Esteer 3 - NQAARIIT NE ROOG

Baagraƭar ne ndeer Haamaan fa Mordokay

¹ Yaa kaaga a faafna, o maad Asuwerus a yoɗa a Haamaan fee o ƥiy Hamedata too a ref o ndaan Agag, a fi’in ta adooxan kelfa ke no maat um fop.

² Dag we njaloogna kam mbind no maad ne fop kaa ngooknooxoogu, a ngungaa mbaambir Haamaan, yaam o maad oxe fa xoox um o mat heblit’un. Mordokay koy, gooknooxoogee too gungoogee mbaambir um.

³ Dag lakas we njaloogna kam mbind no maad ne a laamta a Mordokay ee: «Wo o mat, xar taxu nananiro ke o maad oxe a heblitna?»

⁴ Ne da laamtooguuna keene ñaal nuu refna, too ten o mat a ƭat um yongee teen, a ngoƥataan fa Haamaan took o mbug o and, ndax ke Mordokay a lay’ina a den a waage o jaɓ, yaam kaa lay’u a den ee: «O Yaawuur refum.»

⁵ Ye Haamaan a yegna yee Mordokay naagiran o gooknooxaa too naagiran o gunganaa, a dalfooxa o fuux boo a buɓaa.

⁶ A yegne itam ee Mordokay o Yaawuur oo. Maaga, a ga’a yee o rabdinoox took Mordokay soom deyee, soo ta waaƭ pexey naa ta saŋkitna Yaawuur we no maat Asuwerus fop, ndefna xeet fee Mordokay a fogna.

⁷ No ndokand ne no hiid xarɓaxay fo ɗikandeer ole no maat Asuwerus, no nqool o eetaand onqe refna ref o nqool Nisan, Haamaan a simta ke na banjangteel too a xoyeel Purim a deɓel, ndax ta and bes fum fo o nqool onqum na njagooxkaa no yuuƥ ke ten. Mbanjang ne a yena no ñaal xarɓaxay fo ndadkandeer ne no nqool xarɓaxay fo ƭikandeer onqe refna ref o nqool Adaar.

Haamaan oxe ɗaapaa ne ta saŋkitkaa Yaawuur we

⁸ Haamaan a laya o maad Asuwerus ee: «Daali maad, kaa jeg xeet faa ndefna xeet a qoox den, a pasaroox kam xa cegel axe no maat of fop. Kebil den kaa njektir fo ke no qeet lakas ke fop, too ndeefkee muk bargal of. Refkee ngoora of, yaa xaƴoona a den fo njaambuur den.

⁹ A soƥangaa too a refanaang, cooxti kebil mbinde, ndax da saŋkel. Maaga, xam coox jaajal we no maat ne parig cuni nahik xaaliis fa nqoolu, ndax da ngeekin no jeg ole no maad oxe.»

¹⁰ O maad oxe a wola o heɗ o ñaasir ole no nqol um, a cooxin o pañ oxe no Yaawuur we, refna Haamaan fee o ƥiy Hamedata too a ref o ndaan Agag,

¹¹ a layin ee: «Xeet feene yoo xaaliis um oo, xaƴanaaxoong o ten, o fi teen ke bugoona!»

¹² No ñaal xarɓaxay fo ñaal ndadkandeer ne no nqool o eetaand onqe, biibind we no maad oxe a nqoye. A mbinda xa leetar we ndefanna o maad oxe fo gofornoor ke na xa cegel axe fo we adooxanna qeet pogreer ke fop ne Haamaan a heblit’uuna. Kaa mbind’el na pindooƭ o jegel oluu refna no maat ne, xeet fuu refna no ɗelem um. Kaa mbind’el no gon no maad Asuwerus soo a mbegtel o ñaasir ole ten.

¹³ Wiin a lule, a ƥis xa leetar axe kam xa cegel axe no maat ne fop. Kam xa leetar axeene kaa hebil’el, ndax Yaawuur we a mbarel, a moocandel, den fop no ñaal leng kut, xa pes axe fo nogoy we, rew we fo xa caaƈ axe, soo o jeg den a jaɓel. A saŋik aleene a war’e o fi no ñaal xarɓaxay fo ndadkandeer ne no nqool xarɓaxay fo ƭikandeer onqe refna ref o nqool Adaar.

¹⁴ Ke bind’eena na xa leetar axeene, a war’a o ref kebil no jegel oluu refna soo a lambnel kam qeet ke fop, ndax da njagandooxan bes feene.

¹⁵ We lul’eena a ñofa o ndet, a ƥis kebil ne no maad oxe. Ye kebil neene a yegniteel kam teeru fa njegu saŋe fee Suusaan, o maad oxe fa Haamaan kaa moof’u a yeraa, too yaaga fop oo, teeru fee Suusaan kaa njaq’u.