Esayi 9 - NQAARIIT NE ROOG

¹ Xeet fee na ñaaƴaa kam o niɓaan ole xan a nga a qoolaand a maak. Took no waa ngenna kam a pelyook ale na fa nqon fee, xan a qoolaand a meleƈ.

² O Yaal oxe, mayƭandaa xeet fee fa baneex, ci’in o ɗaay o maak. Kaa mbelakinooxaa mbaambir of ne o kiin a felakinoortaa yaa fo a saxad, nen xa ƈeel no waa na lasraa ke da njaɓitna na xire.

³ Yaam kadoor ke da ngadneena fo o cap ole da nqawteel no ndiiñ fo o samb ole no xe na ñaatlandaa a den, xan o yaq a den, nen a koom alaa fo ñaal naa Majan.

⁴ O ñaaƭ o xire’te luu na dakaa no lanq ke fo ndikoorik nuu taƥna fo’oy, xan a ndeɓel kam ƈulfaan, ndax da ndoxel boo riw.

⁵ Yaam i ndimane o ndeɓandoong, i ci’e o ƥiy o ngoor! A gadooxa sañ-sañ, too kaa xoyeel: o Aa-as, Com’andtu, Roog, o Cegu Doole, Faap fee na refkaa boo faw, o Kelwaar Jam.

⁶ Sañ-sañ um kaa magin, too jam fee xan a gen cay took uum-maamaad le Dawid fo no maat um. Xan a sinjtel soo a saƭkandtel a ƭat fo o cofel, ndiiki bo na moos boo moos. Keene o mat o Yaal oxe Hupna fop a fi’kaa kam o mbeq o naalu nqe ten.

O ɓay ole no Yaal oxe a yoɗooxa

⁷ O Yaal oxe a lulta o ñuxur na Yakoob, fa lay um a yen na Isra’el.

⁸ Xeet fee fop a nga’a ta fadnoox, bo na Efrayim fo we ngenna Samari, ndaa a laya fo o nga’atinax fo xeeñ magnandooxu yee:

⁹ «A muul ake a yena, ndaa xan i maxatinit fo a ƥil a sexe. A qanq mbaƭat ake a ndaƈte, ndaa xan i ndondandit a den a qanq ndaxar seedar.»

¹⁰ Maaga, o Yaal oxe a saƭakina noon we Isra’el soo a soob fañ we ten ndefna:

¹¹ Aa-araam we no batand fo Fiifilista we no mudand, da listir a Isra’el. Kaa koy, keene fop taxkee fuux le no Yaal oxe a ɓoos, too o ɓay um ole yoɗooxa boo fa ndiik.

¹² Xeet fee nomtooxiidee me no xe na yaran, waaƭee o Yaal oxe Hupna fop.

¹³ Ten taxu o Yaal oxe a ɗega xoox le fo a las ale Isra’el, ngeec oo xeet oo, no ñaal leng kut.

¹⁴ Maak we fo kelfa ke ndefu xoox le, soo duleer we na njangnaa xa maaƥ a ndef a las ale.

¹⁵ Ɗooɗox we na xeet fene kaa mo’and’un, soo a nduuxnoor a den a koƥ.

¹⁶ Ten taxu o Yaal oxe wuus’ee mbes ke den too yirim’ee xa baan axe den fo ñaaw we den, yaam den fop kaa njofaƭar, a soxod, too laykee jam muk. Keene fop koy taxee fuux le no Yaal oxe a ɓoos, too o ɓay um ole yoɗooxa boo fa ndiik.

¹⁷ A woora yee, kañaan ne xan a dox nen takar-ñiig fo tomb kaa fiɗel a raaɓaa. Xan a kaƥ nen o ñaay olaa na raaɓaa suungaan niɓu, soo a fi a eel fo suun akaa na yoɗooxaa.

¹⁸ Saax le xan a raaɓel na pexey fuux le no Yaal oxe Hupna fop, soo xeet fee a ref muud fiɗel le. O leng yirimkatee o pog um.

¹⁹ Xan a ƭipit na ñamaak, ndaa watinkee nqeex, a seel na janoon, ndaa taxkee giñ a ref meen. Oxuu refna xan a ñaamaa o pog um.

²⁰ Xan a carind ale Manaase a listaa ale Efrayim, a carind ale Efrayim oo a listaa ale Manaase, soo den ɗik fop da tapoor, a song a Yudaa. Kaa koy, keene fop taxkee fuux le no Yaal oxe a ɓoos, too o ɓay um ole yoɗooxa boo fa ndiik.