Galati 1 - NQAARIIT NE ROOG

Pool oxe simnaa

¹ Mi Pool, apootar refum, too keene hatee no wiin we mbaat o kiin a doonaam o ten, ndaa um reftin na pexey Yeesu Kiristaa fa Roog Faap fee xontooxnooruuna a ndeer no xon we.

² Mi na bindaa a nuun, mi fo fog we ndefna fa mi fop, nuun pokatax ke ndefna kam o jegel ole Galati.

³ Yaasam Roog Faap in fo o Yaal oxe Yeesu Kiristaa a ci a nuun yirmande fa jam.

⁴ O Yaal oxe Yeesu Kiristaa ɓoxotu o ñis um yaam pakaad in, ndax ta mucil a in na jamaane fa mbaaxeer fee ndiiki, ne Roog fee refna Faap in a bugtuuna.

⁵ O ten o ndam a helu bo na moos boo moos! Amiini.

Yegil mbaax leng kut jegu

⁶ Kaam jaaxiɗ, yaam ne nu ñofna boo nqaƴaa oxe xoyitna a nuun yirmande, soo suuraa no yegil mbaax lakas.

⁷ Refee koy ee kaa jeg yegil mbaax lakas, ndaa kaa jeg wiin waa na njom’andaa a nuun, a mbug o yaq Yegil mbaax ne Kiristaa.

⁸ Kaa koy, a refangaa yee in fa qoox in sax mbaat malaaka faa inoorna na asamaan na yegnitaa yegil mbaax lakas naa refeerna ne i mbaare’na, xan a halakoox.

⁹ I layaan a nuun yaaga, too mexe dakooxan o lay a nuun na waxtu fene: O kiin a yegnangaa a nuun yegil mbaax lakas naa fogreerna fo ne nu ndaawna, kaam ee xan a halakoox.

¹⁰ Ndiiki koy, kaa felna wiin we um waaƭaa ndi kaa felna a Roog? Kaam ee ndax kaam waaƭaa o fel wiin we? Um maad’angaa o felaa wiin we, refkoogiim o paɗ Kiristaa.

Ne Pool a refitna apootar

¹¹ Fog we, mexe layaa a nuun ee Yegil mbaax ne yegnuuma a nuun hatee no kiin.

¹² Daawtinum no kiin, too o kiin jangniraam o ten itam: Yeesu Kiristaa fa xoox um feeñlaxam o ten.

¹³ Nu anda a paax sax ke reeƭna jiko es na ƭat ale no Yaawuur we fo ne ñagadiltooguuma mbokatax ne no gimu we Roog, too ɗoftan o yaq.

¹⁴ Nu anda itam ne daɗit’uuma gend es mayu na xeet in no ke farna na ƭat ale no Yaawuur we, too fex’u o mbaax no daan es bo ta hup.

¹⁵ Ye ta felna oxe kes’axama yaaga rimafulaandeem, too a xoytaam yirmande um,

¹⁶ a feeñlaxam o Ƥeem, ndax um yegnitin kam we ndefeerna Yaawuur. Ndak fo ndak, waaƭ’atiim o kiin oxaa asaxama.

¹⁷ Xotiim farna fo we eet’axama o ndef apootar, too a ndeeƭu Yeerusaleem, ndaa dalfooxaam o xot farna fa Arabi, soo sogkaa o nomtooxiid Damaas.

¹⁸ Yaa i moofna boo njeg xa kiid xa tadaq, retaam Yeerusaleem, maa Kefaas fee refna ref Piyeer, dal no mbind um boo jeg maaga ñaal xarɓaxay fo ñaal ƥetik.

¹⁹ Ga’’iim o lakas no apootar we, a refangee Saak fee refna o ndeɓ no Yaal oxe.

²⁰ No ke um bindaa a nuun, ndeer es fa Roog oo, too maaɓiim.

²¹ Cinj kaaga, retaam no jegel olaa Siri fo no jegel olaa Silisi.

²² Pokatax kaa ndefna Yudee, too a ndef no Yaal oxe fop mos’iraam o nga.

²³ Kaa nan’u soom wiin we a layaa yee: «Oxe ñagadiloogna a in yaaga, oxe yegnitaa ndiiki o ngim onqe ta ɗoftoogna o yaq.»

²⁴ Maaga, a simata a Roog yaam mi.