinaam doole no jaf leeke doŋ, ndax um rabdinoox jaf leng kut took no Fiifilista we, na kid es ake ñakuuma.»

²⁹ Cinj kaaga, Samson a sereƥooxa a toodook a ƭak ake a ndeer ale, taax ne a diƈooxna, a gignoox na den, a leng ale na ñamaak um, a lakas ale na janoon um.

³⁰ Samson a laya yee: «Fat um xonandoor fo Fiifilista we!» A ɗaara fa doole um fop, soo taax ne a yen took gelwaar we fo took xeet fee ndeeƭna taaga fop. Neene, we ta warandoorna na fa nqon um moƴu o may we ta war’ina no ñoow um fop.

³¹ Xa teɓ axe ten fo mbind faap um fop a ngara, a ƥisin soo a ngasin ndeer Sora fa Estawol kam a mboy alaa Manowa fee faap um. Samson a reeƭa o kaahate Isra’el boo xa kiid qarɓeen ƭik.