Esayi 44 - NQAARIIT NE ROOG

Isra’el xan a jokoox

¹ «Ndiiki koy, nan-gilooxi a paax, wo Yakoob fee o tag es, wo Isra’el fee jiluuma.

² Keeke o Yaal oxe sakoonga, a moolong no fud ya of too a dimle’ang, a layu: Ba o saɗar dara Yakoob, wo fee o tag es, wo Yesurun fee jiluuma,

³ yaam xam balin poofi took no xe hoɗomeena soo fi a banj took lanq ke mbeerna koroŋ. Xam fudin Yiif es took xa ƥeef, fa barke es took xa taan of.

⁴ Xan a sax nen xeet kam foofi, nen qawul paam a banj.

⁵ Oxene xan a lay ee: ‹O Yaal oxe jegaxam›, oxaana a xoyooxaa gon le Yakoob, o lakas oxaana a bind no ɓay um ee: ‹O Yaal oxe refanum›, soo a fakooraa gon le Isra’el.»

Roog tefee ndigil ke a naƥnooxe

⁶ Keeke o Yaal oxe Hupna fop, a ref o Maad Isra’el fo o baawat um, a layu: «Mi refu o eetaand oxe fo o palakaand oxe. Jegee roog fa lakas, a refangee mi.

⁷ An nandu fa mi? Fat a yegnitin too a feednaam o ten. No kaa xotitna yaa sakuuma xeet fee yaaga, fat a yegnit ke xewna fop boog fo ke na xewkaa itam.

⁸ Ba nu ndiid, too ba nu send. Ndax kaa nannoorinum a nuun soo yegnin a nuun yaaga? Nuun ndefu seede es. Ndax a jega roog fa lakas faa jolna mi? Jegee ɓil jaɓnooxand lakas, mi o mat andinum.»

Jaajal we na xa taaƴ axe

⁹ We na sexaa nitaal ndefee dara, too calel ke den a mos mos ƭaxee dara. Den ndefu seede den, seede waa mbaageerna a ka, too o and refee na den. Ten taxu yoo xan a sed ɓot.

¹⁰ Xawnaa roog mbaat o maxnaa mbangool naa ɗaxkeerna dara, meene soom ƭof a dayu.

¹¹ We na mbaɗooxan fop xan a sed, yaam o kiin soom sexun. Fat a mbokatoor den fop, a ngar, too xan a ndiid soo a sed.

¹² O tafax oxe kaa lakaa ɓaax, a jalaa fo a kaagaañ a sumu jip, a xawtaa nitaal ne o jibam, too doole um fop a fi’tan. Kaa xeexeel sax boo jegkatee o ndoole, a hoɗomeel soo a xij boo laƈ.

¹³ O taadaaƴ oxe kaa letnaa o ƥaak o liiƥir um, a fi samandaal ne no mbangool ne fo gaagaañ, a xeeƈin fo o roomir, a samandaaltin a teex goɓi, a jalin ta nand fo o kiin, a saq mukit no kiin o ñoow jok, soo ta gen kam mbind.

¹⁴ Kaa fuuɓaa taxar seedar ke, a jilaa kariñ ke mbaat kaan ke, a xaƴaa a den da maakaa ndeer taxar ke no suungaan le. Kaa duufaa lorye, soo a teƥ ale a maaknan.

¹⁵ Taxar keene o kiin oxe a heƥandtaa fiɗel, a xottaa teen taƭoor mbaat cuɗir puuru. Teen a jaltaa itam a roog faa ta gunganaa, a fi’aa teen xa taaƴ axaa ta ƴufginooxaa.

¹⁶ Kaa doxaa genwal fee na ting ake, a juɗit teen a tegeƴ, a ñaam boo a giñ soo a raƭooxaa teen, a damtin ee: «Ey, mexey raƭooxaa, ndaw a sumaan a pelu.»

¹⁷ Na genwal fa lakas fee na ting ake, kaa jalnaa teen roog, a sexnaa teen mbangool, a gungaa mbaambir um soo a ƴufginooxan ee: «Wo refu roog es, muclaam!»

¹⁸ Wiin nandu neene, dara refee na qoox den, andee dara. A kid den kaa muurel boo mbaagee a ka, soo da ndaƥ a yiif boo mbaagee o ndam tig.

¹⁹ O leng na den jegee xalaat, o leng na den jegee o and mbaat yiif laa ta layitna yee: «Doxaam genwal fee na ting akeene, juɗit na kaagaañ ake mbuuru es, soo juɗit teen a tegeƴ ake um ñaamaa. Ke um fi’aa na genwal fa lakas fee cednooxu yoo. Mbaambir cat a teex soom um gungaa.»

²⁰ Muk, a qalaat um kaa njagin no kaa refna ndaw ƥor. Yiif um mo’u kaa laynooran xa koɓong xa ƥor. Mucilkee o ñis um, yaam laykee muk ee: «A woora yee ke pokooxuuma naanaxir ƥor oo.»

O Yaal oxe xan a wat xeet um

²¹ «Wo Yakoob, wetandooxi a paax kene, wo Isra’el fee o tag es, ba o weec ee kaam sakong, ndax o jalanaxam. Wo Isra’el, weeciroong muk.

²² Fortaam njofaƭar of fop nen eel hurdooxu, forit pakaad of itam nen a liim a samu. Nomtooxiidi me mi, yaam mi watong.

²³ Asamaan, lalti o ɗaay of, yaam o Yaal oxe fi’u keene. Nuun qooƭ ke no lanq ke, mbelakinooxyo. Nuun xa coong axe fo a suungaan ake fo taxar den, mbecooxyo too ndef no ɗaay, yaam o Yaal oxe a wata a Yakoob, a feeñil o ndam um na Isra’el.»

O Saasak oxe na adna fee kelfa’u ke na xewaa

²⁴ Keeke o Yaal oxe refna o baawat of, a moolong no fud ya of, a layu: «Mi saku ke jegna fop. Mi letnu asamaan fee, mi soom, letin lanq ke, too o leng dimle’iraam.

²⁵ Kaam ñufaa xa anddiloor axe no ɗeet maamaaɓ we, firiɓnooraa ñaañango we, nomtaa yaal-o-and we a cinj soo fudin o and den no ƭooɗofir.

²⁶ Kaam fadnaa fa lay no tag es soo fadnaa padafuleer ke duleer we mi a yegnitna. Kaam layaa a Yeerusaleem ee: ‹Xan o genel›, soo teeru ke Yudaa, um lay a den ee: ‹Xan nu maxatinel›, too xam inatin ke yaq’eena teen fop.

²⁷ Kaam layaa qooƭ ke no maag ole yee: ‹Mbeeryo› Xam ŋiisin poofi ke ten.

²⁸ Kaam layaa a Kiirus ee: ‹Wo refu oxe na gayanaxam.› Xan a fadin ke buguuma fop. Xan a lay a Yeerusaleem ee: ‹Xan o maxatinel›, soo Mbind Roog ne ta layin ee: ‹Xan o tabaxatinel.› »