Haahate we 13 - NQAARIIT NE ROOG

12. Samson

¹ Ii-isra’el we a mbi’ahina kaa faaxeerna na kid no Yaal oxe, soo o Yaal oxe a ɓoxot a den na xa ƥay no Fiifilista we boo xa kiid qarɓeen nahik.

² A jeg’a o koor oxaa genoogna Sora, a ne’el Manowa too a fog’u na qaw a leng na carind ale Dan. O teem o timar oxaa mos’eerna o jeg o ƥiy a reeƭu.

³ Malaaka fee no Yaal oxe a feeñooxa o tew oxeene, a layin ee: «Andaam ee o timar refo too jegiro o ƥiy, ndaa xan o ref fo fud, ñoot o ƥiy o ngoor.

⁴ No ke xotitna ndiiki koy, wootooxi o yer biiñ mbaat a yer a qaaɗu too ba o ñaam qoolaƭaru,

⁵ yaam xan o ref fo fud, ñoot o ƥiy o ngoor. Waree o ruusoox muk, yaam o goor oleene xan a kesanel a Roog no ke xotitna no fud ya um. Ten na ferkaa o wat Ii-isra’el we na xa ƥay no Fiifilista we.»

⁶ O tew oxe a reta a lay o kor um ee: «A jega o kiin Roog oxaa garna me mi, a nandtaa malaaka Roog too a saɗarnoox bo. Laamtinum koy me ta inoor’ina, too layiraam gon um.

⁷ Kaa koy, a layaxam ee: ‹Xan o ref fo fud, ñoot o ƥiy o ngoor. No ke xotitna ndiiki koy, ba o yer biiñ mbaat a yer a qaaɗu too ba o ñaam qoolaƭaru, yaam o goor oleene xan a kesanel a Roog no ke xotitna no fud ya um boo yaa ta xonkaa.› »

⁸ Manowa a xeɗa o Yaal oxe yee: «Ey! O Yaal es, ngela nomtiidi me in o kiin Roog oxe luliidoona, ta jangin a in ke i mbarna o mbi’an o goor ole na rimkeel.»

⁹ Roog a jaɓa a qeƭ ale Manowa, soo malaaka fee Roog a nomtooxiid me no tew oxe. Kaa soƥ’u ta moof kam o qol, ndaa Manowa fee o kor um reeƭee fo ten.

¹⁰ O tew oxe a ƴufa ndak fo ndak a yegnikin o kor um, a layin ee: «O kiin oxe gar’ina me mi a koom ale a feeñooxahinaxam.»

¹¹ Manowa a inooxa, a reefan o teem, a ret maa no kiin oxaa soo a laamtin ee: «Ndax wo lay’u fo o tew oxene?» A doonaan ee: «Mi yoo.»

¹² Manowa a laya yee: «Ndiiki koy, fa lay of a fadnooxangaa, xar helu no goor ole fo nam a waru o ñoowit?»

¹³ Malaaka fee no Yaal oxe a laya a Manowa yee: «O tew oxe a wara o xaƴ fop ke layanuuma.

¹⁴ Ñaamkee dara kaa hatna no ndaxar biiñ. Yerkee biiñ mbaat a yer a qaaɗu too ñaamkee qoolaƭaru. Fat a reef fop ke heblanuuma.»

¹⁵ Maaga, Manowa a laya a malaaka fee no Yaal oxe yee: «Xaƴi i nqurong, njawanong o mbambe.»

¹⁶ Malaaka fee no Yaal oxe a doona a Manowa yee: «O xurangaam sax oo, ñaamkiim no ñaamel ke wo. Kaa koy, o bugangaa, waagaa o jagand sadax fa ndoxel, ɓoxotin o Yaal oxe.» Manowa and’ee yee malaaka fee no Yaal oxe a reeƭu.

¹⁷ Maaga, a laamta a malaaka fee no Yaal oxe yee: «Nam ne’ee? Neene, xan i mbaagong o niw, yaa fa lay of a fadnooxkaa.»

¹⁸ Malaaka fee a doonaan ee: «Xar taxu o laamtaa gon es? Com’andtu ne’eem.»

¹⁹ Manowa a xota o mbambe fo sadax tuufe-duufe, a ɓoxot a den o Yaal oxe took ɓil le. Ye Manowa fo o teem a ƭeetaa o Yaal oxe a fi’aa com’andtu,

²⁰ ƈulfaan a yoɗoora took o sadaxand ole, a sag na asamaan, soo malaaka fee no Yaal oxe a yoɗoorit kam ƈulfaan ne no sadaxand ole. Yaa Manowa fo o teem a nga’na kaaga, a ngunga a lanq.

²¹ Malaaka fee no Yaal oxe feeñooxatee a Manowa fo o teem. Maaga, Manowa a andata yee malaaka fee no Yaal oxe a reeƭu.

²² Manowa a laya o teem ee: «A woora yee xan i nqon, yaam i nga’a a Roog.»

²³ O teem a doonaan ee: «O Yaal oxe a bug’angaa o warnoor a in, jaɓkoogee sadax fa ndoxel fee fo sadax tuufe-duufe ke in, lalkoogee a in keene fop too nannoorkoogee a in tig nandu neene.»

²⁴ O tew oxe a ñoota o ƥiy o ngoor soo a ne’in Samson. O goor ole a maakooga, soo o Yaal oxe a barke’in.

²⁵ Yiif le no Yaal oxe a feraan o riñ na pi, ye ta genna no Saŋe ne Dan ndeer Sora fa Estawol.