Esayi 61 - NQAARIIT NE ROOG

O nan o felu le no xe o Yaal oxe a dodna

¹ Yiif le no Yaal oxe na refkaa boo faw oxe took es, yaam kaa ɗuumaam, ndax um yegnik rool we yegil mbaax ne, yaal we a qeeñ den a naqadilooxna, yegin faɗ we a bat ale soo yegin we ndameena yee xan a njeg a qoox den.

² Kaa lulaam, ndax um yegnitaa o Hiid o mbelakinax ole no Yaal oxe fa bes fee Roog in a rabdinooxkaa took no fañ um soo yaal fop we naqadilooxna.

³ Kaa ñaawooxaa a Siyoŋ, ndaa o jaf es refu um supit naqad den o ɗaay o jegee hap, ndaw ke na qoox den, um suptin tañalax mosu, ñaawax den, um suptin diwliin o mbelakinax, soo yiif naqadilooxu le den, um suptin ndoki simatir. Maaga, xan a nqoyeel pudaay ke no cofel ole fo a ƭing ale no Yaal oxe na feeñlaa o ndam um.

⁴ Xan a inatin kefatin ke yaaga, a maxatin pind ke ngef’eena no miñu kaa soo a nqendand teeru ke mbes’ina a pec no suk boo no suk.

⁵ Xan xa kataakoon a ngayanaa a nuun xa siir nuun fo a ked nuun, soo wiin inooru tuburbuus a nqooxanaa a nuun xa qol nuun fo a ƭing nuun.

⁶ Xan nu nqoyeel saasadax no Yaal oxe soo ne’el jaajal we Roog in. Xan nu ñoowtaa kalal ke na saax ake soo nqaaƴoor o ndam den.

⁷ Me gaci nuun a reeƭna, xan nu mbelakinoox maaga a caf a ƭak, xa ƈeel a ndef a las nuun ee a neewandax, nu ndaaw a las a ƭak no saax nuun nen su’nit, too xan nu ñoowataa no ɗaay o fagkeer.

⁸ «Mi o Yaal oxe, a ƭat rek bugum soo sib ƭegax fo njofaƭar. Xam saɗig a nuun fo o cofel soo dalin fa nuun ngiɓoor naa na refkaa boo faw.

⁹ Xa taan nuun xan a andel muu refna, we mbaqaqoorna na nuun a andel na saax ake fop. We na ƈookkaa a den xan a anddit a den xeet faa o Yaal oxe a barke’na.»

A kim a kidmir

¹⁰ Kaam felakinooxaa no Yaal oxe, o laaw es a may fo o ɗaay na Roog es, yaam kaa rokaam ndoki ne na muc ale soo a muuraam sabadoor ne no cofel ole, um nandtaa o kor-no-kulook oxaa rokooxna tañalax xew um mbaat o kulook oxaa mosandooritna kumooxel um.

¹¹ Yaam ne lanq ke a suttaa col ke mbaat ne a ƭing a saxnitaa ke duufeena teen, neen o Yaal oxe na refkaa boo faw a saxnitkaa o cofel fo a simat mbaambir a saax ake, ne da mbodeena fop.