Filip 3 - NQAARIIT NE ROOGYeesu soom 1 Fog es, mbelakinooxyo no Yaal oxe. Dapatinaa leng kut ke no leetar oleeke xijliraam, too ten na saƭakinaa a nuun. 2 Mbootooxyo a cuut akeene, jaajal faaxeer weene na sertaa nquc yaam Roog. 3 We nqucooxna tigi ndefu in we na mbaɗoortaa a Roog Yiif le ten, in we a tagas in a refna na Kiristaa Yeesu, in weeke ndooneerna yaakaar in no cer. 4 A dey’angaa o fi’el, mi itam waag’aam o doon yaakaar es no cer. A jegangaa oxaa foogna yee a waaga o doon yaakaar um no cer, andaam ee mi moƴun o waag o ten, 5 mi fee xuceena yaa jeguuma ñaal ɓetuu tadik, ref o ƥiy Isra’el no kurcala le Bensame, ref o Hebre, Hebre a ndimaam. O Farisiya reeƭum, reefaa kebil ke, 6 damoox na den fo o mbeq boo ñagadilaa we ngimna na Yeesu. No cofel ole kebil ke a ndalinna um ñak ƥanjel. 7 Keene fi’’uuma ke moƴna, ndiiki kaam fi’in kasaara yaam Kiristaa. 8 Refee keene soom koy. Kaam ɗeetat fop nen kasaara yaam ke moƴna o jeg o njiriiñ no fop, ta ref o and a Kiristaa Yeesu fee o Yaal es, taxna um fes lakas ke fop a cinj. Lakas keene, kaam ɗeetaa a den nen a siind, ndax um waag o jeg a Kiristaa. 9 Neene, xam soƥel no ten, refee koy fo o cofel ole na hataa no reef kebil ke Moyiis, ndaa fo o cofel ole o ngim na Kiristaa a cooxtaa, o cofel ole na daawteel na Roog na pexey o ngim. 10 Neene o mat um anditkaa a Kiristaa fa doole a qontax um, waag o fog no coono um, nandat fo ten nen oxaa xonitna nen o ten, 11 boo yaa fadiiduuma na qontax a ndeer no xon we, yaa waaganuuma. Jof mbaambir na baaƭ o cofel 12 Refee koy ee kaam daaw a laay ale boo ƴut mbaat um fad no ñak-sik, pokin ne Kiristaa a pokit’axama. 13 Fog es, ɓekiim no xoox es ee pokaanum boo ƴut, ndaa a jega koy kaa um fi’aa: Kaam fañ o ɓek yiif es no ke daawuuma o fes a cinj, soo ɗoftaa o daaw ke fodaxama mbaambir. 14 Kaam eetatireel kañ, ndax um waag o jang a laay ale took, taxna Roog a xoy a in na Kiristaa Yeesu. 15 Yaaga boog, in fop we ñakna sik, fat i mbog xalaat fa leng kut feene. A soƥangaa itam ee kaa nu njeg maa xalaat a guutatiritna fa feene, xan Roog a xoolandanin a nuun. 16 Me i mbodna ndiiki, fat i yoon, ñaaƴ mbaambir. 17 Fog es, nuun fop, laalakinooxaamoo, ndoon a kid nuun no we na ndeefaa xa caf in. 18 A jega mayu waa na ñaaƴaa, a ndef waa mbugeerna o nan paru na kurwaa le Kiristaa. Layaam a nuun a caf a mayu kaa jofna na den, ndiiki itam, um dakooxin o layaa fo xa kooniit. 19 A saŋkax na cungaa a den. O fud refu Roog den, o ndam den da ƥekin no ke na gaci’nooraa a den. Tig adna soom a nqalaataa. 20 In we asamaan a refna mbaafaap in koy, in we cungaa o Yaal in Yeesu Kiristaa fee refna o Muumucil in, na inooriidkaa maaga. 21 Ten feene o mat na supitkaa cer neewu doole ke in, da nandat fo cer o ndam um, a fi’tin sañ-sañ fee ta jegna boo a waag o garit fop took. |
Copyright © 2015-2023 by Eglise luthérienne du Sénégal
Eglise luthérienne du Sénégal