Esayi 54 - NQAARIIT NE ROOG

Yeerusaleem waasataand

¹ Wo fee o timar, felakinooxi. Wo fee moseerna o jeg o ƥiy too ñimiro xa ƭomel gaaj, ƴeeli a maak too ref no ɗaay, yaam o Yaal oxe xe layang ee: «Wo o tew oxe waaseena, ndiiki wo hupɗatu o tew oxe na dolooxaa xa ƥiy.»

² «Ɗaayi ƭiif ne wo, ɓaat coor ke no ngenand ne wo, fañ o hend dara. Joki xa ƥaak axe no ƭiif ne wo, saƭkand xa teng axe,

³ yaam xan o ɗaayoox na ñamaak fo na janoon. Xa taan of xan a njangatin xa saawit axe qeet lakas ke a ngenna, soo a ngenatin teeru ke mbes’ina a pec.

⁴ Ba o saɗar boog, yaam neewandkataandee. Ba o yogorloox, yaam niwaƭarkataandee. Xan o weecit gaci fee no ndeƥandoong of too wetandooxkatiro o niwaƭarel ole yegoogoona ye o refaa o ñaaw.

⁵ Oxe sakoonga refu o kor of, oxe gon um a refna o Yaal oxe Hupna fop. O Tedu xe Isra’el refu o baawat of, ten fee na xoyeel Roog fee no lanq ke fop.

⁶ O Yaal oxe kaa xoyatinong nen o tew oxaa waas’eena soo a jimboox na naqad.» Roog of kaa tee: «Nam o tew oxe jileena no ndeƥandoong naa a waage o waasit?›

⁷ O ngap o neewu waas’aaxoong, ndaa kam o mbeq o maak onqe mi xam xotatinong.

⁸ Kam fuux ɗomu ɗasin’aaxoong mukit es no miñeer, ndaa kam o mbeq es o njegee hap xam yirmong. Mi o Yaal oxe layong o ten, mi fee o baawat of.

⁹ Xan a ref na mi xaye nen jamaane faa Nowe. Ne daaɓoorit’uuma yee saŋkitkatiim adna fee o jaɓ, mexe daaɓoortan neen ee fuuxankatiroong too ŋalkatiroong itam.

¹⁰ Xa coong axe a ndiidangaa a tas sax oo, a ñaang ake a sooƴ, o mbeq es na wo diidkee a tas, too ngiɓoor jam ne mi sooƴkee muk. Keene mi layong o ten, mi o Yaal oxe fexoonga.»

Yeerusaleem fee no camaane ke na ngaraa

¹¹ «Ey wo Yeerusaleem fa toroxu fee a und a maak ale a yo’inna, too o leng yaalirang! Ga’i, mi o Yaal oxe, xam sooñit a ƥil ake wo kaa jaxasteena keew, fi’atinit fer le wo a ƥil safiir.

¹² Xam fi’it itam cat ke no saŋe ke wo a ƥil a cafeñu a ne’e rubis, tokand ke wo, um fi’it a den kaa na mirmirnaa nen galam fo jem, soo a ƥit ake wo fop a ƥil a cafeñu.

¹³ Xa ƥiy axe wo fop xan a ndef daalbe es, mi o Yaal oxe, too xan a ñoowaa na jam fa baneex.

¹⁴ Xan o saƭkandtel o cofel, laqel ñagadil nuu refna, too jegkatiro dara kaa o saɗaraa. Kaa na diidlandaa faambnooxkatirang, matkatirang a mat sax.

¹⁵ O bugange o song, inoorkee na mi. Kaa sax oo, oxuu songoonga, xan a xon na caf of.

¹⁶ Ɗeetlooxeen, mi saku o qaaxaw oxe na uufaa fiɗel le soo a jalaa ƥonax kuu ndefna. Kaa koy, mi saku itam o yaayaq oxe na gefaa.

¹⁷ Ƥonax nuu xawneena ndax ta gaañong faaxkee. Oxuu jamboonga no pind layoor ke, xan o damnoorin. Keene refu a las ale geekanuuma dag es. Keene refu o cofel ole den inoorna na mi, mi o Yaal oxe.»