Esdaraas 1 - NQAARIIT NE ROOG

Kiirus a jaɓa Mbind Roog ne a maxatinel

¹ No hiid o eetaand ole no maat Kiirus fee o maad Persi, o Yaal oxe a fosooxa fadand ke ta yegnit’ina, a reefandin no tuleer Yeremi. A ci’a a Kiirus yiif, ta simit o lambnanel, a bindel itam, ndax maat um fop a yeg kene:

² «Keeke refu ke Kiirus fee o maad Persi a layna: O Yaal oxe Roog fee na asamaan a ɓoxotaxam maat ke na adna fee fop. A heblaxam um maxanin Mbind Yeerusaleem kam Yudaa.

³ Oxuu fogna na xeet um na nuun, yaasam Roog a ref fo ten, fat a nomtoox Yeerusaleem kam Yudaa, ndax ta maxatinik Mbind ne no Yaal oxe Roog fee Isra’el, Roog fee refna Yeerusaleem.

⁴ No mbiñ onquu ke yoqna na xeet fee no Yaal oxe a ndefna, wiin we maaga a mbara o ci a den xaaliis, wurus, kalal pogreer, cegel fo itam sadax kaa da mbi’oogna no fud o letu no Mbind Roog ne Yeerusaleem.»

⁵ Maaga, yaal ƥasil ke na carind ale Yudaa fo we na le Bensame, saasadax we fo Leelewi we, fop we Roog a wet’ina a yiif den, a inooxa, ndax da maxatinik Mbind ne no Yaal oxe kam Yeerusaleem.

⁶ Gentand den fop a ci’ooga a den xa ƥay no kuu refna, na xa ƥaxañ axaa mbi’teena xaaliis mbaat wurus, kalal lakas, tikoorik cegu njiriiñ fo cegel, fogreerna fo sadax ke da mbi’oogna fop no fud o letu.

⁷ O maad Kiirus fa xoox um a dakna xa ƥaxañ axe no Mbind ne no Yaal oxe Nebukadnesaar a xotit’ina Yeerusaleem soo a ɓek a den no faɗoorand ole roog um.

⁸ Kiirus fee o maad Persi a hebla a Mitredat fee o keegeek oxe na xaaliis fee ta sut xa ƥaxañ axe ta limna soo a ɓoxot a den a Seesbasar fee o kelwaar Yudaa.

⁹ Neeke a mbod’u: Fo ndoon wurus qarɓeen tadik, fo ndoon xaaliis juni, capil qarɓeen ƭik fo capil ɓetuu nahik,

¹⁰ a tokol qarɓeen tadik wurus fo a tokol teemeed nahik fo a tokol xarɓaxay xaaliis a ndeef, soo xa ƥaxañ juni xa lakas a ndoonu.

¹¹ Xa ƥaxañ wurus fa xaaliis axe fop a ndeeƭa cuni ƥetik fo teemeed nahik. Seesbasar a ɓislooxa a den fop, ye we ƥis’eena took o hup doole a inoorna Babilon, a nqaadaa Yeerusaleem.