Esdaraas 10 - NQAARIIT NE ROOG

Ii-isra’el we a ndaxa rew jan we da ngilig’ina

¹ Ye Esdaraas a xeɗaa, a weejlaa pakaad ke na xeet fee, a yoonandtin xa lool, a gung mbaambir Mbind Roog ne, faan no Ii-isra’el mayu, goor fo rew fo xa caaƈ, a mbokatoora paam um soo a mbaɗooxaa den fop.

² Maaga, Sekaniya fee o ƥiy Yehi’el too a ref o ndaan Elam a laya a Esdaraas ee: «I tooña a Roog in, ye i ndolnirna fo rew jan waa mbogna no qeet ke no saax le. Kaa koy, keene yaqanee Ii-isra’el we a maad o njegaa yaakaar.

³ Ndiiki koy, fat i ngiɓoor fa Roog in ee xan i ndax rew weeke fop fo xa ƥiy den, ne astanoona a in, wo o yaal es fo we mbootooxna kebil ke Roog in. Fat kebil ke a ngayel.

⁴ Inooxi, yaam refaa teen tig, too xan i ndamtong. Saƭakinooxi, fi tig.»

⁵ Maaga, Esdaraas a inooxa, a daaɓooxnoor aa-adax we no saasadax we, we no Leelewi we fo we na xeet fee fop ee xan a mbi ke layeena, too a ndaaɓooxaan.

⁶ Esdaraas a inoorta mbaambir Mbind Roog ne, a ret na ndok alaa Yohanan fee o ƥiy Eliyasib. Ye ta rokna kam faa ñaamee mbuuru too yeree foofi, yaam a naqadiloox no ngore’aƭar ne no we nomtoortiid’ina no mbaƭ naa.

⁷ A yegnite kam Yudaa fa Yeerusaleem ee fat fop we nomtoortiid’ina no mbaƭ naa a mbokatooriid Yeerusaleem.

⁸ Kelfa ke fo maak we a ndalin’a yee oxuu gareerna maaga ndeer mene fo ñaal tadik, o jeg um fop xan a siiseerel, soo ta sutel no mbokatax ne no we nomtoortiid’ina no mbaƭ naa.

⁹ Goor we Yudaa fo we Bensame fop a mbokatooriida Yeerusaleem no ñaal tadik ke. Kaaga oxe reeƭa no ñaal qarɓeen ƭikandeer ne no nqool o ɓetuu nahkandeer onqe. Xeet fee fop kaa ngeenoox’u na baayo fee no Mbind Roog ne, a sendaa yaam ke xew’ina fo yaam a teƥ ale.

¹⁰ Esdaraas fee o saasadax a inooxa, a lay a den ee: «Nu mbi’a cageer, ye nu ndolnirna fo rew jan, soo ƥaat neene tooñ ne Isra’el.

¹¹ Ndiiki koy, mbeejilyo tooñ nuun o Yaal oxe Roog fee no daan nuun soo mbadin o bug ole ten. Nqaajooryo fo qeet ke no saax lene fo rew jan we.»

¹² Mbokatax naa fop a ndoona a maak ee: «Ndigil kak oo! In kañ mbaru o mbi ne laytanoona.

¹³ Kaa koy, xeet fee kaa may, too tafil waagaand o ref yaam a teƥ ale. Kaa jolna keene sax, kene waagaand o fi ñaal leng mbaat ñaal ƭik, yaam mayu na in a mbakaada teen.

¹⁴ Fat kelfa ke in a ndefan mene boog mbokatax ne fop, soo fop we ngiligna rew jan no teeru ke in a ngaraa na waxtu fee da ndalnankeel, a yoontiid maak we fo haahate we na teeru fuu refna, boo yaa fuux ɗomu le Roog in, kene a garitna, a ɓooskaa na in.»

¹⁵ Yoonatan fee o ƥiy Asa’el fa Yaseya fee o ƥiy Tikwa a mbaña kaaga, soo Mesulam fa Sabetay fee o Leelewi a ndamit a den.

¹⁶ Kaa koy, lakas we nomtoortiid’ina no mbaƭ naa a mbi’a ke lay’eena. Esdaraas fee o saasadax a jila na qaw aluu refna yaal ƥasil, a ne a kon den fop. Goor waaga a mbokatoora no ke xotitna no ñaal eetaand ne no nqool xarɓaxayandeer onqe, ndax da ƥaal tige.

¹⁷ No ñaal eetaand ne no nqool o eetaand onqe no hiid olaa took um a sogu o ƈutoor fo goor we ndolnir’ina fo rew jan fop.

A kon ake no we tooñna

¹⁸ A ndeer saasadax we ndolnir’ina fo rew jan a jeg’a: Na xa taan axe Yesuwa fee o ƥiy Yosadak fo na xe no fog um: Maseya, Eliyeseer, Yarib fa Gedaliya

¹⁹ ndaaɓoox’ina, a njoox a Roog ee xan a ndax rew we den soo a ƥoxot suk mbaal nen sadax fa nqendandoor no tooñ den,

²⁰ na xa taan axe Imer: Hanani fa Sebadiya,

²¹ na xa taan axe Harim: Maseya, Eliya, Semaya, Yehi’el fa Usiya,

²² na xa taan axe Pasehuur: Eliyohenay, Maseya, Isma’el, Netanel, Yosabad fa Elasa.

²³ A ndeer Leelewi we a jeg’a: Yosabad, Simey, Kelaya fee xoyoogeena itam Kelita, Petahiya, Yudaa fa Eliyeseer.

²⁴ A ndeer giigim we no Mbind Roog ne a jeg’a a Eliyasib. A ndeer yeeyetax we na xa ton-maax axe no Mbind Roog ne a jeg’a: Saalum, Telem fa Uri.

²⁵ A ndeer Ii-isra’el lakas we a jeg’a: na xa taan axe Paros: Ramiya, Isiya, Malkiya, Miyamin, Eleyasaar, Malkiya fa Benaya,

²⁶ na xa taan axe Elam: Mataniya, Sakari, Yehi’el, Abdi, Yeremot fa Eliya,

²⁷ na xa taan axe Satu: Eliyohenay, Eliyasib, Mataniya, Yeremot, Sabad fa Asiisa,

²⁸ na xa taan axe Bebay: Yohanan, Hananiya, Sabay fa Atlay,

²⁹ na xa taan axe Bani: Mesulam, Maluk, Adaya, Yasub, Se’al fa Yeremot,

³⁰ na xa taan axe Pahat-Mowaab: Adna, Kelal, Benaya, Maseya, Mataniya, Besalel, Binuy fa Manaase,

³¹ na xa taan axe Harim: Eliyeseer, Isiya, Malkiya, Semaya, Simewon,

³² Bensame, Maluk fa Semariya,

³³ na xa taan axe Hasum: Matenay, Matata, Sabad, Elifelet, Yeremay, Manaase fa Simey,

³⁴ na xa taan axe Bani: Maday, Amram, Uwel,

³⁵ Benaya, Bediya, Keluhu,

³⁶ Waniya, Meremot, Eliyasib,

³⁷ Mataniya, Matenay, Yaasay,

³⁸ Bani, Binuy, Simey,

³⁹ Selemiya, Natan, Adaya,

⁴⁰ Maknadebay, Sasay, Saray,

⁴¹ Asarel, Selemiya, Semariya,

⁴² Saalum, Amariya fa Yoseef,

⁴³ na xa taan axe Nebo: Ye’iyel, Matitiya, Sabad, Sebina, Yaday, Yowel fa Benaya.

⁴⁴ Weene fop kaa ndolnir’u fo rew jan too a ndaxa a den, den fo xa ƥiy den.