Esteer 8 - NQAARIIT NE ROOG

¹ No ñaal leng kut naaga, o maad oxe a ci’a a lingeer Esteer o jeg ole Haamaan fee reeƭna o pañ oxe no Yaawuur we. Cinj kaaga, Esteer a feeñla o maad oxe ke ta fogna fa Mordokay, soo o maad oxe a xoynin ta gar.

² Maaga, o maad oxe a janga o heɗ o ñaasir ole ta jaɓit’ina na Haamaan, a cooxin a Mordokay, soo Esteer oo a doon o jeg ole Haamaan na xa ƥay Mordokay.

Yaawuur we a ci’e o mbaag o nqoxit a qoox den no gon no maad oxe

³ Cinj kaaga, Esteer a layahina fo o maad oxe. A yena na caf um, a naag ciic a lool soo a xeɗooxin, ndax ta watin paaxeer ke Haamaan fee o ndaan Agag a yuuɓan’ina Yaawuur we.

⁴ O maad oxe a jooxa a Esteer o samb wurus ole ten, ta inoox, a jasnoor fo o maad oxe

⁵ soo a layin ee: «Daali maad, a soƥangaa yee a felaang, too daawaam yirmande of, kaam ee a soƥangaa yee a qeƭ es a jofooxaang, too felaaxoong, fat ke Haamaan fee o ƥiy Hamedata, a ref o ndaan Agag, a yuuɓ’ina a xañtel. Bindi ndax xa leetar axe ta bind’ina na saŋik ale no Yaawuur we ndefna na xa cegel axe no maat ne fop, a sañtel.

⁶ Ndax xam waag o seede taamaala feene ta dalaa xeet es? Kaam ee waagkiim muk o jasnoor fo a saŋik ale no we fogtuuma xeet.»

⁷ O maad Asuwerus a laya a lingeer Esteer fa Mordokay, o Yaawuur oxe yee: «Ci’aam a Esteer o jeg ole Haamaan fee war’eena, yaam ne ta bug’ina o sak Yaawuur we pexey.

⁸ Kaa koy, nu anda yee kuu bindeena no gon no maad soo a wegtel o ñaasir ole ten waagataand o sañit. Ndiiki daal, mbindyo no gon es kaa nu nqalaatna yee ten moƴu o faax no Yaawuur we, soo mbegtin o ñaasir ole mi.»

⁹ No ñaal leng kut naaga, fodir’ina fo ñaal qarɓeen ƭik fo ñaal tadik no nqool o ndadkandeer onqe, refna ref o nqool Siwan, biibind we no maad oxe a nqoye, ndax da mbind na xa leetar ke Mordokay a lalgandkaa a den. Xa leetar axeene a mbinde Yaawuur we fo we ndefanna o maad oxe fo gofornoor ke fo kelfa ke na xa cegel teemeed fo xa cegel qarɓeen ƭik fo xa cegel ɓetaa ƭaq axe no maat ne, a xotit no saax laa End a damik boo no laa Kuus. Kaa mbind’el na pindooƭ o jegel oluu refna, xeet fuu refna no ɗelem um, soo no Yaawuur we itam na pindooƭ den fo no ɗelem den.

¹⁰ Xa leetar axe kaa mbind’el no gon no maad Asuwerus a mbegtel o ñaasir ole ten. Waa luleena a ŋaay pis ñofaan kaa muk, ngat’ina no kud ke no mbind no maad ne, a ƥisa a den.

¹¹ Kam xa leetar axeene, kaa bind’el ee o maad oxe a ci’a Yaawuur we ndefna kam teeru ke fop, da mbaag o mbokatoor o mbiñ o leng, ndax da nqoxit a qoox den. A mbaag’a itam o moocand, a mbar too a saŋik yaal ƥonax kuu inoorna no jegel oluu ta refna fo na xeet fuu ta refna, ndax da song a den. A mbaag’a sax o mbar rew den fo xa ƥiy den soo a njang o jeg den.

¹² Keene xe war’a o jeg kam xa cegel axe no maad Asuwerus fop no ñaal leng kut ne fodirna fo ñaal xarɓaxay fo ñaal ndadkandeer ne no nqool xarɓaxay fo nqool o ƭikandeer onqe, refna ref o nqool Adaar.

¹³ Ke bind’eena kam xa leetar axeene a war’a o ref kebil no jegel oluu refna soo a lambnel kam qeet ke fop, ndax Yaawuur we a njagandooxan bes feene, a mbaag o ndabdinoox no fañ den.

¹⁴ Ndak fo ndak, ye o maad oxe a cooxitna kebil ne, we lul’eena a ndalfooxa o ŋaay pis kaa ngat’ina no kud ke no mbind no maad ne soo a ñof o ndet. Kebil neene a yegnite itam kam teeru fa njegu saŋe faa Suusaan.

¹⁵ Mordokay a inoora maa no maad oxaa, a rokoox ndoki no maad naa xiiyiiyna, kene a ranig fo o ndip wurus o maak fo sabadoor njoor naa daalde’na. Muu refna kam teeru faa Suusaan xa ƈeel fo xa soroxole kaa njiboogu.

¹⁶ Yaawuur we kaa may’u muut fa baneex fo o ɗaay fo o mbelakinax, soo a njeg o niwel.

¹⁷ No jegel oluu refna fo na teeru fuu refna fo muu kebil ne no maad oxe a fad’ina, ta jeg maaga o ɗaay fo o mbelakinax fo mbumbaay fa xew a ndeer no Yaawuur we. Mayu a ndeer no qeet lakas ke a tuub’ata no Yaawuur we, yaam a sadaraa a den.