Filip 1 - NQAARIIT NE ROOG

Pool oxe simnaa

¹ Mi Pool fa Timote we faɗ Kiristaa Yeesu na mbindaa a nuun o leetar oleeke. In we simnaa a nuun, nuun tedu we Kiristaa Yeesu ngenna kam teeru fee Filip, nuun fop fo aa-adax nuun fo diidimle nuun.

² Yaasam Roog Faap in fo o Yaal oxe Yeesu Kiristaa a ci a nuun yirmande fa jam.

Pool oxe xeɗanaa gimu we Filip

³ Kaam gidmaa a Roog es cay a mbanuu wetandooxuuma a nuun,

⁴ xeɗanaa a nuun, nuun fop, diisan ne ɗaaytuuma

⁵ yaam ga ne nu ndenditna fa mi, nqayandaa Yegil mbaax ne. Keene koy, oxaa xotta no ñaal mberaand naa nu ngimna boo ndiik.

⁶ A wooraxam ee oxe ferna na nuun paax keene, xan a fadnin boo na bes faa Kiristaa Yeesu a nomtooxiidkaa.

⁷ Xalaat es na nuun fop, nuun we mbogna na yirmande fee daawuuma, keene cofu yoo, yaam kaa nu ndef no xeeñ es, ta ref um ɓekel kaso mbaat yaa um xoxtaa, saƭkandaa Yegil mbaax ne.

⁸ Roog a anda yee ne Kiristaa Yeesu a jegitna o liir na nuun, nu sooɓtaxam.

⁹ Ke um xeɗaa refu rek ee o mbeq nuun a jof mbaambir, a lingir fo o and tigi fo o jeg-yiif o xoolu,

¹⁰ ndax nu mbaag o njekit ke moƴna. Yaaga xan nu njeg o ñoow o xoolu, ñak ƥanjel boo na bes faa Kiristaa a nomtooxiidkaa.

¹¹ Xan nu may fo xa tim xa cofu xaa ngatna na Yeesu Kiristaa, ndax Roog a ɓoxotel o ndam, a simatel.

O ñoow es, Yeesu jegun

¹² Fog es, kaam bug nu and ee ke dalaxama fop kaa tax Yegil mbaax ne a moƴ o joot.

¹³ Yaam xiixire we mbogna no xeloorand ole fo lakas we fop a anda yee Kiristaa taxu um jengel.

¹⁴ Ke jengeema sax kaa tax moƴ-o-jaak ole no fog gimu we in a soɗoox njambaar. A ndamooxata tigi no Yaal oxe, a yegnitaa fa lay fee Roog, a mbaas caƭar.

¹⁵ A ndeer den a jega waa na yegnitaa a Kiristaa yaam a siisaxam, a mbug o ƥisiid ñimatir. Kaa koy, a jega lakas waa na mbaare’aa yaam a ngeboox paax ƥor.

¹⁶ Weene, o mbeq a mbi’tan, yaam a and ee xoxtaa Yegil mbaax ne taxu um doonel meen.

¹⁷ We yiif ñimatir a riñna koy, kaa yegnitaa a Kiristaa yaam a ngeboox qooleer, a mbaaƭaa maa da ƥektaxama na naqad ye jengeema.

¹⁸ Refee dara, yaam ta ref fo yiif xoolu mbaat fo yiif xooleer, Kiristaa kaa moƴ o yegniteel: Sawaraam teen lool, too xam felakinooxahin teen.

¹⁹ Andaam ee keene fop, a muc es rek a ɓisiidkaa, na pexey a qeƭ nuun fo Yiif Tedu le Yeesu Kiristaa na dif’axam.

²⁰ Kaam cungaa rek, too yaakaaraa yee jegkiim gaci. Feek naa moofum, too boo kili, xan Kiristaa a ɓoxotel o ndam no cer es fa doole, ta ref um sutel kaso mbaat um wartel teen,

²¹ yaam Kiristaa refu o ñoow es, soo fa nqon a ref o ndam na mi.

²² Kaa koy, o ñoow es a jegangaa no calel ke mi o njiriiñ, ga’iim kaa moƴuuna.

²³ Me ta refna kaam gid a ƭak: Kaam tayaa o sutoox adna feeke, ret ñoowik fa Kiristaa, too a wooraxam ee ten moƴu.

²⁴ Kaa koy, na seek a lakas ale, ke moƴna o jeg o njiriiñ refu um ñak o xon ndiiki, yaam nuun.

²⁵ A wooraxam, too andaam sax ee meen um moofkaa fa nuun, ndax nu njof mbaambir fo o ɗaay no ngim nuun.

²⁶ Yaaga um nomtooxiidangaa a ndeer nuun, nu njeg kaa nu mbakoortaa yaam mi no ñoow ole nu mbogna fa Kiristaa Yeesu.

²⁷ Kaa koy, fat a pesoorooƭ nuun a waag o lingir fo Yegil mbaax ne Kiristaa. Keene koy, kaa warna yoo, ndax a soƥangaam fa nuun, mbaat o mbiñ o lakas, um ga mbaat um nan ee kaa nu saƭik, mbog yiif leng kut, mbog xeeñ leng itam, ngomreel, ndax o ngim no Yegil mbaax ne a geenoox.

²⁸ Baa we nu ngomritaa a ndiidland a nuun. O ñak o diid nuun kaa lalit ee na saŋkax a ndefu, a lalit ee nuun o mat, nuun we na muc. Keene koy na Roog a hatu,

²⁹ yaam kaa nu ndaawnel yirmande, ndax nu ngim na Kiristaa. Refee koy soom ee nu ngim no ten, ndaa nu coono yaam ten itam,

³⁰ sagan njom leng kut ne nu nga’na um sagan, njang itam ee boo ndiik, mexe teen.