Esdaraas 9 - NQAARIIT NE ROOG

Ii-isra’el mayu a ngilga rew genar

¹ Yaa kaaga a faafna, kelfa ke a ngara me mi, a layaam ee: «Xeet fee Isra’el boo no saasadax we fo Leelewi we sax nqaajooree fo qeet lakas ke no saax le. Kaa laalaa a pi a cednooxu ke no Kaakanaan we, Heeheet we, Peeperisi we, Yeeyebus we, Aa-amon we, Moomowaab we, Miimisira we fo Aa-amori we.

² Kaa ngilgan a qoox den fo xa ƥiy xa koor axe den na xa ƥiy xa tew axe no qeet keene. Neene, xeet fa tedu fee a njaxasoora fo qeet lakas ke. Kelfa ke fo aa-adax we mat eetu o mbi ngore’aƭar neene.»

³ Ye nanuuma keene, faaraam toki es fo sabadoor es, ɓuutaa wiil le no xoox es fo no raatam es soo moof o ndeƈin yaam kam fa mbagu.

⁴ Fop we saɗaroogna Roog a xaw we nomtoortiid’ina no mbaƭ naa yaam ngore’aƭar ne den a mbokatooriida me mi. Mi o mat, moofaam yaam kam fa mbagu boo neen waxtu fee sadax fee no kirand ne a fadiidu.

Esdaraas a xeɗana we tooñna

⁵ Na waxtu faa na sadax fee no kirand ne, sutooxaam na neewandax es soo inoox, maad o saqaa toki es fo sabadoor es paarooxu. Naagaam giriƥ gooknoox, letin xa ƥay es farna fo o Yaal oxe Roog es

⁶ soo lay ee: «Roog es, mexey na gaci too sedaam o yoɗ mukit es farna fa wo, wo Roog es, yaam pakaad in kaa ngartat a in took, soo tooñ in a cokrandoor boo na asamaan.

⁷ No kaa xotitna no camaane kaa no daan in boo xaye tooñ in a magna lool, too pakaad in taxu i ƥoxotel, in fo maad in fo saasadax in, na xa ƥay no maad jan, ndax i mbarel, ƥisel took o hup doole, ngefel soo neewandel, ne ta maadna o refaa boo xaye.

⁸ Ndiiki koy, o Yaal oxe Roog in a soga o yirim a in, ye ta xaƴna leng-leng waa maadna ñoowaa na xeet fee in soo a ci a in ngenand kam saate fa tedu fee ten, ndax ta xooland a kid in soo a ɓaat a in doole kam mbaƭ ne in.

⁹ Faɗ i ndefu, ndaa kam mbaƭ ne in Roog in waasee a in. A fi’a boo maad we Persi a lal a in o paaxel, a nqaƴ a in i ñoowatin. A ci’a a in i maxatin Mbind ne Roog in, yoɗatin kefatin ke ten, soo a ci a in o laqooxand o wooru kam Yudaa fa Yeerusaleem.

¹⁰ Ndiiki koy, wo Roog in, xar i laykaa a cinj kaaga? Yaam i mbaasa kebil ke wo

¹¹ dalnan’oona a in na pexey duleer we dag of, ye layoona yee: ‹Saax le nu ndokkaa, ndax nu njegin, kaa roɗgandtel nqoolaƭar ne no qeet ke no jegel oleene mayƭandtuuna bo ta xet a pi a cednooxu ke den.

¹² Yaaga boog, ba nu ci xa ƥiy xa koor axe den xa ƥiy xa tew axe nuun too ba nu ngilgan xa ƥiy xa koor axe nuun xa ƥiy xa tew axe den. Ba a ƭat nuun a yong muk na baneex den fo ke faaxna na den. Neene, xan nu njeg doole, ñaamaa ke moƴna faax no saax le, nqaƴanin xa taan nuun nen lam boo kili.›

¹³ Fop ke dalna a in o ngar fo a pi a paaxeer ake in fo tooñ maak ne in oo. Yaag oo toox de, wo Roog in, xawiro a in ne ta jagritna fo njofaƭar in too xaƴaa o yoqatin onqene na xeet fee in.

¹⁴ Yaaga koy, ndax xan i ƭapahin kebil of soo ngiɓoor no ndolnir fo qeet keene na mbi’aa cednooxu? Ndax fuuxankoogiro a in boo saŋik a in, fañ o xaƴan a in yoqatin fo waa mucna?

¹⁵ O Yaal oxe Roog fee Isra’el, kaa o jof, yaam xaye kaa i yoqat onqaa mucna. In wey mbaambir of, sufoox tooñ in, too o leng waagee o geenoor neene mbaambir of.»