Esteer 4 - NQAARIIT NE ROOG

Mordokay a ƴufginooxa a Esteer

¹ Ye Mordokay a yegna fop ke xew’ina, a faara toki um, a deroox o saaku, a yipoox ndaw no xoox, a widaa kam teeru fee soo a jibnaa xa paɗax.

² Ye ta garna boo a jasnoor fo mbind no maad ne, a geenooxa, yaam o leng ci’’aand o rok teen, yaa ta derooxna o saaku.

³ No jegel oluu yegnit ne no kebil ne no maad oxe a fad’ina rek, ta jeg naqadilax maak a ndeer no Yaawuur we. Kaa ngooroogu, a loolaa soo a ƭomatooxaa. Mayu na den a mbondooxooga took xa saaku xaa ƭaapeena no ndaw.

⁴ Ye jeefeer we fo ɓuje we lingeer Esteer a ngarna boo a mbetandooxin ke xew’ina, Esteer a diida ƭomu. A lulta a Mordokay toki, ndax ta rokoox a den, a wol o saaku le, ndaa oxeene jaɓ’ee.

⁵ Maaga, Esteer a xoya a Hatak, o leng no ɓuje we o maad oxe a coox’uuna, ndax ta jalanan, a lulin ta laamtankin a Mordokay xar tige a reeƭu fo xar garu fo ten.

⁶ Hatak a sutooxa, a ret maa Mordokay na baayo faa na teeru faa jasnoorna fo a carind ale no mbind no maad ne.

⁷ Mordokay a yegnaan fop ke xew’ina fa xaaliis fa mbodne Haamaan a regit’ina, ndax ta yipin na kamba le no maad oxe, yaa Yaawuur we a saŋkeena.

⁸ A cooxa a Hatak a pind ake yiƥadoox’eena kebil ne na saŋik ale no Yaawuur we yegnit’eena kam Suusaan, ndax ta lalkin a Esteer. A layaan itam, ndax Esteer a ret maa no maad oxaa, a xeɗooxanik xeet fee ta fogna, ndax ta yirim a den.

⁹ Hatak a nomtooxiida soo a daawin a Esteer xa ƭelem axe Mordokay.

¹⁰ Kaa koy, Esteer a hebla a Hatak, ndax ta doonanin a Mordokay ee:

¹¹ «Dag we no maad oxe fo qeet ke na xa cegel axe no maat ne fop a anda yee oxuu rokna no maax-kam olaa no mbind no maad ne, ta ref o koor mbaat o tew, too o maad oxe xoyiran, xan a warel, ne ta bindteena no bargal ke. Oxaa o maad oxe a jooxna o samb wurus ole ten soom waagu o muc. O nqool o muum onqey onqaa o maad oxe a xoyeeraxama.»

¹² Yaa Mordokay a daawneena o doonanqol olaaga na Esteer,

¹³ a simta o doonanel o ten ee: «Ne o genaa kam mbind no maad ne baa tax o foog ee wo doŋ na muckaa a ndeer no Yaawuur we fop.

¹⁴ O naagangaa o tiimaa, fañ o lay na waxtu feeke, xan o ndimle no Yaawuur we a hat o mbiñ o lakas, da muclel, soo wo fo o kurcala of, nu saŋkoox. A waaga ref sax ee tig nandu neeke taxu o refat lingeer fee!»

¹⁵ Esteer a simta o doonanel a Mordokay ee:

¹⁶ «Reti o fokat Yaawuur we ndefna kam Suusaan fop, nu ngoor yaam o sagu es. Ba nu ñaam too ba nu yer boo ñaal tadik fo xa yeng den. Mi fo jeefeer we mi xan i ngoor soo um sogkaa o ret maa no maad oxe, ke bargal ke a ci’teeruuna fop oo. Um naagangaa xonkaa rek, um xon.»

¹⁷ Maaga, Mordokay a reta, a fi’tin deŋ ne Esteer a heblit’uuna o ten.