Esteer 9 - NQAARIIT NE ROOG

A tabdinax ale no Yaawuur we

¹ Ñaal xarɓaxay fo ñaal ndadkandeer ne no nqool xarɓaxay fo nqool o ƭikandeer onqe refna ref o nqool Adaar, a fadiida. No ñaal neene wargal fee no maad oxe a war’e o fadin, too we sib’ina Yaawuur we a yaakaarooga o maaf a den. Kaa koy, a suptax a jega boo Yaawuur we a maafat a den.

² Muu refna kam xa cegel axe no maad Asuwerus, Yaawuur we a mbokatoora no teeru ke da ngen’ina, ndax da song we yuuɓan’ina a den sabab. O leng waag’atee o xox Yaawuur we, yaam a saɗar’atu a den.

³ Kelfa ke na xa cegel axe fop fo we ndefanna o maad oxe fo gofornoor ke fo jaajal we no maat ne a mbarta Yaawuur we, yaam a saɗar’u a Mordokay.

⁴ Mordokay kaa reeƭatu o kiin o maak no mbind no maad ne. Gon um kaa joot’atu muu refna kam xa cegel axe, soo ta moƴ a moƴ o yoɗooxaa.

⁵ Neene, Yaawuur we a nqawta we sibna a den fop laƥ, a mbar a den, a saŋik a den, soo a mbi a den ke da mbug’ina.

⁶ Kam teeru fa njegu saŋe faa Suusaan, Yaawuur we a mbara too a saŋik goor teemeed ƥetik.

⁷ A mbar’a itam a Parsandata, Dalfon, Aspata,

⁸ Porata, Adalya, Aridata,

⁹ Parmasta, Arisay, Ariday fa Waysata,

¹⁰ ndeeƭna xa ƥiy xa koor xarɓaxay axe Haamaan fee o ƥiy Hamedata, a ref o pañ oxe no Yaawuur we. Kaa koy, njang’ee ke da njeg’ina.

¹¹ No ñaal naaga sax, o maad oxe a yega wiin fodne mbareena kam teeru faa Suusaan.

¹² Maaga, o maad oxe a laya a lingeer Esteer ee: «Meeke kam Suusaan rek, Yaawuur we a mbara too a saŋik goor teemeed ƥetik fo xa ƥiy xarɓaxay axe Haamaan. Ke yoqna na xa cegel axe no maat ne o mat, xar a mbaru o mbi maaga! Boo fa ndiik o layahinangaam ke bugoona, xan o jegin, too kuu xeɗoona, xan o ci’el o ten.»

¹³ Esteer a doonaan ee: «Daali maad, a felangaang, o feet fat Yaawuur we ndefna kam Suusaan a nqaƴel a mbi leng kut ke da mbi’na xaye, soo xa tal axe na xa ƥiy xarɓaxay axe Haamaan a ndokel o ƥaak no cok, a lokel no reex laa.»

¹⁴ O maad oxe a hebla yee ta fi’tel naaga. Kebil ne a yegnite kam Suusaan, soo xa tal axe na xa ƥiy xarɓaxay axe Haamaan a ndokel o ƥaak no cok, a lokel no reex laa.

¹⁵ Yaawuur we kam Suusaan a ƥaata o mbokatoor no ñaal xarɓaxay fo ñaal nahkandeer ne no nqool Adaar soo a mbar teen goor teemeed tadik. Kaa koy, njang’ee ke da njeg’ina.

¹⁶ Yaawuur lakas we na xa cegel axe no maat ne a mbokatoora itam, ndax da nqoxit o ñoow den soo a ñootnoox no we sib’ina a den. A mbara na den goor cuni qarɓeen ɓetuu ƭik fo goor cuni ƥetik, ndaa njang’ee ke da njeg’ina.

¹⁷ Keene xe xew’a no ñaal xarɓaxay fo ñaal ndadkandeer ne no nqool Adaar, soo ñaal xarɓaxay fo ñaal nahkandeer ne a ref na den ñaal a ñootnax fo mbumbaay fo o mbelakinax.

¹⁸ Yaawuur we Suusaan o mat a mbokatoora no ñaal xarɓaxay fo ñaal ndadkandeer ne fo no ñaal xarɓaxay fo ñaal nahkandeer ne, ndax da ñoxorel, soo ñaal xarɓaxay fo ñaal ƥetkandeer ne a ref na den ñaal a ñootnax fo mbumbaay fo o mbelakinax.

¹⁹ Ten taxu Yaawuur we ngenna no teeru teɓ ke a ndoofandaa ñaal xarɓaxay fo ñaal nahkandeer ne no nqool Adaar, ta ref na den ñaal o mbumbaay fo o mbelakinax, soo a lultiraa a ƭang.

Xew fee ne’eena Purim a dalne, ndax fop a ndoofandan

²⁰ Mordokay a binda kaaga fop no safe. Cinj kaaga, a lulta xa leetar Yaawuur we ndefna na xa cegel axe no maad Asuwerus fop, we moƴna o mat boo no we moƴna o ngoƭ.

²¹ A hebla a den da ndoofandaa o hiid oluu refna ñaal xarɓaxay fo ñaal nahkandeer ne fo ñaal xarɓaxay fo ñaal ƥetkandeer ne no nqool Adaar,

²² yaam no ñaal keene Yaawuur we a njeg’u a ñootnax no we sib’ina a den, too no nqool onqeene itam naqad den a suptoor’u o ɗaay, ɗom den a refat baneex. A mbar’a o mbi a den ñaal o mbumbaay fo o ɗaay, a lultiraa a ƭang soo a ci’aa rool we.

²³ Maaga, Yaawuur we a mbi’’ata o mbaax a toofand ale da mber’ina, too a mbi’toogaan ne Mordokay a bindanit’uuna a den.

²⁴ Haamaan fee o ƥiy Hamedata, a ref o ndaan Agag fo o pañ oxe no Yaawuur we fop, kaa yuuɓ’u, ndax ta saŋik Yaawuur we. A simta panjangir ke ne’eena Purim a ndeɓel, ndax ta dalin ñaal ne ta moocandkaa a den.

²⁵ Kaa koy, yaa o maad oxaa a yegna kaaga, a bindnoora kebil nqas, soo paaxeer ke Haamaan a yuuɓan’ina Yaawuur we, a sagoox took um, soo ta rokel o ƥaak no cok, a lokel no reex laa, ten fo xa ƥeem.

²⁶ Ten taxu ñaal keene a nqoyeel Purim tekitna panjangir ke. Ten taxu itam, ne ta layit’eena na xa leetar axe fo ne da nga’it’uuna fo ke dal’ina a den,

²⁷ Yaawuur we a ndalna o mbaax onqaa waag’aandeena o sañit, ta ref na den fo na xa taan den fo no wuu tuubatna na den. O hiid oluu refna, a mbar’a o ndoofandaa ñaal ƭik keene ne ta heblit’eena fo na waxtu fee da ngap’eena.

²⁸ Ƥasil Yaawuur nuu refna no jegel oluu refna fo na teeru fuu refna, a war’a o wetandooxaa too a roofandaa ñaal Purim ke no suk boo no suk. Yaawuur we fo xa taan den mbar’ee o mbaas muk o mbaax onqeene, yaam ndik da mbeecit ke xew’ina.

²⁹ Lingeer Esteer fee o ƥiy Abihayil fa Mordokay fee o Yaawuur oxe a mbinda fa sañ-sañ jaf ɗikandeer, ndax da saƭkand o leetar ole jagin’ina no ñaal Purim ke.

³⁰ Xa leetar a lulte Yaawuur we fop ndefna kam xa cegel teemeed fo xa cegel qarɓeen ƭik fo xa cegel ɓetaa ƭaq axe no maat Asuwerus. Kam xa leetar axeene a jeg’a xa ñuxur jam fo xa talnu o laaw,

³¹ too teen Yaawuur we a ngebil’e o ndoofandaa Purim na waxtu fee ta hap’eena, ne Esteer fa Mordokay a ndaawnitit’uuna fo ne da ndalnanit’uuna a qoox den fo xa taan den. Kaa jolna keene, a jeg’a ke dalneena no koor ne fo no ƭomatax ke mbar’eena o mbadin na xew feene.

³² Bargal keene na Esteer kaa saƭkandoogu ne Xew fee Purim a wareena o roofandit, too a mbind’e no safe.