Haahate we 11 - NQAARIIT NE ROOG

Yefta a refata o aa-adax oxe Isra’el

¹ Yefta, o Kaagalaad oxe, o qiixire say a reeƭu. O ƥiy na caga fo o koor oxaa ne’eena Galaad a reeƭu.

² Galaad a jeg’a fo o teem itam xa ƥiy xa koor. Ye xa ƥiy axeene a maakna, a ndaxa a Yefta, a layin ee: «Jegkiro a las no lam ne no mbind faap in, yaam kaa o ref o ƥiy no tew o lakas.»

³ Yefta a ƴufa maa goƭna goor fog faap we ten soo a genik no saax laa Toob. Goor jaree tus a mbokatoora fo ten soo a yoonataa fo ten no song ke ten.

⁴ A cinj camaane leng-leng, Aa-amon we a ñoxora fo Ii-isra’el we.

⁵ Ne Aa-amon we a ñoxoroogna fo Ii-isra’el we, maak we Galaad a ndeta a nqotik a Yefta no saax laa Toob.

⁶ A laya a Yefta yee: «Gari adooxan a in, ndax i ñoxor fo Aa-amon we.»

⁷ Kaa koy, Yefta a doona maak we Galaad ee: «Ndax nu sib’iraam soo ndaxaam mbind faap es? Xar taxu nu nqoyaxam ndiiki fee nu ndefna kam naqad?»

⁸ Maak we Galaad a laya a Yefta yee: «Keene mat taxu i ngar me wo ndiiki, ndax o yoon fa in, ñoxor fo Aa-amon we soo refat o aa-adax in, o aa-adax no we ngenna Galaad fop.»

⁹ Yefta a laya maak we Galaad ee: «Nu nqaadtangaam, ndax um ñoxor fo Aa-amon we bo o Yaal oxe a ɓoxot a den na xa ƥay es, xam refat o aa-adax nuun.»

¹⁰ Maak we Galaad a ndoona a Yefta yee: «I ndaaɓooxa o mbi ke layoona. Yaasam o Yaal oxe a ref o seede in!»

¹¹ Maaga, Yefta a yoona fo maak we Galaad. Xeet fee a ndalnaan o ƭooɗox fo o aa-adax den, too Yefta a jeepeeta mbaambir no Yaal oxe, kam Mispa, ke ta lay’ina fop.

Tuleer ke Yefta maa no Aa-amon waa

¹² Yefta a hebla duleer maa no maad oxe no Aa-amon waa, ndax da layin ee: «Xar i nqetu boo o inooxanaam, ndax o xire fo saax es?»

¹³ O maad oxe no Aa-amon we a doona duleer we Yefta yee: «Kaa Ii-isra’el we a njaɓ’u saax es ye da sutoorna Misira, no ke xotitna no xuluɓ ole Arnon boo na ƈufnand alaa Yabok, a waaƭik a Yordaan. Ndiiki koy, nomtaam xa piisel axeene na jam.»

¹⁴ Yefta a heblahina duleer maa no maad oxe no Aa-amon we,

¹⁵ ndax da layin ee: «Keeke Yefta a layu: ‹Ii-isra’el we njaɓee saax le Mowaab, ne’atiim le no Aa-amon we,

¹⁶ yaam ye Ii-isra’el we a inoorna Misira, a nqaaña a koƥ-a-ƥor alaa boo na Kal alaa no xeet le soo a mbadiid Kades.

¹⁷ Maaga Ii-isra’el we a ngebla duleer maa no maad oxe Edoom, ndax da nqeɗin ta ci a den da nqaañ no saax um. Kaa koy, o maad oxe Edoom ci’iran a den. Ii-isra’el we a lulta leng kut ke maa no maad oxe Mowaab, ndaa ten itam a naaga faƥit. Maaga, Ii-isra’el we a yoqa Kades.

¹⁸ Cinj kaaga, a njangatina a ƭat den na koƥ-a-ƥor alaa, a laqtoox saax le Edoom fo le Mowaab soo a ngar no batand naa Mowaab. A ndala kaltaa o xuluɓ ole Arnon, a mbañ o ndok no fiisel ole Mowaab, yaam Arnon refu o ŋat ole Mowaab.

¹⁹ Ii-isra’el we a ngebla duleer maa Siihon fee o maad no Aa-amori we maadooxoogna Hesebon. A nqeɗaan, ndax ta ci a den da nqaañ no saax um boo no mbiñ onqe da njofaa.

²⁰ Kaa koy Siihon hooloox’ee xaƴ Ii-isra’el we da nqaañ no fiisel um. A dalfooxa o fokat a yaj ake ten fop, a dal Yahas soo a song Ii-isra’el we.

²¹ O Yaal oxe Roog fee Isra’el a ɓoxota a Siihon fo a yaj ake ten fop na xa ƥay no Ii-isra’el we, da nqaw a den. Neene, Ii-isra’el we a njaɓa o fiisel ole Aa-amori we a ngenoogna fop.

²² Ii-isra’el we a njaɓa o fiisel ole no Aa-amori we fop no ke xotitna no xuluɓ ole Arnon boo na ƈufnand alaa Yabok fo ke xotitna na koƥ-a-ƥor alaa boo Yordaan.

²³ O Yaal oxe Roog fee Isra’el a waaga rax Aa-amori we mbaambir Isra’el fee xeet um boo a ƴut, soo wo o mat, o bug o jegoox saax le den, ndi an refo?

²⁴ Mee ndax wo jegu o fiisel ole Kemos fee roog of a ci’oonga. Yaaga koy, xar taxu i njegkee fop ke o Yaal oxe Roog in a fi’na boo i njaɓin?

²⁵ Ndax wo moƴu a Balak fee o ƥiy Sipoor, ten fee o maad Mowaab? Ndax a mosa o ñimatir fa xeet fee Isra’el mbaat ta xire fa den?

²⁶ Xa kiid teemeed tadik axey, axaa Ii-isra’el we a ngenna Hesebon fa Aroweer fo no caate ke da mbaxooxna fo itam no teeru ke lakooxanna a Arnon fop. Xar taxu nu njaɓ’ee a den no Ii-isra’el we no camaane keene fop?

²⁷ Mi o mat tooñiroong, wo kañ na fesooraa fa mi naa faaxeerna tee kaa o xire’iidaa fa mi. Yaasam o Yaal oxe refna o kaahate, a hate xaye a ndeer Ii-isra’el we fo Aa-amon we.› »

²⁸ O maad oxe no Aa-amon we koy, a ƭat um yong’ee na ƭelem ake Yefta a lulit’uuna.

Ndegit ne Yefta

²⁹ Yiif le no Yaal oxe a fudooxa took Yefta. A xaaña o jegel olaa Galaad fo olaa Manaase, a reef Mispa kam Galaad, a inoor maaga, a songik Aa-amon waa.

³⁰ Yefta a regoora fo o Yaal oxe yee: «O ɓoxotangaa Aa-amon we na xa ƥay es,

³¹ xam kesanong soo ɓoxotong nen sadax fa ndoxel oxe na eetkaa o sutoor no mbind es ndax ta xetooxiidaam, yaa um gattiidkaa o ndam me no Aa-amon waa.»

³² Yefta a songka Aa-amon waa, soo o Yaal oxe a ɓoxot a den na xa ƥay um.

³³ A yaqana a den yaq fa ƭomu kam teeru qarɓeen ƭik ke ndefna ndeer Aroweer fa Minit, a waaƭik a Abel-Keramim. A qaw ale a ɗoma lool no Aa-amon we ƥoxotoox’atna no Ii-isra’el we.

³⁴ Ye Yefta a gataa no mbind um, maaga Mispa, o ƥeem o ndew onqe a xetooxiidaan, a fecaa a yoonandtin a ñal. O ƥiy o leng kut onqeene Yefta a jeg’u, jeg’ee o ƥiy o ngoor mbaat o ƥiy o ndew o lakas.

³⁵ Yaa Yefta a ga’uuna rek, a dalfooxa o faar toki um, a lay ee: «Hey! O ƥees, naqadilaxamo! Xar taxu wo o mat o ref oxe ɓekaxama no njakad? Kaam regoor fo o Yaal oxe too waagiim o wat no ke layuuma.»

³⁶ O ƥiy o ndew onqe a doonaan ee: «Faap, a soƥangaa yee kaa o regoor fo o Yaal oxe, fi’i na mi ne regtitanoona, yaam o Yaal oxe rabdinooxanong took no Aa-amon we fañ of.»

³⁷ A layahina a faap um ee: «Ci’aam kene rek: Xaƴaam um jeg a xoox es boo a qool a ƭak, um joqooyook na xa coong axaa, yoon fo qaariit es, ndax um ɗomatoox maaga ke um xonkaa too dolooxafuliim.»

³⁸ Yefta a layaan ee: «Reti!» A xaƴaan ta ret boo a qool a ƭak. O ƥiy o ndew onqe a reta na xa coong axaa, a yoon fo qaariit um, a ɗomatooxaa ke ta warna o xon too dolooxafulee.

³⁹ Ye a qool a ƭak akeene a muukooxna, a nomtooxiida me faap um, soo ta fadin no ten ke ta regoor’eena. O ƥiy o ndew onqeene and’afulee adna. No kaa xotitna maaga, o mbaax onqene a dalnate kam Isra’el:

⁴⁰ O hiid oo hiid, mboƥ ndoog ne Isra’el a ndet a mbetandook boo ñaal nahik o ƥiy o ndew onqe Yefta fee o Kaagalaad oxe.