Haahate we 1 - NQAARIIT NE ROOG

Ii-isra’el we a ngena kam saax le Kanaan

¹ A cinj fa nqon fee Yosuwe, Ii-isra’el we a laamta o Yaal oxe yee: «Alum na carind ake in na eetkaa o songik Kaakanaan we?»

² O Yaal oxe a doona yee: «Goor we na carind ale Yudaa na eetkaa o songik, ɓoxotaam saax le na xa ƥay den.»

³ Maaga, goor we na carind ale Yudaa a laya we na le Simewon fee o maag um ee: «Ngaryo yoon fa in no fiisel ole i laseena, i songik Kaakanaan we, cinj kaaga, i yoon fa nuun no fiisel ole nuun.» Naaga, we na carind ale Simewon a yoona fo we na le Yudaa.

⁴ Maaga, a ndeta a songik, soo o Yaal oxe a ɓoxot na xa ƥay den Kaakanaan we fo Peeperisi we, da mbar na den wiin cuni xarɓaxay kam Beseq.

⁵ Kaa da soƥ a Adoni-Beseq kam Beseq, a songin. Neene, a nqawa Kaakanaan we fo Peeperisi we.

⁶ Adoni-Beseq a goda o joor, soo da ndaabin boo a ndamin, a ƭeg qol maak ke na xa ƥay axe fo ke na caf ake.

⁷ Maaga, Adoni-Beseq a laya yee: «Maad qarɓeen ɓetuu ɗik waa qol maak ke na xa ƥay axe fo ke na caf ake den a ƭegeena kaa ngisoogu ke samtoogna no roon es. Roog kaa rabdaxam deŋ ke fi’uuma!» A ƥisaan Yeerusaleem, too maaga a xontu.

⁸ Goor we na carind ale Yudaa a songa a Yeerusaleem soo a njaɓin. A mbarta we ngenoogna teen laƥ soo a ndaaɓ teeru fee.

⁹ Cinj kaaga, a ndeta a songik Kaakanaan we ngenoogna no jegel olaa na xa coong axaa, no laa no ɓemb-roog o ñamaak fo no laa na yulanq ake.

¹⁰ A ndalfooxa o inooxan Kaakanaan we ngeenoogna Hebron fee xoyoogeena yaaga Kiryat-Arba soo a nqaw a qaw ale Sesay, ale Ahiman fo ale Talmay.

¹¹ A inoora maaga a songik we ngenoogna Debir fee xoyoogeena yaaga Kiryat-Sefeer.

¹² Kaleb koy a laya yee: «Oxe na songkaa a Kiryat-Sefeer soo a jaɓin, xam ci’in a Aksa fee o ƥees o ndew ta dolooxankin.»

¹³ Otni’el fee o ƥiy Kenaas fee o ndeɓ Kaleb o mat jaɓu teeru faa, soo Kaleb a ci’in a Aksa fee o ƥeem o ndew ta dolooxankin.

¹⁴ Na bes faa no ngulook naa Otni’el a laya a Aksa ndax ta xeɗ a faap um Kaleb o qol. Aksa a fudooxa o faam um, soo Kaleb a laamtin ee: «Xar oo?»

¹⁵ A doonaan ee: «Dimle’aam, ci’aam maa jegna foofi, yaam o jegel ole o ɓisaxam no ɓemb-roog o ñamaak kaa weer koroŋ.» Maaga, Kaleb a cooxaan peel ke took fo ke a lanq.

¹⁶ Keekeni we ndefna xa taan no seemir Moyiis a inoora na Teeru fee no keec ke a yoon fo xa taan axe Yudaa boo na koƥ-a-ƥor alaa Yudaa no ɓemb-roog o ñamaak ole Araad, soo a ngenik a ndeer no Aa-amalek waa.

¹⁷ Goor we na carind ale Yudaa a yoona fo we na le Simewon fee o maag Yudaa, da songik Kaakanaan we ngenoogna Sefat. A kesana o Yaal oxe teeru faaga, a ngefin tuƈ soo a ne’in Horma.

¹⁸ Goor we na carind ale Yudaa a njaɓahina teeru fee Gaasa fo o fiisel um, fee Askalon fo o fiisel um fa fee Ekron fo o fiisel um.

¹⁹ O Yaal oxe a reeƭa fo a carind ale Yudaa, soo da njaɓ o jegel olaa na xa coong axaa. Kaa koy, mbaag’ee o ndax we ngenoogna na yulanq alaa, yaam weene a njeg’a a sareet-xire celem.

²⁰ Kaleb a cooxe a Hebron ne Moyiis a heblit’uuna, soo a sut teen a qaw a tadak ake no Aa-anak we.

²¹ Xa taan axe Bensame koy mbaag’ee o ndax Yeeyebus we ngenoogna Yeerusaleem, too boo ndiik weene a maada o ñoowaa ndeer xa taan axe Bensame kam Yeerusaleem.

²² Xa taan axe Yoseef a songka a Betel, too o Yaal oxe a reeƭa fa den.

²³ A eeta o lul wiin da ngorook a Betel. Teeru feene kaa xoyoogel yaaga Luus.

²⁴ Hoohorax waa a nga’a o koor ta sutoortiidaa na teeru faa soo da layin ee: «Lali a in me teeru fee a rokteel, too yaaga xan i mbuusong.»

²⁵ O koor oxaaga a lala a den me teeru fee a rokteel, soo da mbarit we na teeru fee laƥ. Kaa koy a nqaƴa o koor oxaaga fo ƥasil um da ndet.

²⁶ O koor oxaaga a reta no saax laa no Heeheet waa. A maxa teeru faa ta ne’na Luus, too gon laaga a maadtu boo fa ndiik.

²⁷ Xa taan axe Manaase mbaag’ee o ndax we ngenoogna Bet-Se’aan, Tanak, Door, Ible’aam, Megido fo caate ke da mbaxooxna, too Kaakanaan we a maada o ngenaa kam saax laaga.

²⁸ Ye Ii-isra’el we a njegatna doole, a serooga a den calel, ndaa mbaag’ee o ndax a den.

²⁹ Xa taan axe Efrayim mbaag’ee o ndax Kaakanaan we ngenoogna Geseer, too Kaakanaan we a ngenooga a ndeer den kam Geseer.

³⁰ Xa taan axe Sabulon mbaag’ee o ndax we ngenoogna Kitron fa Nahalol, too Kaakanaan we a maada o ngenaa a ndeer den, ndaa a serooge calel.

³¹ Xa taan axe Aseer mbaag’ee o ndax we ngenoogna Ako, Sidoŋ, Ahlab, Aksib, Helba, Afiq fa Rehob.

³² Aa-aseer we a ndala a ndeer no Kaakanaan we ngenoogna no saax le, yaam mbaag’ee o ndax a den.

³³ Xa taan axe Neftali mbaag’ee o ndax we ngenoogna Bet-Semes fa Bet-Anat, too a ndala a ndeer no Kaakanaan we ngenoogna no saax le, ndaa we ngenoogna Bet-Semes fa Bet-Anat a serooge calel.

³⁴ Aa-amori we a nomta xa taan axe Dan no jegel olaa na xa coong axaa, too nqaƴ’ee a den da mbudooxiid na yulanq alaa.

³⁵ Aa-amori we a maada o ngenaa o joong ole Heres, Ayalon fa Saalbim, ndaa ye xa taan axe Yoseef a moƴatna o njeg doole, a serooga a den calel.

³⁶ O ŋat ole no Aa-amori we kaa inoor no Ñaang laa na Beex akaa, a reef Sela, a jof took.