Esdaraas 8 - NQAARIIT NE ROOG

Yoon we Esdaraas

¹ Weeke ndefu yaal ƥasil ke fo daan den inoortiidna fa mi Babilon ye Artaserkesees a madooxaa:

² Na xa taan axe Finees: Geersom, na xa taan axe Itamaar: Dañel, na xa taan axe Dawid: Hatus, o ƥiy Sekaniya,

³ na xa taan axe Paros: Sakari fee yooniidna fo ƥasil naa fi’na goor teemeed fo goor qarɓeen ƥetik,

⁴ na xa taan axe Pahat-Mowaab: Eliyohenay fee o ƥiy Serahiya yooniidna fo goor teemeed ƭik,

⁵ na xa tan axe Satu: Sekaniya fee o ƥiy Yahasi’el yooniidna fo goor teemeed tadik,

⁶ na xa taan axe Adiin: Ebed fee o ƥiy Yoonatan yooniidna fo goor qarɓeen ƥetik,

⁷ na xa taan axe Elam: Yesaya fee o ƥiy Ataliya yooniidna fo goor qarɓeen ɓetuu ɗik,

⁸ na xa taan axe Sefatiya: Sebadiya fee o ƥiy Mika’el yooniidna fo goor qarɓeen ɓetuu daduk,

⁹ na xa taan axe Yowab: Abjaas fee o ƥiy Yehi’el yooniidna fo goor teemeed ƭik fo goor xarɓaxay fo goor ɓetuu daduk,

¹⁰ na xa taan axe Bani: Selumit fee o ƥiy Yosifiya yooniidna fo goor teemeed fo goor qarɓeen ɓetuu fa leng,

¹¹ na xa taan axe Bebay: Sakari fee o ƥiy Bebay yooniidna fo goor qarɓeen ƭik fo goor ɓetuu daduk,

¹² na xa taan axe Asgad: Yohanan fee o ƥiy Hakatan yooniidna fo goor teemeed fo goor xarɓaxay,

¹³ na xa taan axe Adonikam: we moƴna o ndef xa teɓ too a ne’el Elifelet, Ye’uwel fa Semaya yooniidna fo goor qarɓeen ɓetuu fa leng,

¹⁴ na xa taan axe Bigway: Utay fa Sabud yooniidna fo goor qarɓeen ɓetuu ɗik.

A cagandax ale na ñaaƈ ale jaginna Yeerusaleem

¹⁵ Fokataam a den paam o xuluɓ olaa sagna farna fa Ahawa, too i ndala maaga boo ñaal tadik. Horooxaam xeet fee fo saasadax we, ndaa ga’iim na den o Leelewi leng.

¹⁶ Maaga, xoynaam kelfa ke ndeeƭna Eliyeseer, Ari’el, Semaya, Elnatan, Yarib, Elnatan, Natan, Sakari fa Mesulam fo jaajangin we ndeeƭna Yoyarib fa Elnatan.

¹⁷ Lulaam a den maa Ido fee reeƭna kelfa kam Kasifiya. Layaam a den da laamit a Ido fo fog um we ndeeƭna diidimle we no Mbind Roog ne ngen’ina Kasifiya, ndax da lultiid a in diidimle no Mbind ne Roog in.

¹⁸ Ne Roog a reeƭna fa in no paaxel um, a lultiida a in a Serebiya fee o koor o cegu yiif oxaa fogna na xa taan axe Maxli fee o ƥiy Lewi fo o ndaan Isra’el, fo itam xa ƥeem xa koor fo fog um, da ndef goor xarɓaxay fo goor ɓetuu daduk.

¹⁹ A lultiida itam a Hasabiya fa Yesaya mbogna na xa taan axe Merari fo fog Yesaya fo xa ƥiy den xa koor, da ndef goor qarɓeen ƭik.

²⁰ A lultiidahina diidimle teemeed ƭik fo diidimle qarɓeen ƭik no Mbind Roog ne waa ndeeƭna xa taan no we Dawid fo kelfa ke ten a ndalin’ina, ndax da ndimle’aa Leelewi we. A kon den fop kaa mbind’el.

²¹ Maaga, paam o xuluɓ olaa Ahawa heblitaam koor, ndax i neewandoox mbaambir Roog in, nqeɗin ta ci a in, in fo xa ƥiy in fo o jeg in fop, a ñaaƈ a pelu.

²² Sedkoogaam o laamit o maad oxe o njengel fo ŋaaŋaay pis, ndax da saytoox a in no fañ we na ƭat ale, yaam kaa i lay’u o maad oxe yee: «Roog in kaa saytooxaa no paaxel um fop we na mbaaƭan, ndaa fuux um kaa dalaa fa doole took no we na mbaasan.»

²³ Ten taxu i ngoor soo ƈufginoox a Roog in, too a jaɓa a qeƭ ale in.

²⁴ Jilaam xarɓaxay fo ɗik a ndeer aa-adax we no saasadax we fa Serebiya fa Hasabiya fo xarɓaxay no fog den.

²⁵ Eedaam mbaambir den xaaliis fee, wurus fee, xa ƥaxañ axe o maad oxe, aa-as we ten, kelfa ke ten fo Ii-isra’el we ngenoogna maaga fop a ci’it’ina nen sadax no Mbind ne Roog in.

²⁶ Ɓoxotaam a den ngap parig teemeed ƭik fo parig qarɓeen ƭik fo barig leng xaaliis fa nqoolu, ngap parig qarɓeen tadik fo parig nahik xa ƥaxañ axaa mbi’teena xaaliis, ngap parig qarɓeen tadik fo parig nahik wurus,

²⁷ a tokol wurus qarɓeen ƭik akaa mbodirna fo xa monjong wurus juni fo xa ƥaxañ xa ƭaq xa pi’te xanjar fa mosu faa na meleƈaa, a njar nen wurus.

²⁸ Cinj kaaga, layaam a den ee: «Ne nu kesanteena o Yaal oxe, neene xa ƥaxañ axene a kesante o ten, soo xaaliis fee fa wurus fee a ndef sadax no fud o letu no Yaal oxe Roog fee no daan nuun.

²⁹ Yetooxyo too ngeek a den a paax boo yaa nu eedkaa a den mbaambir aa-adax we no saasadax we, Leelewi we fo yaal ƥasil ke Isra’el, kam Yeerusaleem, no tok ke no Mbind ne no Yaal oxe.»

³⁰ Maaga, saasadax we fo Leelewi we a ndaawa xaaliis fee, wurus fee fo xa ƥaxañ axe eed’eena, ndax da ƥis a den Yeerusaleem, no Mbind ne Roog in.

A ñaaƈ ale fo a padiid ale kam Yeerusaleem

³¹ I inoora no xuluɓ olaa Ahawa no ñaal xarɓaxay fo ñaal ƭikandeer ne no nqool o eetaand onqe, ndax i ndet Yeerusaleem. Roog in a reeƭa fa in too a guutatiranda a in fo fañ we fo pog ke na ƭat ale.

³² Ye i mbadiidna Yeerusaleem, i ñootnooxa maaga ñaal tadik.

³³ No ñaal nahkandeer ne i eeda kam Mbind ne Roog in xaaliis fee, wurus fee fo xa ƥaxañ axe soo ƥoxot a den a Meremot fee o saasadax, o ƥiy Uriya. A jega maaga itam a Eleyasaar fee o ƥiy Finees, Leelewi we ndeeƭna Yosabad fee o ƥiy Yesuwa fa Nowadiya fee o ƥiy Binuy.

³⁴ Ye fop a limeena, a eedel, o meɗel ole fop a binde.

³⁵ We ƥis’eena took o hup doole too a nomtoortiid no mbaƭ naa a ƥoxota a Roog fee Isra’el nen sadax fa ndoxel: Qoox xarɓaxay fo qoox ƭik na kon no Ii-isra’el we fop, a suk paal qarɓeen ɓetuu nahik fo a suk paal ɓetaa fo leng, fo mbaal qarɓeen ɓetuu ƭik fo fo mbaal ɓetuu ƭik fo a suk xarɓaxay fo a suk a ƭak nen sadax fa mbaasnoor pakaad, fop a ƥoxotel o Yaal oxe nen sadax fa ndoxel.

³⁶ Cinj kaaga, a ndaawna we ndefanna o maad oxe fo gofornoor ke no mudand ne no xuluɓ ole Ofrat bargal ke no maad oxe, too weene a ndamta xeet fee fo Mbind Roog ne.