Filip 2 - NQAARIIT NE ROOG

A neewandax ale fo o magnel ole Kiristaa

¹ Yaaga boog, a soƥangaa yee yaaloor nuun key na Kiristaa, a soƥangaa yee o laaw nuun a waaga o dal yaam o mbeq um, Yiif leng kut a fokat a nuun, kaam ee a soƥangaa yee o liir fa yirmande a njega,

² fat nu mbadin o ɗaay es. Xan nu mbadnin yaa nu mbogna xeeñ leng, o mbeq o leng onqe a ref na nuun, nu mbog yuuƥ fa xalaat.

³ Baa eetatir a ɓek a nuun na dara, mbaat nu mbi’aa tig ee ndax nu ƥoxotel o ndam o njegee xoox. Fat a neewandax a ref na nuun, nu ƭeetaa lakas we nen gartu a nuun took.

⁴ Fat oxuu refna na nuun a ɗeetaa ke faaxna no lakas we, a fañ o ɗeetaa ke faaxna na xoox um soom.

⁵ Mbogyo a qalaat ake ndeeƭna na Kiristaa Yeesu, ne ta layteena yee:

⁶ Kiristaa feene, andoona yee ke Roog a refna ref a refu, gendandooree fa Roog ne ta fodirna fo ten.

⁷ Kaa huytoox, a ref nen o paɗ, a gar a nand fo wiin we. Ye ta feeñna nen o kiin,

⁸ a neewandooxa, a nanan a Roog boo na fa nqon, refee fa nqon nene sax, ndaa fa nqon took a kurwaa.

⁹ Ten taxu, Roog a yoɗin, ta garit fop took, a cooxin gon laa hupna na kon ake fop,

¹⁰ ndax no gon Yeesu fop a ngooknoox, ta ref na asamaan mbaat took lanq ke mbaat ɗuga lanq ke,

¹¹ soo o kiin oo kiin a lay ee Yeesu Kiristaa refu o Yaal oxe, Roog Faap fee a ɓoxotel o ndam no ten.

O ñoow o xoolu

¹² Fog es we fexuuma, naa nu moofu kaa nu nananaam. Ten taxu, kaa nu mbar o ƭofit o ñoow nuun no ngim a duuf, nu ngebooxin fo a qalaat fo o saɗar a Roog. Keene koy, baa ref soom yaa nu mbaagaxama o ndoon a ngid. Kaa nu mbar o moƴ o njofnoox teen ndiiki fee goƭuuma a nuun,

¹³ yaam Roog na sakaa na nuun a posax fo a pi ne ta bugtuuna, too paax oo.

¹⁴ Kuu nu mbi’aa, baa jeg a ƭomatax mbaat a caageej,

¹⁵ ndax nu ñak sik, nqool, ndef xa ƥiy Roog xa cegee ƥanjel a ndeer no wiin yaqooxu waa ngalafna. Ndeer no weene, kaa o ñoow nuun a meleƈaa nen xa qoor axe na asamaan,

¹⁶ nu ƥisaa a den fa lay fee na ci’taa o ñoow. Yaaga, na bes faa Kiristaa a nomtooxiidkaa, xam waag o fakoox yaam nuun, and ee ke ƴufanooguuma fe’ee a koƥ, den fo calel es.

¹⁷ Um warange sax oo, fo’oy es kaa nandkaa soom nen ƥaate took o ngim onqe nu ƥoxotna a Roog nen sadax, sawaraam teen, felakinooxaa fa nuun, nuun fop.

¹⁸ Nuun itam, mbelakinoorityo neene. Kaam ee nu mbelakinoox fa mi.

Pool oxe tagasaa a Timote fa Epaforodit

¹⁹ No Yaal oxe Yeesu, yaakaaraam o luliid a Timote me nuun no miñeer, ndax a gatangaa um waag o felakinoox, yaam ke ta wetandooxkaxam na nuun.

²⁰ Jegiim meeke o leng oxaa fogtuuma a yiif, a refangee Timote, ta waag o xaajir fa mi ke farna na qalaat es fa nuun.

²¹ Fop, ke faaxna na qoox den rek a mbaaƭaa, a mbañ o mbaaƭ ke jofna na Yeesu Kiristaa.

²² Nu anda yee Timote a ɗeetloox’e ye ta rokaa no waare’ik Yegil mbaax ne fa mi, a bug o jal fa mi, ne o ƥiy a jaltaa fa faap um.

²³ Mexaa andaa ne um sutoorkaa no ke refuuma, xam luliidin me nuun,

²⁴ too koy, jegaam yaakaar tigi no Yaal oxe yee mi itam, ndiik um gar.

²⁵ Ɗeetaam itam boo ga ee nomtiid o pog es Epaforodit cegu o njiriiñ oo. Ten itam, o yoon es no calel ke yoo, a gomreel nen a mi, nu luliidin me mi, ta ɓisiidaam ƭaxir soxla.

²⁶ Kaa bug o ga a nuun, nuun fop, ne nu nanna jir le ten, a leeƈ cer um.

²⁷ Kaa jir’u koy tigi boo a mat o xon, ndaa Roog a yirmaan. Yirmiran, ten soom sax, a yirmaxam mi itam, ndax naqad took naqad dalkiraam.

²⁸ Xam ñofin o luliid me nuun, ndax nu nga’in, mbelakinoox, mi itam naqad es a waag o yelef.

²⁹ Ndalniteenoo nen o pog nuun no Yaal oxe fo o ɗaay o deyu sik, niw wiin we nandna nen o ten,

³⁰ yaam no calel ke Kiristaa o ñoow um a yaac’u o ɓostoor, yaam ta doon’un no xoƥ nquƭ, ye ta rondandna a nuun paam es.