Esayi 57 - NQAARIIT NE ROOG

¹ O cofu xe kaa saŋkooxaa, too o liir no leng jaaɓee, gore’u we a ngifeel, too o leng andee yee kaa ngifeel, ndax da ndaɗ taamaala fee.

² Xan a ndok na jam fee. Ii, we na ndeefaa a ƭat a cofu le xan a ñootnoox fo o yaadax.

Xeet fee na mbaɗooxaa pangool ke a nqasane

³ «Matiidyo mene, nuun lakas we, xa ƥiy no tew o naq oxe nu ndefna, xeet fa mbeefes fee fo fa njaga’u fee.

⁴ An nu nqaadnooxaa? An nu njeeraa soo laaƈan ɗelem? Xa ƥiy bakaad nu ndefu tigi, xeet fa maamaaɓ.

⁵ Kaa nu sumaa paam pudaay yimbil ke, yoora fop ke saqitna nep. Kaa nu sadaxtaa xa ƥiy nuun no cat ke na ƈufnand ake fo no luf ke na ƥil ake.

⁶ A kac a ƥodaxu ke na ƈufnand ale ndefu a las of, o ɗeg ole jegoona! Den o juuranaa biiñ fee nen sadax soo ɓoxotaa a den sadax tuufe-duufe! Ndax xam jaɓ keene?

⁷ Sipaa njong of took o joong o jiig, maaga o ŋaayaa, ndax o ɓoxot sadax.

⁸ Kaa o lupaa a paƴ no don-maax of soo lok a den na tayil ake. Kaa o laqooxaxam, woloox ƭuc, ŋaay took njong of, yaajandin. Kaa o dalnaa ndabid fo we o yuxmaa o wondoor. Kaa o fex o wondooxaa fa den, ɗeetaa mbaambir ne den.

⁹ Kaa o retaa maa Molok, ɓisloox diwliin, saq qeeñe-xeeñe. Lulaa wiin boo maa leng a andeerna, fudin a den boo kam jaaniif.

¹⁰ Ñaaƴaa ñaaƴ boo naag laƈ, ndaa taxee o lay ee: ‹Kaa foosnooxat.› Maadaa maad o jegaa doole rek, ten taxu xijiro.

¹¹ Ndi an saɗaroogo boog, an fit’o boo a tax o maaɓaxam, fañ o xalaatataam soo weecaam? Andum ne maar’uuma o don es yaaga boo fa ndiik taxu saɗariraamo.

¹² Kaa koy, xam yegnit o cofel of fo a pi of mbatkeeroonga o njiriiñ o leng.

¹³ Yaa o ƴufginooxkaa, fat pangool ke wo a muclong kañ! Xan nqeñ a maƥ a den fop, a ƥay a leel a den, ndaa oxe na waaƭkaa njaɓnooxand me mi xan a lam lanq ke too xan a jeg o joong o tedu le mi.»

Xeet fee Roog xan a mbodandel

¹⁴ O Yaal oxe kaa tee: «Nqendandyo a qal ale, ngolit a ƭat ale, ƭiqit a panq ake mbodna xeet es mbaambir.»

¹⁵ Keeke oxe hupna fop, ngenand um a ref boo faw, too gon um a ref o Tedu xe, a layu: «Kaam gen took-ee-took fo no tedel, ndaa kaam gen itam fo we ngooyna too a njeg yiif neewandooxu, ndax um ñoowdand we neewandooxna soo ɗaaynoor we ngooyna.

¹⁶ Bugiim o jambaa rek fañ o waas, mbaat um gen no fuux cay. Mbaat tooxen fop we sakuuma a ñakkooga o ñis den.

¹⁷ Fuuxan’aam a Isra’el yaam tooñ ke ten fo a yuxum um. Xawaanum kam fuux es, ɗasnin mukit es, ndaa ta maad no ngore’aƭar rek, a reefan a yuxum xeeñ um.

¹⁸ Andaam a paax a pesoorooƭ um. Yaqanee koy xam wodandin, ɗoxin soo saƭkinin, ten fo we ñaawooxoogna fo ten.

¹⁹ Xam fi da ƈeelaa fo o ɗaay yaam jam fee jagandan’eena we moƴna o ngoƭ nen we moƴna o mat.» Keene o Yaal oxe a layu. «Iyo, xam wodand xeet es.»

²⁰ Kaa koy, soxodu we kaa nand nen o maag o jumbu laa waageerna o riim, too poofi ke ten a njooriidaa tafil ndoƭ kuu ndefna.

²¹ Roog es kaa tee: «Soxodu we o mat njegee jam.»