Esdaraas 7 - NQAARIIT NE ROOG

Esdaraas a fadiida Yeerusaleem

¹ Ye keene faafna, a jopir Artaserkesees a refaa o maad Persi, a jeg’a o koor oxaa ne’eena Esdaraas, a ref o ƥiy Seraya, Seraya a ref o ƥiy Asariya, Asariya a ref o ƥiy Hilkiya,

² Hilkiya a ref o ƥiy Saalum, Saalum a ref o ƥiy Saadok, Saadok a ref o ƥiy Ahituub,

³ Ahituub a ref o ƥiy Amariya, Amariya a ref o ƥiy Asariya, Asariya a ref o ƥiy Merayot,

⁴ Merayot a ref o ƥiy Serahiya, Serahiya a ref o ƥiy Usi, Usi a ref o ƥiy Buki,

⁵ Buki a ref o ƥiy Abisuwa, Abisuwa a ref o ƥiy Finees, Finees a ref o ƥiy Eleyasaar, Eleyasaar a ref o ƥiy Aaroon fee o saasadax o maak oxe.

⁶ Esdaraas feene a inoortiida Babilon. Kaa reeƭu o piibind oxaa andna a paax kebil ke Moyiis o Yaal oxe Roog fee Isra’el a cooxit’ina. O maad oxe a ci’ooga a Esdaraas fop ke ta xeɗoogna, yaam o Yaal oxe Roog um a reeƭa fo ten.

⁷ Jaaku no Ii-isra’el we, no saasadax we, no Leelewi we, no giigim we, no yeeyetax we na xa ton-maax axe no Mbind Roog ne fo no diidimle we no Mbind Roog ne a ndeta itam Yeerusaleem no hiid ɓetuu ɗikandeer ole no maat Artaserkesees.

⁸ Esdaraas a fadiida Yeerusaleem no nqool o ƥetkandeer onqe no hiid o ɓetuu ɗikandeer ole no maad oxe.

⁹ A inoor’a Babilon no ñaal eetaand ne no nqool o eetaand onqe soo a fadiid Yeerusaleem no ñaal eetaand ne no nqool o ƥetkandeer onqe. Roog a saytooxa a Esdaraas a paax,

¹⁰ yaam no xeeñ um fop kaa aqatooxoogu kebil ke no Yaal oxe, a reefaa a den soo a jangnaa kam Isra’el ke o Yaal oxe a dalinna fo ke ta simitna.

A toq ake Artaserkesees a doxinna a Esdaraas

¹¹ Keeke refu yiƥadax ne no leetar ole o maad Artaserkesees a cooxna a Esdaraas fee o saasadax, too a ref itam o caajangin oxaa na aqatinaa ke o Yaal oxe a heblitna fo ke ta dalnanna a Isra’el:

¹² «Artaserkesees, o maad oxe no maad we, na simnaa a Esdaraas fee o saasadax oxaa andna a paax kebil ke Roog fee na asamaan fo lakas fo lakas…

¹³ Heblitaam, ndax Ii-isra’el we fop, saasadax we den fo Leelewi we den ngenna no maat es too a mbug o ndet Yeerusaleem a yoon fa wo.

¹⁴ Mi fa xoox es fo aa-as ɓetuu ɗik we mi na lulang Yudaa fa Yeerusaleem, ndax o ɗeetaqinik ne kebil ke na Roog of saqoona a ndeefteel maaga.

¹⁵ Wo gadne o ɓis itam xaaliis fee fa wurus fee o maad oxe fo aa-as we ten a ƥoxotna a Roog fee Isra’el, ngenand um a refna Yeerusaleem.

¹⁶ Fat o ɓis itam xaaliis fee fa wurus fee fop o daawitkaa no jegel ole Babilon fop fo ci’it o fud o letu ke xeet fee fo saasadax we a mbi’ankaa Mbind ne na Roog fee den kam Yeerusaleem.

¹⁷ Fat o jikit xaaliis feene deŋ qoox, a suk paal, fo mbaal, sadax tuufe-duufe ke fo sadax biiñ ke da mbareena o yoonandit soo ɓoxot a den took o sadaxand olaa no Mbind ne na Roog nuun kam Yeerusaleem.

¹⁸ Ke na yoqkaa na xaaliis fee fa wurus fee koy, nu mbaagaan o njiriiñoorit nuu jofooxna a nuun, wo fo fog of, ndeefandin no bug ole Roog nuun.

¹⁹ Fat o diƈ mbaambir Roog fee Yeerusaleem ƥaxañ ke o cooxkeel yaam a ƥadax ale no Mbind ne na Roog of.

²⁰ Xan o xotit na kamba le no maad oxe ke helna no ñake-ñake lakas ke waroona o fi no Mbind ne na Roog of.

²¹ Mi o maad Artaserkesees, mexe heblaa geegeek xaaliis we no mudand ne no xuluɓ ole Ofrat fop da mbi deŋ fop ke Esdaraas fee o saasadax, too a ref itam o caajangin oxaa andna a paax kebil ke na Roog fee na asamaan a laackaa a den.

²² A mbaaga o cooxit boo no parig qarɓeen tadik fo parig nahik xaaliis, parig teemeed nahik bele, xa liitar cuni nahik fo xa liitar teemeed nahik biiñ fo xa liitar cuni nahik fo xa liitar teemeed nahik diwliin, soo no fo jem ole koy jegkee hap.

²³ Fat fop ke Roog fee na asamaan a heblitna a fi’tel neen no Mbind ne ten, ndax fuux le ten biltooxankee maat ne fo o maad oxe fo xa taan axe ten.

²⁴ Mexe heblahinaa yee baa a bateer, juuti fo ndabid a ñaaƈ a ndabdinooxel saasadax we, Leelewi we, giigim we, yeeyetax we na xa ton-maax axe, diidimle we fo dag we no Mbind Roog neene.

²⁵ Wo Esdaraas o mat, na pexey o and ole Roog a ci’oonga, dalni haahate fo kelfa. Fat da ngate’aa xeet fee fop ngenna no mudand ne no xuluɓ ole Ofrat too a and kebil ke na Roog of. We andeerna kebil ke koy, o andnoorin a den.

²⁶ Oxuu gaykeerna deŋ kebil ke na Roog of fo ke no maad oxe, xan a hate’el, ndax ta warel mbaat ta sutel saax laa mbaat ta maalel mbaat ta wegel kaso.»

Esdaraas oxe simataa a Roog

²⁷ Esdaraas a falalooxa yee: «A simat a hela o Yaal oxe Roog fee no daan in riñna o maad oxe ta niwit neene Mbind ne no Yaal oxe refna kam Yeerusaleem.

²⁸ A fi’a itam o maad oxe, aa-as um fo kelfa maak ke ten fop a mbaax na mi. Ne o Yaal oxe Roog es a reeƭna fa mi, saƭakinooxaam too fokataam kelfa ke Isra’el, ndax da yooniid fa mi.»