Esayi 6 - NQAARIIT NE ROOG

Roog a xoya a Esayi, ndax ta ref o tuleer um

¹ No hiid olaa o maad Usiya a xonna, ga’aam o Yaal oxe a moof took uum-maamaad goƭu took, soo xa noflax axe no sabadoor ne ten a may Mbind Roog ne.

² Pindel yeeyetax yooroox’un, nuu refna a sax a nafir ɓetaa fo leng: A ƭak akaa da singtaa mukit den, a ƭak akaa da muurtaa a caf den fo a ƭak akaa da yettaa.

³ Kaa mbalalooroogu yee: «O Yaal oxe Hupna fop kaa ted! Kaa ted! Kaa ted! Lanq ke fop kaa may fo o ndam um.»

⁴ Mbalaloor neene kaa sendnooroogu a tayil ake na xa ton-maax axe, soo Mbind Roog ne a naag kuy fo fo suun.

⁵ Maaga, layaam ee: «Sabab took es! Saŋkooxaam kañ, yaam kaam ref o kiin oxaa xaaɗna o don, gen a ndeer xeet faa nqaaɗna o don itam, soo a kid es a nga o Maad oxe, o Yaal oxe Hupna fop!»

⁶ Maaga, leng no pindel ke a yetiida me mi, a pokoox fo a saangir gaagaañ sumu jip laa ta gefitna no sadaxand ole.

⁷ A duqnaxam o ten no don, a lay ee: «Keeke a duqa o don of, tooñ of a mborte, pakaad of a mbaasantel.»

⁸ Maaga, nanaam o ñuxur ole no Yaal oxe layoogna yee: «An um lulkaa? Ndi an na retankaa a in?» um jaaɓ ee: «Mexey, lulaam.»

⁹ A layaxam ee: «Reti o lay xeet feene yee: ‹Nu mbug oo nanit nof nuun, ndaa nu andkee tus, ƭeetit a kid nuun, ndaa nu nga’kee dara.›

¹⁰ Ŋajnoori xeet feene, sux nof den soo mup a kid den, yaam ndik da nga’it a kid den, a nanit nof den, a andit a qeeñ den, soo a saktooxiid me mi, a mbodandel.»

¹¹ Maaga, laamtaam ee: «O Yaal oxe, boo a mban neene?» A doonaxam ee: «Boo yaa teeru ke a ngefkeel tuƈ, a mbes a pec, pind ke a yoq o ƥor, soo xa saawit axe yee halit nen a koƥ-a-ƥor,

¹² boo yaa mi o Yaal oxe um riƈatkaa we ngenna no saax le, ta waasel pelek, a yoq o ƥor.

¹³ A yoqahinangaa teen a qaaj xarɓaxayandeer no wiin we, weene yoo xan a mbuuɓel. Kaa koy, ne ngariñ mbaat ndaxar maak lakas a yoqtaa fanq, yaa ta fuuɓeena, neene a yoqitkaa fanq, too teen o fog ole no tedu we a saxitkaa.»