Esayi 62 - NQAARIIT NE ROOG

Xan Yeerusaleem a dakoox qas

¹ Yaam o mbeq onqe jeguuma na wo, wo Siyoŋ, maarkiim o don es, yaam o mbeq onqe jeguuma na wo, wo Yeerusaleem, moofkiim fañ o fi dara, boo yaa o cofel of a feeñkaa nen mbeet, soo a muc of a meleƈ nen o jam.

² Xan a saax ake a nga o cofel of, soo maad we a mbuudaa o ndam of. Xan o cooxel gon xas le o Yaal oxe a ne’kaa.

³ No ɓay no Yaal oxe xan o ref nen tañalax mosu, ref nen o ndip no maad no dang o ɓay Roog of.

⁴ Xoykataandee «o baase xe», too saax of ne’kataand «o qatu xe». Ndaa kañ xan o xoyeel «oxe um xonwanaa», soo lanq of a ne’el «o yaal a tolax a pelu», yaam no ndigil, xan o ref oxe o Yaal oxe a bugna, soo lanq of a ndoloox.

⁵ Iyo, ne o fes a gilgitaa o njaaƈ o ndoog, neene mboƥ ne wo a njegitkang. Ne o kulook a ɗaaynoortaa o kor um itam, neene o refitkaa o ɗaay no Yaal oxe.

⁶ «Wo Yeerusaleem, doonaam yeeyetax no saŋe ke wo. Mbaree o tiim muk koy, ta ref ñaal mbaat o yeng. Nuun we na ƈufginooxaa o Yaal oxe, ba nu ñootnoox sen.

⁷ Ba nu nqaƴin fo njaambuur um boo yaa ta dalnatinkaa a Yeerusaleem, a fi’in o ndam onqe no lanq ke fop.»

⁸ O Yaal oxe a daaɓoorta a ñamaak um fa sañ-sañ um fop ee: «Xaƴkatiim muk fañ we wo a ñaam ngaaf of ne xooxoona mbaat wiin inooru na saax a can a yer biiñ fa nqas fee ɓaxoona doole of.

⁹ We na saxadkaa ngaaf ne na ñaamkan, a simataxam, mi o Yaal oxe, too we na nirkaa biiñ fee xan a yerin no maax ole no Mbind tedu ne mi.»

¹⁰ Sutooxyo, ndeef na xa ton-maax axe! Mbodrandanyo xeet fee a ƭat, njagand a qal ale, mbatin a kac ake soo sipan qeet ke a laay a anddiloor alaa na ɗoxaa a den.

¹¹ Keeke o Yaal oxe a yegnitu boo no cat adna: layyo a Siyoŋ o ndoog onqe yee: «O Muumucil of oxe garaa, a yoontiid tabid um, soo ke ta jalna a adooxanin.»

¹² Xan a nqoyeel «xeet fa tedu fee», «we o Yaal oxe a watna», soo wo, o xoyeel «oxe na yaaweel», «teeru fee waasaandeena».