Esayi 47 - NQAARIIT NE ROOG

Njom ne Babilon

¹ O Yaal oxe kaa tee: «Fudooxiidi, moof kam fo ut ole, wo Babilon o njaaƈ o ndoog onqe! Moofi a lanq, wo o ndoog onqe no Kaakalde we, yaam jegatiro uum-maamaad! No ke xotitna ndiiki xoykataandee o mosu xe mbaat o nequ xe.

² Xoti a ƥil a unir a ƭak ake soo un mbiɗel. Murtooxi, yoɗ xa noflax axe no ndoki maak ne wo, hulit a caf of too joot xa quluɓ axe.

³ Xan o yoq o ƥor, ta ref gaci na wo. Xam rabdinoox, too o leng xafkee.»

⁴ O baawat in ne’e o Yaal oxe Hupna fop, o Tedu xe Isra’el.

⁵ «Moofi na yelem too laqoox no niɓaan ole, wo o ndoog onqe no Kaakalde we, yaam xoykataandee lingeer fee no maat ke.

⁶ Kaam fuuxan’u xeet es, fudin we jeg’uuma soo ɓoxotong a den. Wo o mat, yirmiro a den, gadnaa o nogoy oxe sax kadoor meɗu ke wo.

⁷ Kaa o layoogu yee: ‹Xam ref lingeer boo kili.› Keene xew’ina haal’irang, too yiif of galag’ee muj um.

⁸ Ndiiki boog, nan-gilooxi, woxe na ñaamaa jamaane of, moof a paax fo o yaadax too layaa yee: ‹Mi, jegiim o nand, andkiim ke ñaaw a refna boo muk too ñakkiim xa ƥees.›

⁹ No ñaal leng kut ne, ndeer ñaf fo ƭeet, tig ƭik kene xan a ndalong: xan o ñak xa ƥeef soo refat o ñaaw. Keene xan a ndalong boo ta dey sik, ke mayoona may pannax fa doole fee no ñango of fop oo.

¹⁰ Kaa o hooloox’u kañaan of, layaa yee: ‹O leng ga’iraam.› O waag of fo o and of kaa mo’andong soo a ndiñong o lay ee: ‹Mi, jegiim o nand.›

¹¹ Ten taxu, xan taamaala faa waagkeeroona o saay a dalong. Xan o njakad a sagong, too waagkino o daɗ. Xan yaq fa maak faa foogu’eeroona a yen took of ndak fo ndak.

¹² Dami no pan of boog fo no ñango of keene jang’oona fo a koorgoorlax a maak no kaa xotitna no ndeƥandoong of. Xeƈa xan o xotit teen o ndimle mbaat o diidland muj fa mbaaxeer fee.

¹³ Kaa o xijaa ɗeetnooxaa. Fat a inoox soo a muclong, den we na njektaa asamaan fee too a ngorooxaa xa qoor axe, a yegnitaa no nqool o ndeɓ onquu refna ke waroonga o dal.

¹⁴ Muj den xan a nand nen fo gooñ olaa fiɗel a raaɓaa, ndaɗkee a aal ake. Refkee o wuuclaand olaa o gaf a waageena o juɗit mbaat keƥandand naa o kiin a waagna o raƭoox.

¹⁵ Keene na refkaa muj no ɗeet we wo xijoogoona ɗeetnooxaa me den no kaa xotitna no ndeƥandoong of. Xan a njoqooyooxaa, oxuu refna me ta payna. O leng mucilkirang!»