Esayi 48 - NQAARIIT NE ROOG

O Yaal oxe xe yegnitaa qas

¹ «Nuun mbind Yakoob, nangilooxyo, nuun we na nqoyooxaa gon le Isra’el, soo mbaqaqoor na Yudaa. Kaa nu ndaaɓooraa gon le no Yaal oxe soo ne’aa a Roog fee Isra’el too refkee no ndigil fo no cofu.

² Nuun we na nqoyooxaa ‹We na teeru fa tedu fee›, nuun we ndamlooxna na Roog fee Isra’el, oxe gon um a refna ‹O Yaal oxe Hupna fop›, nan-gilooxyo boog kene:

³ Ke xewna no miñu kaa, yegnit’aanum yaaga fadiidafulee, no don es a hatu, too yegin’aanum a nuun. Kaam songin rek, ta fadnoox.

⁴ Ne and’uuma yee xeet fa nanaƭaru nu ndefu faa na siiknooreel soo a saƭik a qoox,

⁵ a taxa um yegin a nuun yaaga keene xewna. Andnooraanum a nuun yaaga fadiidafulee, ndax nu laykee yee: ‹Mbangool es garu fo ten, o daaƴ es mbaat nitaal njawe es bugtun neene.›

⁶ Nu nana ke yegnit’uuma yaaga, too nu nga’a yee fop a fadnooxa. Ndax kaa nu njaɓkiran? No ke xotitna xaye koy, qas ƥor um yegnitaa, ta ref kaa hend’uuma too ta kunpa’u a nuun.

⁷ Refee cosaan fa miñu, ndiiki soom a mbadnooxkaa. Kaa jolna ñaal nene, nu mosee o nan muk da layteel, yaam ndik nu lay ee: ‹I and’aan a paax.›

⁸ Kaa sax nu mosiran o nan, nu mosiran o and, too mosee o rok no yul nof nuun, yaam and’aam ee hoohod nu ndefu. Naa nu ndime, kaa nu nqoyeel gore’aƭaru we.

⁹ Kaam dam fuux es yaam gon es. O ndam es taxu um wuus a nuun, fañ o saŋik a nuun.

¹⁰ Xoolandaam a nuun. Refee koy na fiɗel fee xaaliis a xoolandteel, ndaa kaam ɗeetloox a nuun kam taamaala.

¹¹ Um fesoorangaa neene, mi fa xoox es taxun, ii, mi soom taxun, yaam waagiim o jaɓ muk gon es a niwaƭarel. Waagiim o xaƴan lakas we o ndam onqe helaxama.»

Oxe na fadinkaa yuuƥ ne no Yaal oxe

¹² «Nan-gilooxaamoo, nuun xeet fee Yakoob, wo Isra’el fee xoyuuma. Mi yoo! Mi refu o eetaand oxe fo o palakaand oxe.

¹³ O ɓay es saktum lanq ke, too a ñamaak es fiistum asamaan fee. Mexaay xoyaa a den, da ngakaam ndak fo ndak.

¹⁴ Nuun fop, mbokatooryo too nan-giloox. Oxe o Yaal oxe a fexna xan a fadin ke ta yuuɓanna a Babilon, a ref o ɓay um ole na fi’kaa o bug ole ten took no Kaakalde we. Kaa koy, fum no pangool ke nuun feeñlu keene boog? Jegee fa leng.

¹⁵ Mi o mat laytun, doon teen xoyin soo ɓisiidin. No kuu ta rokna xan a barke.»

¹⁶ Matiidaamoo, ndax nu nan-giloox kene: No kaa xotitna no mberaand naa mosiim o lay na pet, too a koom alaa keene a xewaa, maadaanum. Ndiiki koy, o Yaal oxe na refkaa boo faw a lulaxam fo Yiif um.

Ke o Yaal oxe a regna oxe na nan-gilooxan

¹⁷ Keeke o Yaal oxe refna o baawat of, a ref o Tedu xe Isra’el a layu: «Mi o Yaal oxe, mi refu Roog of, mi na aqatinang ke maloonga, mi na ɗoxang na qal ale waroona o reef.

¹⁸ Ey, o nan-gilooxangaa a paax ke hebloonga, yaaga jam of a ref nen o xuluɓ, o cofel of a ref nen a yag-ee-yag ake no maag ole,

¹⁹ soo xa taan of a mayit nen lanq o maag, we mbaqaqoorna na wo a siwit nen pep lanq. Kaam ee yaaga gon of ñufkee too foritkaand mbaambir es!»

Inooxyo Babilon

²⁰ Sutooxyo Babilon, ñofyo inoox no saax le no Kaakalde we. Yegnityo fo o ɗaay o nan olene boo no cat adna. Yegniteenoo, lambnin too lay ee: «O Yaal oxe a wata a Yakoob fee o tag um.»

²¹ Ye ta ɗoxna a den na koƥ-a-ƥor alaa, ngoɗom’aand. A balnana a den foofi no ɓil le, a qaacin, soo foofi a balit teen.

²² «Soxodu we o mat, njegee jam.» Keene o Yaal oxe a layu.