Esayi 66 - NQAARIIT NE ROOG

Dag ndigil we fo dag refee ndigil we

¹ Keeke o Yaal oxe a layu: «Asamaan fee refu uum es, soo lanq ke a ndef o dakand es. Mbind nandu num nu maxankaxam? Ndi mam na refkaa o ñootnoorand es?

² Keene fop o ɓay es fi’un, too neene a sakoortu. Kaa koy, ke haalaxama refu o toroxu xe gooyna, a nan-gilooxaa fa lay es fo diid soo a sendaa.

³ Oxe na sadaxtaa nqoox soo a war itam o kiin, oxe na sadaxtaa mbaal soo a gef itam o ɗuk o ɓox, oxe na sadaxtaa tuufe-duufe soo a ɓoxot itam fo’oy ruul, oxe na doxaa cuuraay soo a faɗooxaa itam pangool ke, weene wiin a ƭat ale felna a den a njilu. Feek paaxaƭaru keene felu a den,

⁴ mi itam, xam sawar no xijil a den soo ɓisiid me den paaxeer kaa da saɗarna, yaam kaam xoy, ndaa o leng na den jaaɓee, um lay fa den, da mbañ o nan-giloox. Ke faaxeerna na kid es doŋ a mbi’u, too ke feleeraxama a njilu.»

Ƈufig ne fa hate fee no Yaal oxe

⁵ Nan-gilooxyo ke o Yaal oxe a layna, nuun we na sendaa yaam diid yaa nu ndaawna fa lay um: «Fog nuun we sibna a nuun soo a ndaxaa a nuun yaam gon es kaa nqaadnoortaa a nuun ee: ‹Fat o Yaal oxe a lalit o ndam um, too yaaga xan i nga o ɗaay nuun!› Ndaa kañ, den o mat na neewandkeel.»

⁶ Nan-gilooxyo fangax lene na inoortiidaa na teeru fee, a hatiid no Mbind Roog ne: O Yaal oxe na ɓoxotaa fañ um ke jagna fa den.

⁷ «Ye ta helkaa fo gaajoox, a ñoota, ye xa ƭomel axe a ngelkaa fo ngar, a soƥa ta ñoot o ƥiy o ngoor!

⁸ An mosu o nan tig nandu neene? An mosu o ga kaa nandna fo keene? Ndax saax muum a waaga xes a xes a rimel? Ndi xeet fa muum jaf leng kut a rimandooreel? Yaag oo toox de neene a reftu na Siyoŋ. Ye ta helkaa fo yeg xa ƭomel gaaj axe, a ñoota xa ƥeem.»

⁹ O Yaal oxe kaa tee: «Ndax xam gaajin boo ƴut soo xañit o njaaƈ onqe a ñootel?» Roog of kaa tee: «Mi fee na jagandaa o rimel, ndax xam xañit ta jeg?»

¹⁰ Nuun we mbexna a Yeerusaleem, mbelakinooxyo fo ten, may fo o ɗaay yaam o ten. Nuun fop we ñaawooxoogna yaam taamaala fee dal’uuna, nqaajiryo fo ten ndiiki o ɗaay ole hitatirna.

¹¹ Neene, xan nu ngiñ tem na yaalax ake ta yaalaa a nuun, soo mbelakinooxaa no ndam o mayu muut onqe ten nen xa qeq axaa ya den a numinna bee tem.

¹² Keeke o Yaal oxe a layu deŋ: «Xam ɓakandiid farna fa Yeerusaleem jam fee nen o xuluɓ fo o ndam onqe na saax ake nen a ƈufnand alaa balna. Xan nu numnel, mbaxooxel soo ƥopel.

¹³ Iyo, ne o ƥasil a yaaltaa o ƥeem, mi itam xam yaal a nuun, xam yaal a nuun kam Yeerusaleem.

¹⁴ Iyo, xan nu nga keene, too a qeeñ nuun xan a ndef no ɗaay, soo xa kiiƈ axe nuun a ñoowatin, nen daaƭ laa na suuƴaa no ndiig.» O Yaal oxe xan a lal dag um a ñamaak um, soo fañ we ten, ta lal a den fuux ɗomu le ten.

¹⁵ O Yaal oxe xey garaa kam fiɗel, a sareet-xire ke ten a nandtaa a und a cegu doole. Fuux ɗomu le ten xan a biltoox nen ƈulfaan fiɗel, soo ta fadin a qaw ale ten kam aal fiɗel.

¹⁶ O Yaal oxe xan a hate’it wiin we fop fiɗel fo laƥ, too xan a saŋik jaaku na den.

¹⁷ We um ne’aa mene ndefu we na tedlandooxaa, a nqoolandooxaa, ndax da ndok na ƭing pangool ake, a mbid oxe fodna a ndeer, a ñaamaa ruul mbaat a pom mbaat tiimbel lakas kuu ndefna. Weene wiin xan a moocandoor jaf leng. O Yaal oxe o mat layun,

¹⁸ ten oxe andna a pi den fo a qalaat den. O Yaal oxe kaa tee: «Mexey garaa fokatiid wiin inooru na xeet fuu refna fo na lak fuu refna, ndax da mbuudaa o ndam es.

Mbokatoor maak mbalakaand ne

¹⁹ Xam doon me den o anddiloor sañ-sañ es soo lul no weene ƥostooxna me no qeet ke Tarsis, Puut, Luud, Mesek, Tubal fa Yawan fo na pimb ake liitooxna, muu andoona yee mosee o nan paru na mi too mosee o nga o ndam es. Weene hebluuma xan a mbeeñil qeet keene o ndam es.

²⁰ Xan a nomtiid fog we nuun fop ndeeƭna ndeer a saax ake fop. Xan a ƥistiid a den pis mbaat a sareet-xire mbaat a sareet a ƭiife mbaat koŋka mbaat keeleemb boo no joong o tedu le mi refna Yeerusaleem. Keene o Yaal oxe a layu. Keene na refkaa sadax den fa mi, too xam jaɓin nen sadax tuufe-duufe kaa Ii-isra’el we a ƥisiidaa kam Ngenand ne mi na xa ƥaxañ axaa nqoolandeena.

²¹ Xam fi’in boo jil no qeet keene saasadax fo Leelewi.» Keene o Yaal oxe a layu.

²² «Ne asamaan fa nqas fee fo lanq qas ke um sakatinkaa a miñitkaa mbaambir es, neen xa taan nuun fo a kon nuun a miñitkaa.» Keene o Yaal oxe a layu.

²³ «Neene, no nqool o ndeɓ onquu refna fo na bes a ñootnax aluu refna o kiin oo kiin xan a garaa, a gung mbaambir es.» Keene o Yaal oxe a layu.

²⁴ «Maaga, a sutooxangaa, xan a nga’aa xa tal axe no wiin we siiknoor’ina fa mi. Ngusax ne na ŋereñaa a den xonkee, fiɗel le na raaɓaa a den ñufkee muk, too xan a sibdoox no pindeef ke fop.»